अमेरिका र युक्रेनबीच प्राकृतिक संशाधनसम्बन्धी सम्झौतामा हस्ताक्षर भएको छ । अमेरिकाले यसरबारे जानकारी दिएको हो ।

अमेरिकाको वित्त विभागले एक प्रेस वक्तव्य जारी गर्दै दुई देश ‘रिकन्स्ट्रक्सन इनभेस्टमेन्ट फन्ड’ बनाउन सहमत भएका छन् । अमेरिकी राष्ट्रपति डोनाल्ड ट्रम्पले भनेका छन्- यो सम्झौताले अमेरिकालाई धेरै फाइदा हुनेछ ।

ट्रम्पले अगाडि भनेका छन्- बाइडेनले युक्रेनलाई ३५० अर्ब डलर दिए । अब हामीले यस्तो सम्झौता गरेका छौँ कि यसबाट हामीलाई धेरै पैसा मिल्नेछ ।

ह्वाइटहाउसमा ट्रम्पको पुनरागमनपछि रुससँगको युद्धमा होमिएको युक्रेन दबाबमा आएको थियो । ह्वाइटहाउसमा बोलाएर ट्रम्पले युक्रेनका राष्ट्रपति भोलोदिमिर जेलेन्स्कीलाई हप्कीदप्कीको शैलीमा प्रस्तुत भएको भिडियो सार्वजनिक भएसँगै युक्रेन थप कमजोर भएको मानिएको थियो ।

उता ट्रम्प प्रशासनको नेतृत्वमा रहेको अमेरिकाको रुससँगको बढ्दो निकटले युक्रेनको चिन्ता थप बढाएको थियो । यद्यपि, युक्रेनी राष्ट्रपति जेलेन्स्कीले युरोपको दर्बिलो साथ त पाएका थिए तर, त्यो रुसलाई रोक्न पर्याप्त छैन भन्ने उनले गहिरोगरी बुझेका थिए ।

यसका साथै रुसी राष्ट्रपति भ्लादिमिर पुटिनसँग ट्रम्पको सुधारिँदै गएको सम्बन्धले जेलेन्स्कीलाई थप चिन्तित बनाएको थियो । यही सम्बन्धलाई उपयोग गर्दै पुटिनले युक्रेनमाथि थप दबाब बढाउँदै जाँदा युक्रेन र अमेरिकाबीच पछिल्लो सम्झौता भएको हो ।

अमेरिकाका वित्तमन्त्री स्कट बेसेन्ट तथा युक्रेनका उपप्रधानमन्त्री युलिया स्विरिडेन्कोले बुधबार सम्झौतामा हस्ताक्षर गरेको बीबीसीले समाचार प्रकाशित गरेको छ ।

युक्रेनको दुर्लभ खनिजसम्म अमेरिकही पहुँच सुनिश्चित गर्न किएभ र वासिङ्टनबीच केही महिनादेखि सम्झौताको विषयमा कुराकानी भइरहेको थियो । त्यसैको जगमा बुधबार सम्झौतामा भएको हो ।

बेसेन्टले एक भिडियो सन्देश जारी गर्दै यो सम्झौताले अमेरिकालाई युक्रेनसँग लगानी गर्ने अधिकार दिने उल्लेख गरेका छन् । बेसेन्टले यो सम्झौताले युक्रेनलाई हुने फाइदाहरूबारे पनि सुनाए । उनले यो सम्झौताले युक्रेनमा लगानीको वातावरण बनाउने र युक्रेनको आर्थिक सुधारलाई गति दिने पनि दावी गरेका छ्न् ।

यो सम्झौतासँगै अमेरिकाले युक्रेनको दुर्लभ खनिजमा पहुँच पाएको छ । अब यी दुई देश मिलेर युक्रेनमा रहेको त्यस्तो खनिज निकालेर त्यसको उपयोग गर्नेछन् ।

युक्रेनमा लिथियम, टाइटेनियम, युरेनियम जस्ता महत्त्वपूर्ण खनिज रहेको बताइएको छ । यी खनिजको उपयोग ब्याट्री, हवाईजहाज तथा परमाणु ऊर्जाजस्ता महत्त्वपूर्ण वस्तुहरू बनाउन उपयोग गर्न सकिन्छ ।

सम्झौताअनुसार दुवै देशले पैसा जुटाउनेछन् जसले खनिज निकाल्ने काम सुरु हुनेछ । यसले अमेरिकाले जरुरी खनिज पाउनेछ भने युक्रेनले आर्थिक मद्दत ।

रुससँगको युद्धका कारण कमजोर बनेको आफ्नो अर्थव्यवस्थामा यो सम्झौताले सुधार ल्याउने विश्वासमा युक्रेन छ । उता अमेरिका भने खनिजलगायतका संशाधनमा चीनलगायतका देशमाथिको निर्भरता घटाउन यो अवसरको खोजीमा थियो ।

युक्रेनसँग कम्तिमा २० यस्ता खनिज भण्डार भएको बताइएको छ जसमा अमेरिकाका लागि रणनीतिक रूपमा निकै महत्त्वपूर्ण मानिएको छ ।

तर, रुससँगको युद्धका कारण दबाबमा परेको युक्रेनलाई अमेरिकाले सम्झौताको नयाँ मस्यौदा पठायो त्यसलाई केही युक्रेनी सांसदहरूले ‘लिक’ गराएको अन्तर्राष्ट्रिय मिडियाहरूले उल्लेख गरेका छन् । मिडिया रिपोर्टहरूमा जनाइएअनुसार उक्त मस्यौदामा दुर्लभ खनिजसम्म मात्र सीमित नरहेर ग्यास तथा तेलको स्रोत पनि सामेल थियो ।