अर्थ
कनकलक्ष्मीको स्थापना दिवसमा सम्मानै सम्मान
विराटचोकः ९ वटा सहकारी संस्था एकीकृत भएर बनेको कनकलक्ष्मी बचत तथा ऋण सहकारी संस्थाले चौथो स्थापना दिवसको अवसर पारेर विभिन्न व्यक्तिलाई सम्मान गरेको छ । आइतबार सुन्दरहरैंचा ३ स्थित रणकाली मन्दिरको सभाहलमा कार्यक्रमको आयोजना गरी संस्थाले २८ जना व्यक्ति र एउटा समूहलाई सम्मान गरेको हो ।
संस्थाले सहकारीकर्मी घनश्याम खतिवडा र स्व. कृष्णप्रसाद दाहाललाई सम्मान गरेको छ । फँडानी साकोस लेटाङका पूर्व अध्यक्ष खतिवडा बचत तथा ऋण केन्द्रीय सहकारी संघका पूर्व सदस्य, महासचिव र सल्लाहकार हुन् । २०४९ सालमा गाविस अध्यक्ष भएका उनी २०७४ सालमा प्रतिनिधि सभा सदस्यमा निर्वाचित भए ।
त्यस्तै, कृष्णप्रसाद दाहाल कनकलक्ष्मी बचत तथा ऋण सहकारी संस्थाका प्रस्तावित अध्यक्ष हुन् । ९ वटा संस्था एकीकृतको अन्तिम तयारी भइसकेपछि सवारी दुर्घटनामा निधन भएका दाहाल कनकलक्ष्मीमा एकीकृत भएको सुन्दरपुर बचत तथा ऋण सहकारी संस्थाका संस्थापक सदस्य थिए । सो संस्थाको लेखा सुपरीवेक्षण समिति संयोजक हुँदै सञ्चालक समिति अध्यक्ष भएका दाहाल क्रियाशील सहकर्मीको रुपमा परिचित थिए । दुलारी पञ्चायतको गा.स.स हुनुका साथै सुन्दरपुर गाविसको २ कार्यकाल अध्यक्ष भएका दाहालको सम्मान पत्नी राधा दाहालले ग्रहण गरेकी थिइन् ।
उनीहरुलाई दोसल्ला र ताम्रपत्रले सम्मान गरिएको थियो ।
त्यस्तै, संस्थाले ५ जना ज्येष्ठ सदस्यलाई सम्मान गरेको थियो । सम्मानित हुनेमा सुन्दरहरैंचा ७ की ८९ वर्षीया राधादेवी पोखरेल, सुन्दरहरैंचा ४ का ८९ वर्षीय डम्बरबहादुर पौडेल, सुन्दरहरैंचा ३ की ८८ वर्षीया विष्णुमाया भण्डारी, सुन्दरहरैंचा ४ की ८८ वर्षीया रेनुकादेवी घिमिरे र सुन्दरहरैंचा ७ की ८७ वर्षीया बालकुमारी श्रेष्ठ रहेका थिए ।
उनीहरुलाई दोसल्ला, सम्मानपत्र र नगद १ हजार ५ सय ले सम्मान गरिएको थियो ।
विद्यावारिधी उपाधि प्राप्त गर्ने संस्थाका २ जना शेयर सदस्यलाई कार्यक्रममा सम्मान गरिएको थियो । सुन्दहरैंचा १२ का मोहनबहादुर तुम्बाहाङ लिम्बू र सुन्दरहरैंचा ३ का गणेशराज अधिकारी सम्मानित भएका हुन् । उनीहरुलाई दोसल्ला ओढाई सम्मान पत्र प्रदान गरिएको थियो ।
त्यस्तै असल ऋण कारोबार गर्ने ४६ जना ऋणीमध्ये गोलाप्रथाबाट ५ जनालाई सम्मानपत्र र १ हजार ५ सय रुपैयाँले सम्मान गरिएको थियो । कार्यक्रममै ५ वर्षीय बालकद्वारा ५ जना ऋणीको नाम गोलामार्फत् तानिएको थियो ।
