विराटचोकः नेपाल स्टक एक्सचेन्ज (नेप्से) मा मंगलबार त्रिशुली जलविद्युत कम्पनीको आइपीओ सूचीकृत भएको छ । कम्पनीको चुक्ता पूँजीका आधारमा कायम भएको १ करोड ८५ लाख २५ हजार कित्ता शेयर सूचीकृत भएको हो ।

नेप्सेले यसको पहिलो कारोबारका लागि प्रतिकित्ता ८९.३८ रुपैयाँदेखि २६८.१४ रुपैयाँसम्म ओपनिङ रेन्ज तोकेको छ । आज स्पेसल प्रि ओपनिङ सेसनमा अर्डर म्याच भएमा सोही रेन्जभित्र रहेर पहिलो कारोबार हुनेछ । पहिलो कारोबारलाई आधार मानेर नियमित कारोबार हुनेछ । शेयर कारोबारका लागि ‘टीभीसीएल’ संकेत तोकिएको छ ।

त्रिशुली जलविद्युत कम्पनीको आइपीओ ‘जनताको जलविद्युत कार्यक्रम’ अन्तर्गत जारी भएको थियो । यसमा कर्मचारीसहित सर्वसाधारणको हिस्सा २० प्रतिशत र संस्थापक शेयरधनीको हिस्सा ८० प्रतिशत रहेको छ ।

कम्पनीले रसुवा र नुवाकोटको सिमानामा ३७ मेगावाट क्षमताको माथिल्लो त्रिशूली– ३ बी जलविद्युत आयोजना निर्माण गरिरहेको छ ।

तत्कालीन प्रधानमन्त्री केपी शर्मा ओलीले कम्पनीको आईपीओमा १० हजार कित्ता आवेदन दिएर जनताको जलविद्युत कार्यक्रमको शुभारम्भ गरेका थिए ।

कम्पनीले २०७५ चैतमा प्रतिशेयर १०० रुपैयाँ अंकित मूल्यको न्यूनतम १० प्रतिशतले हुने १० रुपैयाँ मात्र सङ्कलन गरेको थियो । पछि फेरि बाँकी ९० प्रतिशत थप्न लगाएको थियो ।
यसरी आईपीओ जारी भएको झण्डै ५ वर्षपछि र नेप्सेमा सूचीकृत भएको झण्डै १ वर्षपछि सो कम्पनीको शेयर कारोबार हुने भएको हो ।

त्रिशुली जलविद्युत कम्पनीको चुक्ता हुन बाँकी रकम भुक्तानी नगरे शेयर जफत हुने