विराटनगरः धनकुटा र सुनसरीका छुट्टाछुट्टै स्थानमा भएका सवारी दुर्घटनामा परी ३ जनाको मृत्यु भएको छ भने एक जना घाइते भएका छन् ।

हिजो दिउँसो ३ बजे धनकुटाको महालक्ष्मी नगरपालिका–४ स्थित मुढे–लेगुवा सडक खण्डमा को २ त ७३६ नम्बरको ट्याक्टर अनियन्त्रित भई सडकको भित्तामा ठोक्किई दुर्घटना हुँदा चालकको मृत्यु भएको हो । दुर्घटनामा परी चालक सङ्खुवासभाको मादी नगरपालिका–९ का ३० वर्षीय गुणन विश्वकर्माको घटनास्थलमा नै मृत्यु भएको हो ।

त्यसैगरी, राती पौने ८ बजे सुनसरीको दुहबी नगरपालिका–८ कोशी राजमार्गमा ध. १ ख ६४७ नम्बरको बसले बाटो काट्दै गरेका पैदलयात्रीलाई ठक्कर दिई भएको दुर्घटनामा १ जनाको मृत्यु भएको छ ।

सर्लाहीको मलङ्गवा–७ घई भई पशुपति आइरन फ्याक्ट्रीमा काम गर्दै आएका २८ वर्षीय रवीन्द्र महरालाई ठक्कर दिँदा घाइते भएका महराको उपचारको क्रममा विराट नर्सिङ होम बिराटनगरमा मृत्यु भएको हो ।

त्यस्तै, इटहरी उप–महानगरपालिका–२० कोशी लोकमार्गमा ना. ६ ख १७२४ नम्बरको ट्रकले बा ९४ प ७१६० नम्बरको मोटरसाइकललाई ठक्कर दिँदा घाइते भएकामध्ये १ जनाको मृत्यु भएको हो । दुर्घटनामा मोटरसाइकल चालक खोटाङको केपिलासगढी गाउँपालिका–७ का २९ वर्षीय निशान राई र मोटरसाइकल पछाडि सवार धरान–१५ की २४ वर्षीया जेनिसा राई घाइते भएका थिए । उनीहरुलाई उपचारको लागि बीपी कोइराला स्वास्थ्य विज्ञान प्रतिष्ठान धरान लगिएकोमा जेनिसाको उपचारको क्रममा मृत्यु भएको हो ।

सबै घटनाको सम्बन्धमा सम्बन्धित प्रहरी कार्यालबाट थप अनुसन्धान भइरहेको कोशी प्रदेश प्रहरी कार्यालय विराटनगरले जनाएको छ ।