विराटचोकः शुक्रबार सुन्दरहरैँचा कला साहित्य विकास समितिका अध्यक्ष साहित्यकार छवि वैरागी घिमिरेद्वारा लिखित खण्डकाव्य ‘किनारीकृत माइली’ विमोचन भएको छ । कृति विमोचनको औपचारिक कार्यक्रम शुरु हुनुपूर्व कृतिको भावमा आधारित रहेर नाटक मञ्चन गरिएको थियो ।
घिमिरेको कृतिको लोकार्पण कार्यक्रमका प्रमुख अतिथि वरिष्ठ लोकगायक एलपी जोशीका साथै विशिष्ट अतिथि साहित्यकार मनु मन्जिल, केशव सुनाम, सुन्दरहरैँचा नगरपालिकाका संस्थापक नगरप्रमुख शिवप्रसाद ढकाल, पूर्व सांसद हर्कमान तामाङलागयतले गरेका थिए ।
आधुनिक साहित्य परिषद् काठमाडौका अध्यक्ष मुरलीप्रसाद ढकाल, गौरी पब्लिकेसन्सका प्रबन्धक तथा साहित्यकार दामोदर ढकाल, नयाँ वृन्दावन गौशालाका पिठाधीश दीनबन्धु शास्त्री, समाजसेवी तिलक परियार, सावित्रा परियारलगायत कार्यक्रममा उपस्थित थिए ।
कृतिभित्रका रचनालाई सङ्गीतका माध्यमद्वारा गायक दुर्गा पराजुली तथा गायिका तारा पराजुली ढकालले प्रस्तुत गरेका थिए । कला, साहित्य, सङ्गीतलाई समेटेर आयोजना गरिएको कार्यक्रममा गायिकाद्वय गङ्गा विष्ट, कविता लिम्बू तथा आयुष विष्टले आधुनिक गीत प्रस्तुत गरेका थिए ।
‘किनारीकृत माइली’ खण्डकाव्य एक यथार्थ माया प्रेमको वियोगान्त घटनाको एक कालखण्डलाई लिएर रचना गरिएको सर्जक घिमिरेले बताए । समाजमा रहेको जातीय छुवाछुत, देशको वर्तमान अवस्था, प्रकृति र मानव, पूर्वीय सभ्यता र शास्त्रीय यथार्थ जस्ता विषय खण्डकाव्यमा समेटिएको सर्जक घिमिरेले बताए । आफ्ना पिताले जातीय विभेद अन्त्य गर्न तत्कालीन पञ्चायतकालमा खेलेको भूमिकाबाट प्रभावित भएर आफूले साहित्यको माध्यमबाट जनचेतना फैलाउने काम गरेको उनले बताए ।
You must be logged in to post a comment Login