बढी रेमिट कारोबार गर्ने २ जनालाई सम्मान पत्र र नगद १ हजार ५ सय प्रदान गरिएको थियो । सुन्दरहरैंचा ६ का साबित्रा विश्वकर्मा र फुर्लामु शेर्पा तामाङले सो सम्मान पाएका थिए ।
धेरै लाभांश प्राप्त गर्ने सदस्यहरुलाई पनि नगद १ हजार ५ सय र सम्मानपत्र प्रदान गरिएको थियो । सुन्दरहरैंचा ६ का चिरञ्जीवी रेग्मी र ओमप्रसाद न्यौपानेलाई सो सम्मान प्रदान गरिएको थियो ।
अधिक संरक्षित पूँजी फिर्ता गर्ने ४ जना शेयर सदस्य पनि वार्षिक उत्सवमा सम्मानित भएका थिए । उनीहरुले नगद १ हजार ५ सय र सम्मान पत्र पाए । यस्तो सम्मान सुन्दरहरैंचा ८ का इन्द्रप्रसाद न्यौपाने, सुन्दरहरैंचा ९ का गोविन्दप्रसाद अधिकारी, सुन्दरहरैंचा ६ का ओमप्रसाद अधिकारी र सुन्दरहरैंचा ५ का लल्कु चौधारीले पाए ।
सहकारीका ३५ वटा लघुवित्त समूहमध्ये उत्कृष्ट लघुवित्त समूहको रुपमा घोषित हुँदै गोदावरी महिला समूह सुन्दरहरैंचा ६ ले सम्मान पत्र र नगद ४ हजार रुपैयाँ प्राप्त गरेको थियो ।
शेयर सदस्यका सन्तान वा शेयर सदस्य स्वयम्मध्ये कक्षा १२ को परीक्षामा उत्कृष्ट अंक ल्याउने ६ जनालाई कदर पत्र र नगद १ हजार ५ सय प्रदान गरिएको थियो ।
सुन्दरहरैंचा १२ का शेयर सदस्य गणेशप्रसाद आचार्यकी छोरी चाहना आचार्य, सुन्दरहरैंचा १२ की दुर्गा रायमाझीका छोरा ईशान खुलाल, सुन्दरहरैंचा ५ की गीता भट्टराईका छोरा संस्कार भट्टराई, सुन्दरहरैंचा ३ का टोलनाथ काफ्लेकी छोरी स्वीकृति काफ्ले, सुन्दरहरैंचा ३ का डाइमण्ड बरुवाल र सुन्दरहरैंचा ५ का किरण बजगाईकी छोरी शैली बजगाईँले सो सम्मान पाएका थिए ।
संस्थाका संस्थापक अध्यक्ष अर्जुनराज अधिकारीले कार्यक्रमको औचित्यमाथि प्रकाश पारेका थिए । सञ्चालक समिति उपाध्यक्ष मातृकाप्रसाद ढकालले स्वागत मन्तव्य राखेको कार्यक्रम सचिव अर्जुनकुमार तिम्सिनाले सञ्चालन गरेका थिए ।
सञ्चालक समितिका अध्यक्ष नागेश पोखरेलको अध्यक्षतामा भएको कार्यक्रममा प्रमुख अतिथि राष्ट्रिय सहकारी महासंघ नेपालका अध्यक्ष मीनराज कँडेल प्रमुख अतिथि र जिल्ला समन्वय समिति मोरङका प्रमुख अजम्बर राई विशिष्ट अतिथि रहेका थिए ।
संस्था स्थापना दिवसको अवसर पारेर सञ्चालनमा ल्याइएको मोबाइल बैंकिङ सेवा पनि कार्यक्रममा सार्वजनिक गरिएको थियो ।
Facebook Comment
