विराटचोकः इन्द्रपुर जुनियर जेसीजले रन सुन्दरहरैंचा हाफ म्याराथनको आयोजना गर्न लागेको छ । २०८० साल बैशाख १६ गते विराटचोकबाट प्रस्थान गर्ने रूट तय गरिएको जनाइएको छ । म्याराथनलाई राष्ट्रिय तथा अन्तर्राष्ट्रिय क्षेत्रमा थप उचाइमा लैजान तथा स्थानीय पर्यटकीय क्षेत्रको प्रचारप्रसार गर्ने उद्देश्यले आयोजना गर्न लागिएको इन्द्रपुर जुनियर जेसीजका संस्थापक अध्यक्ष तथा कार्यक्रम निर्देशक उत्सव थापाले बताए । मोरङको सुन्दरहरैचामा मङ्गलबार पत्रकार सम्मेलनमार्फत् खेलका बारेमा जानकारी गराइनुका साथै लोगो अनावरण गरिएको हो ।

देशका विभिन्न ठाउँमा रहेका प्रतिभावान युवायुवतीलाई अवसर प्रदान गर्दै सुन्दरहरैंचाको पहिचान बढाउने अभिप्रायले यो कार्यक्रम गर्न लागिएको आयोजकले जनाएको छ । कार्यक्रममा बोल्दै थापाले भने, ‘रन सुन्दरहरैंचा एक अफिसियल हाफ म्याराथन हो । यो पूर्णतः नेपाल एथ्लेटिक्स संघको प्रतिनिधिको मार्ग निर्देशनमा तय भएको कार्यक्रम रहेकाले यसबाट प्रोफेसनल खेलाडीले आफ्नो कलाको एक्सपोजरको रूपमा लिनुहुने छ’, भन्ने आशा राखिएको छ ।

आयोजकका अनुसार खेल ३ वटा विधामा सम्पन्न हुने भएको छ । ५ किलोमिटरसम्म नन प्रोफेसनल स्थानीय शैक्षिक संस्था तथा स्थानीयवासीको सहभागिता रहनेछ भने २१ किलोमिटरसम्म महिला हाफ म्याराथन र २१ किलोमिटर पुरुष हाफ म्याराथन रहने आयोजकले जनाएको छ ।

खेलमा पहिलो हुनेले ४० हजार रुपैयाँ, दोस्रोले १५ हजार र तेस्रो हुनेले ५ हजार रुपैयाँ पाउनेछन् । यस्तै दौड रेकर्ड ब्रेक गर्ने खेलाडीलाई २ हजार ५ सय रुपैयाँ पुरस्कार राखिएको छ । यस्तै नन प्रोफेसनल तर्फ क्रमशः पहिलो, दोस्रो र तेस्रो हुनेलाई ७ हजार, ५ हजार र ३ हजार पुरस्कार राखिएको छ ।

खेलमा सहभागी हुन बैशाख १० गतेसम्म रजिष्ट्रेशन गरिसक्नुपर्ने छ । १६ गते शनिबार बिहान ८ बजेदेखि विराटचोकबाट दौडबाट शुरु हुने भएको छ । कार्यक्रममा विभिन्न क्षेत्रबाट प्रतिष्पर्धा गर्न प्रोफेसनल १ सय जना एथ्लेटिक्स खेलाडी तथा नन् प्रोफेसनल ५ सय जनाले प्रतिष्पर्धा गर्ने अनुमान गरिएको आयोजकले जनाएको छ । कार्यक्रम सम्पन्न गर्न कुल ५ लाख लाग्ने अनुमान गरिएको छ ।

पत्रकार सम्मेलन जुनियर जेसी अध्यक्ष रिकेश भण्डारीको सभापतित्वमा भएको थियो । इन्द्रपुर जेसीजकी अध्यक्ष बिना सुवेदी आचार्यका साथै पूर्व अध्यक्षहरूको कार्यक्रममा उपस्थिति रहेको थियो ।