धनगढीः गत माघमा सुनसरीको इटहरीमा भएको प्रधानमन्त्री कप महिला राष्ट्रिय टी–२० क्रिकेट प्रतियोगिताको उपाधि सुदूरपश्चिमको टोलीले जित्दै इतिहास रचेको थियो । सुदूरपश्चिमको महिला टोलीले राष्ट्रिय प्रतियोगिताको उपाधि उचालेको यो नै पहिलोपल्ट थियो ।
उपाधी दाबेदार एपीएफ र प्रदेश १ दुवै टोलीलाई पन्छाउँदै शानदार प्रदर्शन गरेका थिए कविता कुँवर र मनिषा चौधरीले । कविताले एसपीएफविरुद्धको फाइनल खेलको अन्तिम ओभरमा जीतका लागि आठ रन आवश्यक भएका बेला लगातार दुई छक्का प्रहार गर्दै सुदूरपश्चिमलाई उपाधि दिलाएकी थिइन् । उनी प्रतियोगिताको सर्वोत्कृष्ट खेलाडी र उत्कृष्ट ब्याटर पनि चुनिएकी थिइन । भविष्य स्टार खेलाडीको उपमा पाउँदै उनले स्कुटर पनि जितेकी थिइन् ।
प्रतियोगितामा उत्कृष्ट बलरको उपाधि सुदूरपश्चिमकै मनिषा चौधरीले पाएकी थिइन् । मध्य गतिकी बलर उनले गण्डकीविरुद्ध ४, बागमती, सेमिफाइनलमा मधेश र फाइनलमा प्रदेश एक विरुद्ध २–२ विकेट लिदै सुदूर पश्चिमलाई उपाधि दिलाएकी थिइन् ।
दुवै खेलाडीका साथै उपाधि विजेता टोलीका सदस्यहरु ईश्वरी विष्ट र रुवि पोद्दार धनगढीको सुदूरपश्चिमाञ्चल एकेडेमी(एसपीए) कलेजमा अध्ययनरत छन् । कलेजले रजत जयन्तीको उपलक्ष्यमा उनीहरुलाई नगद र सम्मानपत्र सहित सम्मानित गरेको छ । सबैले कलेजमा छात्रवृत्तिमा अध्ययन गरिरहेका छन् ।
उनीहरूलाई सुदूरपश्चिम प्रदेशका भौतिक पूर्वाधार विकासमन्त्री प्रकाशबहादुर देउवा, एसपीएका अध्यक्ष योगेन्द्रबहादुर शाही, प्रबन्ध निर्देशक सुवास शाही, क्याम्पस प्रमुख योगराज उपाध्यायले सम्मान गरेका थिए ।
You must be logged in to post a comment Login