इटहरीः समाजमा हुने सबै प्रकारका हिंसा अन्त्यका लागि इटहरी उपमहानगरमा महिला जनप्रतिनिधिहरूलाई लैंगिक हिंसा तथा साइबर अपराध समबन्धी एक दिने अभिमुखीकरण कार्यक्रम सम्पन्न गरिएको छ ।
इटहरी उपमहानगरको आयोजना र भ्वाइस अफ चिल्ड्रेनको समन्वयमा उपमहानगरका २० वटै वडाका महिला जनप्रतिनिधिहरूको सहभागितामा अभिमुखीकरण कार्यक्रम गरिएको हो ।
लोकतन्त्र स्थापनापछि महिला हक अधिकारबारे थुप्रै कानुनहरू बनेर कार्यान्वयन भइरहेको बेला धेरै जसोलाई कानुनको ज्ञान नभएको अभिमुखीकरणमा बताइयो । लैंगिक हिंसासँगै पछिल्लो समय साइबर अपराध पनि त्यत्तिकै बढिरहेको बेला महिला जनप्रतिनिधिहरूलाई यस विषयमा चासो राख्न कार्यक्रममा सुझाव दिइएको थियो ।
ग्रामीण क्षेत्रका महिलाहरूलाई विवाहपछि आफूले पाउने अधिकार अझै पनि थाहा नभएको र कानुन सम्बन्धी केही ज्ञान नभएकाले २० वटै वडाका महिला जनप्रतिनिधिहरूलाई एकै ठाउँमा राखेर सो सम्बन्धी अभिमुखीकरण गराइएको भ्वाइस अफ चिल्ड्रेनकी कार्यक्रम अधिकृत लीला भुजेलले बताइन् ।
कार्यक्रमलाई अधिवक्ता सरोजकुमार गिरीले सहजीकरण गरेका थिए । कार्यक्रममा इटहरी उपमहानगरका २० वटै वडाबाट २५ भन्दा बढी महिला जनप्रतिनिधिहरूको सहभागिता रहेको थियो । कार्यक्रम इटहरी उपमहानगका कार्यवाहक मेयर दिवस पोख्रेलले उदघाटन गरेका थिए । उपमहानगरकै सामाजिक शाखाकी प्रमुख भोजकला दवाडीको अध्यक्षतामा सम्पन्न कार्यक्रममा इटहरी उपमहानगरपालिका सामाजिक शाखा अधिकृत सुशीला कार्की, भ्वाइस अफ चिल्ड्रेनका प्रकाश परियार लगायतको सहभागिता रहेको थियो ।
You must be logged in to post a comment Login