विराटचोकः प्रहरी महानिरीक्षक धिरज प्रताप सिंहले १ नम्बर प्रदेश प्रहरी अस्पतालको उद्घाटन गरेका छन् । बेलबारी–३ मा रहेको पुरानो इलाका प्रहरी कार्यालयको भवनमा सञ्चालित प्रदेश प्रहरी अस्पतालको एक बिशेष कार्यक्रमका बीच सङ्गठन प्रमुख सिंहले विधिवत रुपमा अस्पताल भवनको उद्घाटन गरेका हुन् ।

भवन उद्घाटनपश्चात् प्रमुख अतिथि प्रहरी महानिरीक्षक सिंह लगायतले नव–निर्मित भवनका साथै उपलब्ध स्वास्थ्य उपकरणहरुको अवलोकन गरेका थिए ।

कार्यक्रमलाई सम्बोधन गर्दै उनले १ नम्बर प्रदेश प्रहरी अस्पतालको शुभारम्भले १ नम्बर प्रदेशमा रहेका पूर्व प्रहरी कर्मचारी, अमर, अशक्त प्रहरी कर्मचारी तथा बहालवाला प्रहरी कर्मचारीका साथै आश्रित परिवार समेतको स्वास्थ्य सेवामा पहुँच पुग्ने उद्देश्यले प्रदेश प्रहरी अस्पताल सञ्चालनमा ल्याइएको बताए ।

कार्यक्रममा बेलवारी नगरपालिकाका प्रमुख दिलप्रसाद राईले नगर क्षेत्रमा प्रहरी अस्पतालको निर्माण र सेवा शुभारम्भले नगरवासीहरु उत्साहित रहेको बताउँदै हरेक नागरिकको स्वास्थ्य सेवामा प्रहरी अस्पतालको अहम भूमिका रहने उल्लेख गरे । अस्पतालको स्तरोन्नतिलगायत हरेक क्षेत्रमा सहयोग र समन्वयको लागि नगरपालिका सदैव तत्पर रहेको उनको भनाइ थियो ।

कार्यक्रममा नेपाल प्रहरी अस्पताल महाराजगञ्ज काठमाडांैका मेडिकल डाईरेक्टर प्राविधिक प्रहरी अतिरिक्त महानिरीक्षक डा. आशा सिंहले सीमित स्रोत र साधनका बीच प्रदेश प्रहरी अस्पतालको अवधारणा ल्याई सेवा शुभारम्भ गरिएको बताए ।

कार्यक्रममा प्रदेश प्रहरी प्रमुख प्रहरी नायव महानिरीक्षक श्यामलाल ज्ञवालीले स्वागत मन्तव्य राखेका थिए ।

कार्यक्रममा प्रदेश प्रहरी अस्पतालका प्रहरी नायव उपरीक्षक डा. सरोज सिंहले प्रदेश प्रहरी अस्पतालको सेवासम्बन्धी प्रतिवेदन प्रस्तुत गरेका थिए ।

प्रदेश प्रहरी अस्पतालमा तत्काल ३ जना विशेषज्ञ चिकित्सकसहित १० जनाको प्राविधिक टोलीले ओपिडि तथा इमर्जेन्सीलगायतका सेवा प्रदान गर्नेछ । अन्य सेवाहरु समेत क्रमशः थप हुँदै जाने प्रहरी नायब उपरीक्षक डा. सरोज सिंहले बताए ।

कार्यक्रममा मोरङका प्रमुख जिल्ला अधिकारी तीर्थराज भट्टराई, प्रदेश स्थित अन्य सुरक्षा निकायका प्रमुख तथा प्रतिनिधिहरु, विभिन्न स्थानीय तहका जनप्रतिनिधिहरु, बिभिन्न सरकारी तथा गैर सरकारी कार्यालयका प्रमुख तथा प्रतिनिधिहरु, विभिन्न संघ संस्थाका प्रमुख तथा प्रतिनिधिहरु, पूर्व प्रहरी कर्मचारीहरु तथा स्थानीय सहभागी उपस्थित थिए ।

प्रदेशका प्रहरी कर्मचारीहरूको स्वास्थ्यलाई ध्यानमा राख्दै प्रदेश प्रहरी अस्पताल सञ्चालन भएको हो ।