विराटनगरः कोशी प्रदेश प्रहरी प्रमुख प्रहरी नायब महानिरीक्षक राजेशनाथ बास्तोलाले आर्थिक वर्ष २०७९÷०८० को वार्षिक कार्य सम्पादन समीक्षा प्रगति विवरण सार्वजनिक गरेका छन् ।

सङ्गठन प्रमुख प्रहरी महानिरीक्षक र प्रदेश प्रहरी प्रमुख प्रहरी नायव महानिरीक्षक तथा प्रदेश प्रहरी प्रमुख र प्रदेशका १४ वटै जिल्लाका प्रहरी प्रमुखहरु बीच कार्य सम्पादन सम्झौता तथा कोशी प्रदेश प्रहरीद्वारा सञ्चालित प्रदेश सुरक्षा सुनिश्चितता अभियान सञ्चालन भएका थिए । ती अभियानमा प्रभावकारी रुपमा प्रहरी परिचालन भई कार्यान्वयन हुँदा यस आर्थिक वर्षमा ८ हजार भन्दा बढी मुद्धा दर्ता, २ हजार ७ सय ७३ फछर््योट र ५२ करोड भन्दा बढी राजस्व सङ्कलन भएको हो ।

समाजमा हुने आपराधिक घटना, फैसला कार्यान्वयन, भन्सार चोरी निकासी, नदीजन्य पदार्थ, अवैध दोहन, अवैध काठ चोरी निकासी र ट्राफिक व्यवस्थापनमा प्रभावकारी रुपमा प्रहरी परिचालन भएअनुसार उल्लेख्य मात्रामा सफलता हासिल भएको हो । यस आर्थिक वर्षमा ८ हजार ७ सय १९ वटा विभिन्न अपराधसम्बन्धी मुद्दा दर्ता भई कानुनी कारवाही भइरहेको तथा फैसला कार्यान्वयनतर्फ विभिन्न अपराधमा सजाय तथा जरिवाना फैसला भई फरार रहँदै आएका १ हजार ४ सय ६६ जना फरार प्रतिवादीहरु पक्राउ गरी ९ सय ४३ वर्ष ७ महिना २ दिन कैद र ४ करोड २४ लाख १२ हजार ३ सय २२ रुपैयाँ राजस्व सङ्कलन भएको छ ।

यसैगरी, भन्सार चोरी निकासीतर्फ अवैध रुपमा सामान चोरी निकासी गर्ने १ सय जना मानिस पक्राउ गर्नुका साथै २६ करोड ९८ लाख ३८ हजार ९ सय ८० रुपैयाँ राजस्व सङ्कलन भएको छ । नदीजन्य पदार्थको अवैध रुपमा दोहन गर्ने ७४ जना मानिस र ३ सय ३३ वटा सवारी साधनलाई पक्राउ गर्नुका साथै ३९ लाख २८ हजार ५ सय ३५ रुपैयाँ राजस्व सङ्कलन भएको छ ।

यसैगरी, अवैध काठ चोरी निकासी गर्ने ३८ जना मानिस पक्राउ गर्नुका साथै ५ हजार ९ सय ६१ क्यू.फिट. काठ बरामद गरी १ करोड ३१ लाख ४५ हजार ३ सय ५७ रुपैयाँ राजस्व सङ्कलन भएको छ ।

ट्राफिक नियम उल्लङ्घन गर्ने ३ लाख १ हजार ७ सय ४९ वटा सवारी साधनलाई कारवाही गर्दा २३ करोड ४८ लाख ६६ हजार रुपैयाँ राजस्व सङ्कलन भएको छ ।

लागूऔषध नियन्त्रणतर्फ गाँजा ५ हजार ८ सय १५ केजी ४ सय ९२ ग्राम ७ सय मिलिग्राम, अफिम २७ ग्राम ६८ मिलिग्राम, ब्राउन सुगर २ केजी ७९ ग्राम ८ सय ४९ मिलिग्राम, विभिन्न मनोद्दीपक क्याप्सुल २७ हजार ६ सय १८, मनोद्दीपक एम्पुल १० हजार १ सय ७५ र मनोद्दीपक औषधीहरु ३ सय १७ क्याप्सुल नियन्त्रण गरिएको र १ हजार ७ सय ६३ रोपनी क्षेत्रफलमा लगाएको ६ लाख ७५ हजार ३ सय १४ बोट गाँजा नष्ट गरिएको छ ।

गत आर्थिक वर्षमा ५२ करोड १७ लाख ७८ हजार ८ सय ७२ रुपैयाँ राजस्व सङ्कलन भएको छ । समुदाय प्रहरी साझेदारी कार्यक्रम अन्तर्गत प्रदेशभरी विभिन्न किसिमका सचेतनामूलक कार्यक्रमहरु गरिएको कोशी प्रदेश प्रहरी कार्यालय विराटनगरले जनाएको छ ।

कार्यालयका अनुसार गत आर्थिक वर्षमा साईबर अपराध, आत्महत्या न्यूनीकरण, ट्राफिक सचेतना, घरेलु हिंसा, महिला हिंसा, मानव बेचबिखन लागूऔषध दुर्व्यसन लगायत ३६ हजार ८ सय ८१ स्थानमा विभिन्न जनचेतनामूलक कार्यक्रमहरु सञ्चालन गरिएको थियो ।

ती कार्यक्रमबाट १० लाख ३१ हजार ३ सय ५१ जना भन्दा बढी नागरिकहरु लाभान्वित भएको कार्यालयले पत्रकार सम्मेलन मार्फत सार्वजनिक गरेको हो ।