धरानः उपनिर्वाचन नजिकिएसँगै धरान उपमहानगरपालिकामा चुनावी अभियानले तीव्र गति लिएको छ । उम्मेदवारहरू गाउँ, बस्ती, टोलमा घरघर पुग्दै मत माग्न थालेका छन् ।

काङ्ग्रेसले तिहार अघिदेखि नै घरदैलो अभियान शुरु गरेको थियो भने नेकपाले मङ्गलबारदेखि मात्रै औपचारिक चुनावी अभियान शुरु गरेको छ । काङ्ग्रेसले धरान उप महानगर वडा नम्बर २० बाट अभियान शुरु गरेको थियो भने नेकपाले वडा नम्बर ४ बाट चुनावी अभियान शुरु गरेको छ ।

नेकपाले वडा नम्बर ४ को हर्दिया, दानाबारी, पत्रङबारी, मनुवाटार, विष्णुपादकुका र सुमनटारमा उम्मेद्वार प्रकाश राईसहित घरदैलो अभियान गरेको छ । नेकपाको निर्वाचन परिचालन मूल कमिटीका सदस्यसचिव तथा धरान उपमहानगर अध्यक्ष नारायण सुवेदीका अनुसार मंसिर ११ गते भानुचोकमा नेकपाले चुनावी आमसभा गर्ने भएको छ ।

नेपाली काङ्ग्रेसले वडा नम्बर २० मा घरदैलो सकेर वडा नम्बर ४ मा केन्द्रित भएको छ । उम्मेद्वार तिलक राईसहित घरदैलो अभियानलाई तीव्र बनाएको सचिव श्याम पोख्रेलले बताए । सचिव पोख्रेलका अनुसार धरान बजारमा नेवि सङ्घमार्फत् पनि घरदैलो अभियानलाई तीव्र बनाइएको छ ।

वडा नं १५ स्थित शिवगंगा बस्तीमा भएको काङ्ग्रेसको कार्यक्रममा विभिन्न पार्टीबाट मतदाता प्रवेश गरेको जनाइएको छ । काङ्ग्रेसको चुनाव प्रचारप्रसार समिति गठन कार्यक्रममा विभिन्न पार्टीबाट १३ जना काङ्ग्रेस प्रवेश गरेको जनाइएको छ ।

त्यसैगरी, सङ्घीय समाजवादी नेपालले पनि आफ्ना उम्मेद्वारसहित मतदातासँग घरदैलो अभियान शुरु गर्ने तयारी गरेको जनाएको छ । समाजवादीबाट भूपू गोर्खा सैनिक गजेन्द्र इस्वोले उम्मेद्वारी दिएका छन् ।