काठमाडौंः प्रतिनिधि सभा सदस्य डा. सुनिल शर्माले डाक्टरको उत्पादन बढाएर पनि देशलाई समृद्ध बनाउन सकिने भएकाले त्यसतर्फ ध्यान दिन सरकारको ध्यानाकर्षण गराएका छन् ।

बिहीबार प्रतिनिधि सभा बैठकमा बोल्दै सांसद शर्माले डाक्टर उत्पादन बढाएर विश्व बजारमा पठाउन सके छिटै मुलुकलाई समृद्ध बनाउन सकिने धारणा राखेका हुन् ।

क्युबा र बंगलादेशले डाक्टर उत्पादन गरेर विश्व बजारमा पठाई वार्षिक खरबौं पैसा देशमा भित्र्याइरहेको उदाहरण दिँदै सांसद शर्माले नेपालले पनि यसबाट पाठ सिक्नुपर्ने तर्क गरे ।

नेपालभन्दा ७५ प्रतिशत कम जनसंख्या भएको देश क्युबाले ५० हजार डाक्टर उत्पादन गरेर अमेरिका, क्यानडा, युके, फ्रान्स लगायतका देशमा पठाई वार्षिक १४ खर्ब रुपैयाँ देशमा भित्र्याइरहेको तथ्यांक सांसद शर्माले प्रस्तुत गरे । लाखौं युवाहरु मजदुरी गर्न खाडी मुलुक गइरहेको अवस्थामा देशमा डाक्टर, इन्जिनियरसहितका दक्ष जनशक्ति उत्पादन गरेर विश्वबजारमा पठाउन सके १० वर्षभित्रै मुलुकको आर्थिक विकासले फड्को मार्ने सांसद शर्माको आँकलन छ ।

‘क्युबा, बंगलादेश जस्ता मुलुकले डाक्टर उत्पादन गरेर विश्व बजारमा पठाई बार्षिक खरबौं पैसा देशमा भित्र्याइरहेका छन्, ’सभामुखमार्फत् अर्थमन्त्रीको ध्यानाकर्षण गराउँदै सांसद शर्माले भने, ‘विश्व बजारमा बेच्न सकिने हाइड्रोपावर भन्दा पनि हटकेकको रुपमा यो क्षेत्र छ, मुलुकलाई समृद्ध बनाउन सरकारले यो विषयमा ध्यान दिओस् ।’

बजेटले, विपन्न र पछाडि परेका क्षेत्रका विद्यार्थीलाई मेडिकल, इन्जिनियरिङ जस्ता राम्रो शिक्षा पढ्न केही सहजीकरण नगरेको भन्दै उनले असन्तुष्टि जनाए । सरकारी अस्पतालमा मात्र स्वास्थ्य बीमाको उपचार हुने भनेर सरकारले बीमामा पनि व्यापार गरेको भन्दै सांसद शर्माले आक्रोश पोखे । विभिन्न बाहनामा मेडिकल कलेजमा सिट संख्या कटौती गर्ने गरिएको प्रति पनि सांसद शर्माले आपत्ति जनाएका छन् ।