विराटचोकः नेपाली कांग्रेस मोरङको प्रथम ऐतिहासिक जिल्ला सम्मेलन हिजो विराटचोकमा सम्पन्न भएको छ । सम्मेलनमा प्रमुख अतिथिको रुपमा नेपाली कांग्रेसका केन्द्रीय सदस्य डा. शेखर कोइराला उपस्थित थिए ।

सम्मेलनलाई सम्बोधन गर्दै डा. कोइरालाले नैतिक शक्ति र आत्मविश्वास गुमाएपछि निराशातिर कार्यकर्ता जाने हुनाले नेतृत्वले नैतिक शक्ति र आत्मविश्वास गुमाउन नहुने बताए ।

अर्का केन्द्रीय सदस्य डाक्टर मीनेन्द्र रिजालले पार्टीमा पुनर्जागरण आवश्यक रहेको बताए । बिपी कोइरालाले स्थापना गरेको पार्टी सोही गतिमा अगाडि बढ्नुपर्ने बताए ।

कांग्रेसको जनाधार कमजोर बन्दै गएको छ । बिपीको जस्तो पार्टी बनाउन सके जनता आफै आकर्षित हुने उनको भनाइ थियो । कांग्रेसले आफूले आफैँलाई विश्वास गर्याे भने जनताले पत्याउने हुनाले कांग्रेसले आत्मविश्वास गुमाउन नहुने उनको भनाइ थियो ।

सम्मेलनमा ३ हजार ५ सय ५५ जना क्षेत्रीय प्रतिनिधि सहभागी थिए । सम्मेलनमा राजनीतिक, साङ्गठानिक र आर्थिक प्रतिवेदन प्रस्तुत गरिएको थियो ।

कोशी प्रदेशका मुख्यमन्त्री केदार कार्कीले वर्तमान सरकार संविधानको सदुपयोग गरेर गठन भएको बताए । केही भएन भनेर निराशा बाँड्ने र उट्पट्याङ कुरा गर्नेको भीडले कांग्रेसलाई बन्धक बनाउन खोजेको उनको भनाइ थियो ।

कोशी प्रदेशसभामा आफूले गरेको विद्रोहलाई अस्वीकार गर्ने बताएका नेताहरू प्रति लक्षित गर्दै उनले भने, ‘कोशीमा विद्रोह गरेको सरकार होइन संविधानको सदुपयोग गरेको सरकार हो ।

कार्की संविधानको धारा १६८ को उपधारा ५ अनुसार बहुमत प्रदेश सभा सदस्यको समर्थनमा मुख्यमन्त्री चयन भएका थिए । ९३ सदस्यीय प्रदेशसभामा काँग्रेसका ८ र नेकपा एमालेका ३९ सांसदको समर्थनमा उनी मुख्यमन्त्री चयन भएका हुन् । कांग्रेसले संस्थागत रूपमा माओवादी केन्द्रका सांसद इन्द्रबहादुर आङ्बोलाई मुख्यमन्त्री बनाउने निर्णय गरेपछि उनी एमालेलगायतका अन्य दलको समर्थनमा मुख्यमन्त्री नियुक्त भएका थिए । उनले विश्वासको मत पाइसकेका छन् ।

प्रदेश कार्यसमिति उपाध्यक्ष एवम् राष्ट्रिय सभा सदस्य रमेशजंग रायमाझीले कांग्रेसको जिल्ला सम्मेलनको ब्यानरमा पार्टी अध्यक्षको तस्बिर नभएकोमा आपत्ति प्रकट गरे । उनले आपत्ति प्रकट गर्दै गर्दा ब्यानरमा पार्टी अध्यक्ष शेरबहादुर देउबाको तस्बिर टाँसिदै थियो ।

कोशी प्रदेशका मुख्यमन्त्री उद्धव थापाले आफू मुख्यमन्त्री हुँदा २ अंकको रोचक संयोग भएको सुनाए । २ मतले आफू पराजित भएको, २ महिनामा २ पटक मुख्यमन्त्री भएको र २ महिनामा पूर्व मुख्यमन्त्री भएको उनले उल्लेख गरे । नेपाली राजनीतिमा २ महिनामा २ पटक मुख्यमन्त्री हुने र २ महिनामै पूर्व मुख्यमन्त्री हुने अवसर अरुले शायद नपाउने हुनाले आफूलाई गर्व महसुस भएको र कांग्रेसले पनि यसमा गर्व गर्नुपर्ने उनको भनाइ थियो ।

सांसद डा. सुनिल शर्माले हामी कसैको एक रुपैयाँ पनि खाँदैनौँ भन्ने सन्देश कांग्रेसले व्यवहारमा उतार्न सके कांग्रेसले कसैसँग गठबन्धन नगरी एक्लै चुनाव लड्न सक्ने हिम्मत राख्ने बताए ।
कार्यक्रममा महेश आचार्य केन्द्रीय सदस्यहरु डा. डिला संग्रौला, अमृत अर्याल, भीम पराजुलीलगायतले शुभकामना मन्तव्य राखेका थिए ।