विराटचोकः सुन्दरहरैंचाका ५० विपन्न परिवारलाई घर बनाउन लुमन्ती, सुन्दरहरैंचा नगरपालिका, सेलाब्रिक र समावेशी महिला बचत तथा ऋण सहकारी संस्थाले सहकार्य गर्ने भएका छन् । घर निर्माण कार्यको शिलान्यास सोमबार सुन्दरहरैंचा नगरपालिकाका प्रमुख केदारप्रसाद गुरागाईँले वडा नम्बर २ को उराव बस्तीमा आयोजित कार्यक्रममा गरे । स्थानीय शान्तिदेवी उरावको घरको शिलान्यास गरेर कार्यक्रमको शुभारम्भ भएको छ ।
शिलान्यास समारोहलाई सम्बोधन गर्दै कार्यक्रमका प्रमुख अतिथि सुन्दरहरैंचा नगरपालिकाका प्रमुख गुरागाईँले घर निर्माणको लागि सम्झौता शुरु भइसकेको बताए । अर्काे वर्ष पनि ५० घर निर्माण हुने तालिका बनाइएको उनले जानकारी दिए । व्यवस्थित घर बनाउन केही रकम थप गर्नुपर्ने भएमा नगरपालिकाले दिन अनुदान थप्न सक्ने गुरागाईँले बताए ।
वडा नम्बर २ का वडाध्यक्ष विवश प्रधानले आफ्नो कार्यकालमा वडा नम्बर २ लाई सधैँ पहिलो वडाका रुपमा देख्न चाहेको बताए । आवास निर्माणको शिलान्यास वडा नम्बर २ बाटै शुरु हुनु खुशीको कुरा बताए । वडा नम्बर २ मा ९ वटा घर बन्ने बताउँदै आगामी वर्ष अहिलेको भन्दा दोब्बर घर निर्माण गर्न वडाले पहल गर्ने उनको भनाइ थियो ।
समावेशी सहकारीकी अध्यक्ष गीता राईले विपन्न वर्गलक्षित सहकारी समावेशी सहकारी भएकाले सो संस्थाले आफ्ना शेयर सदस्यलाई सक्दो सहयोग गर्ने बताइन् ।
लुमन्तीकी फिल्ड संयोजक लक्ष्मी राईले कार्यक्रमबारे जानकारी दिँदै अनुसार नगरपालिकाको पूर्ण सहयोग पाएकाले सन् २०२३ भित्र नगरपालिकामा ५० वटा घर निर्माण गरिने बताइन् । नगरको वडा नम्बर १, २, ७, ११ र १२ मा घर निर्माण गरिने बताइन् । उनका अनुसार लुमन्तीले १ लाख ४० हजार रुपैयाँ र नगरपालिकाले ५० हजार रुपैयाँ सहयोग गर्ने भएका हुन् । घर बनाउन आवश्यक पर्ने बाँकी रकम घरधनी आफैँले बेहोर्नुपर्ने भएको छ । घरधनीले रकम जम्मा गर्न नसकेमा सहकारीले ऋण दिने भएको हो ।
गोदावरी टोल विकास संस्थाका अध्यक्ष शिवनारायण खवासको अध्यक्षतामा भएको कार्यक्रमको सञ्चालन लुमन्तीकी वर्षा निरौलाले गरेकी थिइन् ।
You must be logged in to post a comment Login