खाँदबारीः आगामी मंसिर १४ गते हुने उपनिर्वाचनको लागि सङखुवासभामा मुख्य निर्वाचन अधिकृत र निर्वाचन अधिकृतको कार्यालय स्थापना गरिएको छ ।

मुख्य निर्वाचन अधिकृतको कार्यालय सदरमुकाम खाँदबारीस्थित जिल्ला समन्वय समितिको कार्यालयसँगै र निर्वाचन अधिकृतको कार्यालय मकालु गाउँपालिका वडा नं ५ को भवनमा रहने गरी दुवै स्थानमा बुधबार कार्यालय स्थापना गरिएको हो ।

खाँदबारी नगरपालिका वडा नं ३ को वडाध्यक्षको लागि हुने उप निर्वाचनमा जिल्ला न्यायाधीश शान्तिकुमार आचार्यलाई मुख्य निर्वाचन अधिकृत तोकिएको छ भने मकालु गाउँपालिकाको अध्यक्षको लागि हुने निर्वाचनको लागि जिल्ला न्यायाधिवक्ता तिलकबहादुर कार्कीलाई निर्वाचन अधिकृत तोकिएको छ ।

कार्यालय उद्घाटन कार्यक्रममा बोल्दै न्यायाधीश शान्तिकुमार आचार्यले जनतालाई अधिकार सम्पन्न बनाउने अभियानमा रहेको भन्दै चुनावलाई सफल बनाउन सबैलाई आग्रह गरे । नागरिकहरूलाई उत्साहित बनाउँदै भयरहित वातावरणमा चुनाव गर्नुपर्ने दायित्व रहेको र यसमा बढी राजनीतिक दल जिम्मेवार बन्नुपर्ने उनको भनाइ थियो ।

जिल्ला समन्वय समितिका प्रमुख सुमन शाक्यले निर्वाचनलाई स्वतन्त्र, निष्पक्ष र भयरहित वातावरणमा सम्पन्न गर्न सम्पूर्ण राजनीतिक दलहरूसँग सहयोग गर्न आग्रह गरे । निर्वाचन निष्पक्ष रूपमा सम्पन्न गर्न आचारसंहिता पालना गर्न दलहरूसँग आग्रह गरे ।

त्यसैगरी प्रमुख जिल्ला अधिकारी जीवनप्रसाद दुलालले चुनावलाई भयरहित वातावरणमा सम्पन्न गर्ने सबैको दायित्व भएको बताए । भयरहित वातावरणमा चुनाव हुने र सुरक्षामा कसैसँग कुनै सम्झौता समेत नहुने भन्दै उनले जनतालाई ढुक्क हुन आग्रह गरे ।

कार्यक्रममा नेकपा जिल्ला कमिटीका अध्यक्ष हेमराज घिमिरे र नेपाली काङ्ग्रे जिल्ला सभापति दिपनकुमार श्रेष्ठले निर्वाचनलाई भयरहित, शान्तिपूर्ण र निष्पक्ष बनाउनको लागि आफूहरू पनि लागिपर्ने प्रतिबद्धता जनाए । उनीहरूले दुवै पार्टीले निर्वाचनलाई शान्तिपूर्ण बनाउनको लागि कुनै कसर बाँकी नराख्ने बताए ।

उपनिर्वाचन हुने मकालु गाउँपालिकामा ९ हजार १ र खाँदबारी नगरपालिका वडा नं ३ मा १ हजार ८ सय २२ मतदाता छन् ।