मोरङको सुन्दरहरैंचामा किवानिस क्लब अफ सुन्दरहरैंचाको पदस्थापना कार्यक्रम सम्पन्न भएको छ। कार्यक्रममार्फत वर्ष २०२५–२६ का लागि नयाँ कार्यसमिति चयन गरिएको हो।

नयाँ कार्यसमितिको अध्यक्षमा हर्कराज राई चयन भएका छन्। पदस्थापनासँगै नव-निर्वाचित कार्यसमितिले सामाजिक सेवा, शिक्षा, स्वास्थ्य तथा सामुदायिक विकासका क्षेत्रमा सक्रिय भूमिका निर्वाह गर्ने प्रतिबद्धता जनाएको छ।

कार्यक्रममा क्लबका पूर्वअध्यक्ष, पदाधिकारी, सदस्यहरू तथा विभिन्न सामाजिक संघ–संस्थाका प्रतिनिधिहरूको सहभागिता रहेको थियो।

बैंकहरूले फागुन महिनाका लागि नयाँ ब्याजदर सार्वजनिक गरेका छन्। निक्षेप बढ्दै जानु र कर्जा प्रवाह सुस्त हुँदा माघको तुलनामा फागुनमा मुद्दती निक्षेपको ब्याजदर घटेको हो।

माघमा ४.६८४५ प्रतिशत रहेको व्यक्तिगत मुद्दती निक्षेपको अधिकतम औसत ब्याजदर फागुनमा ०.११५५ प्रतिशतविन्दुले घटेर ४.५६९ प्रतिशतमा झरेको छ। यस्तै, संस्थागत मुद्दती निक्षेपको अधिकतम औसत दर पनि समीक्षा अवधिमा ०.०५१५ प्रतिशतविन्दुले घटेको छ।

फागुनमा ९ वाणिज्य बैंकहरूले व्यक्तिगत मुद्दती निक्षेपको अधिकतम ब्याजदर घटाएका छन्। तीमध्ये ग्लोबल आइएमई बैंकले सबैभन्दा बढी ०.७५ प्रतिशतविन्दुले दर घटाएको छ। माघमा ५.५ प्रतिशत रहेको यस बैंकको व्यक्तिगत मुद्दती निक्षेपको अधिकतम ब्याजदर फागुनमा ४.७५ प्रतिशतमा झरेको छ। भने ११ बैंकहरूले भने माघकै दरलाई निरन्तरता दिएका छन्।

फागुन महिनामा व्यक्तिगत मुद्दती निक्षेपमा सबैभन्दा बढी ब्याज नेपाल बैंकले दिने भएको छ। बैंकले अधिकतम ५.१ प्रतिशतका दरले ब्याज दिने जनाएको छ। सबैभन्दा कम ब्याजदर भने स्ट्याण्डर्ड चार्टर्ड बैंक नेपाल, कृषि विकास बैंक, प्राइम कमर्सियल बैंक, नेपाल एसबीआई बैंक, एभरेष्ट बैंक र सिद्धार्थ बैंकको रहेको छ। यी बैंकहरूले अधिकतम ४.२५ प्रतिशतका दरले ब्याज दिने भएका छन्।

संस्थागत मुद्दती निक्षेपतर्फ भने हिमालयन बैंक, राष्ट्रिय वाणिज्य बैंक, एनआईसी एशिया बैंक र एनएमबी बैंकले सबैभन्दा बढी ४ प्रतिशतका दरले ब्याज दिने भएका छन्।

बंगलादेशमा सम्पन्न संसदीय निर्वाचनमा बंगलादेश नेशनलिस्ट पार्टी (बीएनपी) ले बहुमतसहित ऐतिहासिक जीत हासिल गरेको छ। ३०० सदस्यीय संसद्मध्ये बीएनपीले १८५ सिट जित्दै साधारण बहुमतको सीमा पार गरेको स्थानीय सञ्चारमाध्यमहरूले जनाएका छन्।

बिहीबार सम्पन्न मतदानपछि मतगणना शुक्रबार बिहानसम्म जारी रहँदा बीएनपी दुई तिहाइ बहुमत नजिक पुगेको देखिएको छ। पार्टीका नेताहरूले २०० भन्दा बढी सिट जित्ने दाबी गरेका छन्।

यो निर्वाचन सन् २०२४ मा युवापुस्ताको नेतृत्वमा भएको आन्दोलनपछि भएको पहिलो संसदीय चुनाव हो, जसले तत्कालीन प्रधानमन्त्री शेख हसिना नेतृत्वको सरकारलाई सत्ताबाट बाहिरिन बाध्य बनाएको थियो। लामो समयदेखि सत्तामा रहेको अवामी लिग यस पटक निर्वाचनमा सहभागी हुन पाएको थिएन।

बीएनपीका प्रमुख नेता तथा सम्भावित प्रधानमन्त्री उम्मेदवार तारिक रहमानले गरिब परिवारलाई आर्थिक सहयोग, एक व्यक्तिले अधिकतम १० वर्ष मात्र प्रधानमन्त्री बन्न पाउने व्यवस्था, वैदेशिक लगानीमार्फत अर्थतन्त्र सुदृढीकरण र भ्रष्टाचार नियन्त्रणका नीति अघि सारेका थिए।

बीएनपीका मुख्य प्रतिस्पर्धी जमात-ए-इस्लामीले ५६ सिट जितेको छ। पार्टी प्रमुख शफिकुर रहमानले पराजय स्वीकार गर्दै सकारात्मक प्रतिपक्षको भूमिका निर्वाह गर्ने बताएका छन्।

निर्वाचन पछिल्ला वर्षहरूकै सबैभन्दा प्रतिस्पर्धात्मक मानिएको छ। ५० भन्दा बढी दल र करिब दुई हजार उम्मेदवार प्रतिस्पर्धामा थिए। मतदान प्रतिशत ६० प्रतिशतभन्दा माथि पुग्ने अनुमान गरिएको छ, जुन अघिल्लो निर्वाचनको ४२ प्रतिशतभन्दा उल्लेखनीय रूपमा बढी हो।

निर्वाचनसँगै संवैधानिक संशोधनसम्बन्धी जनमतसंग्रह पनि गरिएको छ। प्रस्तावित सुधारमा निर्वाचन अवधिमा तटस्थ अन्तरिम सरकार गठन, द्विसदनीय संसद् व्यवस्था, महिलाको प्रतिनिधित्व वृद्धि, न्यायपालिकाको स्वतन्त्रता सुदृढीकरण तथा प्रधानमन्त्रीका लागि दुई कार्यकालको सीमा निर्धारणजस्ता प्रावधान समावेश छन्।