विराटचोकः प्रदेश नम्बर १ को मुख्यमन्त्रीमा नेकपा एमालेका हिक्मत कार्की नियुक्त भएसँगै ४ सदस्यीय मन्त्रिमण्डल गठन भएको छ । संघमा सरकार गठन भएदेखि नै नेपालको शेयर बजारमा हरियाली छाएको छ । नेपाल स्टक एक्सचेन्जमा सूचीकृत कम्पनीको शेयर किनबेचमा सांसद र मन्त्री तथा नेताहरु प्रत्यक्ष तथा अप्रत्यक्ष रुपमा संलग्न रहेका हुन्छन् । यसै क्रममा अघिल्लो मन्त्रिमण्डलमा रहेका मन्त्रीहरुको शेयर खरीदबिक्रीको अवस्था कस्तो थियो भनेर यहाँ प्रस्तुत गरिएको छ ।

मन्त्रीहरुको शेयर खरीदबिक्रीको अवस्था कस्तो थियो भनेर यहाँ प्रस्तुत गरिएको छ ।

मुख्य मन्त्रीसमक्ष पेश गरेको मन्त्रीहरुको सम्पत्ति विवरण हेर्दा प्रदेशका आधा मन्त्रीले धितोपत्र किनबेच नगरेको पाइएको छ ।

निवर्तमान मुख्यमन्त्री राजेन्द्र राईले कुनै पनि कम्पनीको शेयर नकिनेको सम्पत्ति विवरणमा उल्लेख गरेका थिए ।

निवर्तमान आर्थिक मामिला तथा योजनामन्त्री इन्द्रबहादुर आङ्बोले श्रीमती कुमारी लावतीको नाममा पालुङ खोला हाइड्रोको १० प्रतिशत शेयर किनेको उल्लेख गरेका छन् ।

सडक पूर्वाधार तथा सहरी विकास मन्त्री हिमाल कार्कीको नाममा कृषि विकास बैंकको १०० कित्ता शेयर रहेको उल्लेख छ ।

आन्तरिक मामिला तथा कानुन मन्त्री केदार कार्कीले आफ्नो नाममा धितोपत्र नभए पनि श्रीमती राधादेवी कार्की र छोराहरु साकेतबाबु कार्की र शाब्दिकबाबु कार्कीको नाममा विभिन्न कम्पनीको शेयर रहेको उल्लेख गरेका छन् । नेपाल धितोपत्र बोर्ड नेप्सेमा सूचीकृत र असूचीकृत दुवै किसिमका कम्पनीको शेयर उनीसँग रहेको छ ।

स्वास्थ्य मन्त्री जयराम यादवको पनि धितोपत्र बोर्डमा सूचीकृत र असूचीकृत दुवै किसिमका कम्पनीको शेयर रहेको छ ।

खानेपानी सिँचाइ तथा ऊर्जा मन्त्री रामकुमार राई, सामाजिक विकास मन्त्री राजन राई र पर्यटन तथा संस्कृति मन्त्री खिनू लङ्वाको शेयरमा लगानी छैन ।

कृषि मन्त्री झलकबहादुर मगर झापा इनर्जीका संस्थापक शेयरधनी हुन् भने २ वटा सहकारीमा पनि उनको शेयर रहेको छ ।

मन्त्री पदमा वहाल रहँदै निधन भएका वन, वातावरण तथा भू संरक्षण मन्त्री शेखरचन्द्र थापाको शेयरमा लगानी नभएको भनी सम्पत्ति विवरणमा उल्लेख गरिएको छ ।

भूमि व्यवस्था, सहकारी तथा गरिबी निवारण मन्त्री ओमप्रकाश सराबगीको धितोपत्र बोर्डमा सूचीकृत ३ कम्पनीको आईपीओ र असूचीकृत ६ कम्पनीको शेयर रहेको छ ।

श्रम, उद्योग तथा रोजगार मन्त्री प्रतापप्रकाश हाङ्गामको शेयरमा लगानी छैन ।

यातायात व्यवस्था तथा सञ्चार मन्त्री उपेन्द्रप्रसाद घिमिरे र सामाजिक विकास राज्यमन्त्री विष्णु तुम्बाहाम्फेको पनि शेयरमा लगानी नभएको सम्पत्ति विवरणमा उल्लेख छ ।