विराटचोकः सुन्दरहरैँचा नगरपालिका वडा नम्बर २ को सार्वजनिक सुनुवाई सम्पन्न भएको छ । बुधबार वडा कार्यालयको प्राङ्गणमा आयोजित कार्यक्रममा स्थानीयले वडाबाट भए गरेका गतिविधि, विकास निर्माण, योजना सञ्चालन लगायतका विषयमा चासो राखेका थिए ।

खासगरी मृगौलियाको समस्याको रुपमा रहेको खानेपानीका विषयमा नागरिकको चासो थियो । ९ वर्ष अघि खानेपानी ट्याङ्की बने पनि सञ्चालन नहुनुको कारणका विषयमा सो आयोजनाका अध्यक्षमाथि स्थानीयले प्रश्न गरेका थिए । संस्थाका अध्यक्ष रामचन्द्र माझीले पाइप लगाउने कार्य चाँडै हुने र यो आयोजना सञ्चालन गर्न सकिने बताउँदै स्थानीय सरकारले साझेदारी गर्नुपर्ने बताएका थिए ।

वडा अध्यक्ष विवश प्रधानले खानेपानी उपभोक्ता समितिको यो पुरानो समिति भएकाले त्यसबाट काम नहुने बताउँदै नयाँ समिति चयन गरेर योजनालाई सफल बनाउनुपर्ने धारणा राखेका थिए ।

सहभागी सुरेन्द्र बस्नेतले दुई खाले शिक्षा सञ्चालन भएकाले यसलाई हटाउन सुझाव दिएका थिए । सामुदायिक विद्यालयमा पैसा तिरेर पढ्ने र नतिरी पढ्ने गरेकाले यसले समस्या ल्याएको उनको भनाइ थियो । यस्तै इशान राईले आफ्नो ठाउँ चिनाउने खालका योजनालाई प्राथामिकता दिनुपर्ने बताएका थिए ।

‘हामी अन्यन्त्र गयौँ भने विराटनगर, सलकपुर भन्ने गरेको पाइन्छ’, उनले भने, ‘हामीले मृगौलिया भनेर भन्न सक्ने खालको बनाउनुपर्छ ।’ कार्यक्रममा हर्कमान पाहिम, सुमन दुलाललगायतले प्रश्न गरेका थिए ।

वडाध्यक्ष प्रधानले आगामी आर्थिक वर्षको बजेट केही घटेर आउने भएता पनि सबैको सुझव अनुसार कार्यक्रम गरिने बताए ।

कार्यक्रममा वडा सचिव गुणनिधि दाहालले चालु आर्थिक वर्षमा भएका योजना, सामाजिक सुरक्षा, पञ्जीकरण राजस्व लगायतको प्रगति विवरण प्रस्तुत गरेका थिए । सामाजिक सुरक्षातर्फ ७ सय १७ जना लाभग्राहीले सेवा लिइरहेको उनले बताएका थिए ।

यस्तो थियो वडा सचिव दाहालले प्रस्तुत गरेको विवरणः
सामाजिक विकाससम्बन्धी वडामा १२ वटा कार्यक्रमको सम्झौता भएकोमा ८ वटा कार्यक्रमको भुक्तानी भइसकेको, २ वटा कार्यक्रमको भुक्तानी हुन बाँकी रहेको र २ वटा कार्यक्रम हुँदै गरेको उनले जानकारी दिए ।

त्यस्तै, जेठ १८ गतेसम्ममा १५ लाख ६३ हजार ९ सय ५ रुपैयाँ सम्पत्ति कर सङ्कलन भएको र सोही अवधिसम्ममा थप ३५ लाख ९० हजार ८ सय ९५ रुपैयाँको नगद गरी ५१ लाख ५४ हजार ८ सय १ रुपैयाँको वित्तीय कार्यप्रगतिको अवस्था रहेको वडा सचिव दाहालले वडावासीलाई जानकारी दिए ।

सेवा प्रवाहतर्फ ७७५ वटा घरबाटो सिफारिश, ६०३ वटा चार किल्ला सिफारिश, ३३५ नाता प्रमाणित, ५०७ नागरिकता सिफारिश, ६ व्यवसाय दर्ता सिफारिश, ५ घरनक्सा सिफारिश, १७० जन्मदर्ता, ४६ मृत्युदर्ता, ८७ विवाहदर्ता, १६० बसाइँसराइँ, ६ सम्बन्ध विच्छेद र ६९० अन्य सिफारिश गरिएको वडा सचिव दाहालले जनाए ।

त्यस्तै, सामाजिक सुरक्षा भत्ता लिने लाभाग्राहीको संख्या ७१७ जना रहेकोमा सबैभन्दा धेरै ज्येष्ठ नागरिक रहेको उनले तथ्याङ्क प्रस्तुत गरे । दलित ज्येष्ठ नागरिक २० जना, एकल महिला ५९ जना, विधवा महिला ९९ जना, पूर्ण अपाङ्ग २८ जना, अति अशक्त अपाङ्ग ३९ जना र दलित बालबालिका २० जना रहेको उनले जानकारी दिए ।

वडा सचिव दाहालले वडामा हुँदै गरेका भौतिक विकासतर्फका थप १३ वटा आयोजनाको पनि प्रगति विवरण प्रस्तुत गरेका थिए ।

कार्यक्रमको सहजीकरण विराट मिडिया एण्ड एडभरटाइजिङ प्रालिले गरेको थियो । कार्यक्रमको अध्यक्षता वडाध्यक्ष प्रधानले गरेका थिए भने सहजीकरण ज्ञाननाथ ढकालले गरेका थिए ।

कार्यक्रममा जनप्रतिनिधि कर्मचारी, विभिन्न राजनीतिक दलका व्यक्ति लगायत सरोकारवला निकायका प्रतिनिधि, स्थानीयवासी र सञ्चारकर्मीको उल्लेख्य उपस्थिति रहेको थियो ।