नेपाल आयल निगमले डिजेल र मट्टीतेलको भाउ बढाएको छ भने हवाई इन्धनको घटाएको छ । डिजेल, मट्टीतेलको साविकको खुद्रा बिक्री मूल्यमा प्रतिलिटर तीन रूपैयाँ बढेको हो ।
त्यस्तै हवाई इन्धन (आन्तरिक) तर्फ एक रूपैयाँ र अन्तर्राष्ट्रियतर्फ प्रतिकिलोलिटर अमेरिकी डलर ७ ले घटेको छ । अब चारआली, विराटनगर, वीरगन्ज, जनकपुर, अमलेखगन्ज, भलवारी, नेपालगन्ज र धनगढी क्षेत्रमा डिजेल–मट्टीतेलको भाउ प्रतिलिटर १ सय ३६ रुपैयाँ ५० पैसा पर्नेछ ।
यस्तै सुर्खेत र दाङ क्षेत्रमा प्रतिलिटर १ सय ३८ रूपैयाँ तथा काठमाण्डौ, पोखरा र दिपायल क्षेत्रमा डिजेल–मट्टीतेलको भाउ प्रतिलिटर १ सय ३९ रूपैयाँ पर्नेछ । हवाई इन्धन आन्तरिकतर्फ प्रति लिटर १ सय २८ रूपैयाँ कायम भएको छ ।
अन्तर्राष्ट्रियतर्फ प्रति किलोलिटर काठमाण्डौमा अमेरिकी डलर ९ सय ६६, पोखरामा ७ सय ४५ र भैरहवामा ७ सय ३३ तोकिएको छ ।
मोरङको सुन्दरहरैँचा नगरपालिका–८, सलकपुरमा स्थापना गरिएको शिल्पी नाट्य केन्द्र शनिबारदेखि औपचारिक रूपमा सञ्चालनमा आएको छ। नयाँ नाटक ‘छुटेका सपना’ को पहिलो मञ्चनसँगै स्थानीय स्तरमै रंगमञ्चको नयाँ गन्तव्य थपिएको हो। नगरप्रमुख केदारप्रसाद गुरागाईं र नाटकका परिकल्पनाकार तथा निर्देशक युवराज घिमिरेले संयुक्त रूपमा मसाल बालेर नाट्य केन्द्रको उद्घाटन गर्नुभएको थियो।
शिल्पी नाट्य केन्द्रले निर्माण गरेको यो स्थानलाई आगामी दिनमा भुल्के एम्फी थिएटरका रूपमा विस्तार गर्दै कला र संस्कृतिको केन्द्र बनाउने योजना अघि सारिएको छ। उद्घाटनकै दिन मञ्चन गरिएको नाटक हेर्न दर्शकको उल्लेख्य सहभागिता देखिएको थियो, जसले सलकपुरमा रंगमञ्चप्रतिको बढ्दो आकर्षणलाई स्पष्ट पारेको छ।
नाटक ‘छुटेका सपना’ ले समाजमा व्याप्त राजनीतिक, सामाजिक तथा प्रशासनिक विकृतिलाई व्यङ्ग्यको माध्यमबाट प्रस्तुत गरेको छ। भ्रष्टाचार, ढिलासुस्ती, बेथिति र गरिबीका कारण किसानले भोग्नुपरेका दुःख–पीडालाई कलाकारहरूले सशक्त अभिनयमार्फत जीवन्त बनाएका छन्।
नाटकमा संगीता उराँव, सुशिला लुहार, सम्पदा थुलुङ राई, इच्छा सिंह, कञ्चन दास, पवित्रा खड्का, अनुप तिमिल्सिना, ज्याक डी.सी. बराल, गोविन्द ओली, सुमित भण्डारी, धनराज सुनार, रविन परियार, झकेन बी.सी. र उत्सव काकीं लगायत कलाकारहरूको अभिनय रहेको छ।
कार्यक्रममा कवि कुमार नगरकोटीले कविता वाचन गर्दै सांस्कृतिक माहोल थप जीवन्त बनाउनु भएको थियो। निर्देशक घिमिरेले शिल्पी नाट्य केन्द्रलाई आफ्नो दीर्घकालीन सपनाको सुरुआतका रूपमा व्याख्या गर्दै आफू जन्मेको स्थानलाई नै पहिचानयुक्त नाट्य गन्तव्य बनाउने लक्ष्य रहेको बताउनुभयो। आम मानिस एउटै ठाउँमा बसेर कला अनुभूति गर्न सकून् भन्ने सोचका साथ एम्फी थिएटर निर्माण गरिएको उहाँको भनाइ छ।
नाट्य केन्द्रलाई नाफामुखी भन्दा पनि सामाजिक चेतना अभिवृद्धि गर्ने अभियानका रूपमा अघि बढाइने स्पष्ट पार्दै घिमिरेले प्रत्येक दुई–दुई महिनामा नयाँ कार्यक्रम ल्याइने योजना रहेको जानकारी दिनुभयो। स्थानीय कला, संस्कृति र सिर्जनालाई मञ्च दिने उद्देश्यसहित सलकपुरबाट सुरु भएको यो प्रयासले पूर्वी नेपालमा रंगमञ्चको नयाँ सम्भावना खोल्ने अपेक्षा गरिएको छ।
अहिले पश्चिमी वायुको आंशिक प्रभाव रहेको जल तथा मौसम पूर्वानुमान महाशाखाले जनाएको छ । कोशी र मधेश प्रदेशका केही ठाउँमा हुस्सु लागेको छ भने कोशी प्रदेशलगायत देशका पहाडी तथा हिमाली भू–भागमा आंशिक बादल लागेको छ ।
महाशाखाका अनुसार आज दिउँसो कोशी र गण्डकी प्रदेशका उच्च पहाडी तथा हिमाली भागका एक/दुई ठाउँमा हल्का वर्षा र हिमपातको सम्भावना छ भने तराई भेगमा हुस्सु लाग्ने छ । काठमाण्डौ पनि हल्का कुहिरो लागे पनि हिजोजस्तो बाक्लो छैन ।
कोशी, बागमती र गण्डकी प्रदेशका उच्च पहाडी तथा हिमाली भागमा आंशिक बादल लाग्नेछ भने बाँकी भू–भागमा मुख्यतया मौसम सफा रहने छ ।
हिमपात र वर्षाका कारण दैनिक जनजीवन, पर्यटन, स्वास्थ्य तथा हवाई तथा सडक यातायातमा प्रभाव पर्ने भएकाले सम्बन्धित सबैलाई आवश्यक सतर्कता अपनाउन महाशाखाले अनुरोध गरेको छ ।
-
अर्थ6 years agoसमाचारमार्फत् आफ्नो चरित्रहत्या गरिएको भन्दै कानेपोखरीका युवा व्यवसायीले गरे पत्रकार सम्मेलन
-
Banner4 years agoसाउनदेखि कुन तहका कर्मचारीको कति तलब ?
-
खेलकुद6 years agoरंगशालाको अवलोकन
-
मुख्य6 years agoशेयर बजारमा झिनो अंकको गिरावट
-
अर्थ6 years agoगोर्खा डिपाटमेन्ट स्टोर विराटचोकलाई ५० हजार जरिवाना
-
मुख्य6 years agoसुन्दरहरैंचामा चोरले बोरामा हालेर लादैं गरेको बच्चालाई आमाले खोस्न सफल
-
मुख्य6 years agoपुस १० गते खण्डग्रास सूर्यग्रहण लाग्ने भएकाले मोरङका संस्थागत विद्यालय बिदा
-
Banner6 years agoगोठगाउँमा पूर्वाञ्चल विश्वविद्यालय सर्ने, गोठगाउँमा आज साँझ दीप प्रज्वलन गरिने
You must be logged in to post a comment Login