नेपाली राष्ट्रिय महिला टोलीले अन्तर्राष्ट्रिय फुटसलमा ऐतिहासिक जित हासिल गरेको छ । बैंककमा जारी साफ फुटसल च्याम्पियनसिपमा बिहीबार नेपालले आफ्नो दोस्रो खेलमा माल्दिभ्स लाई ५–० ले हरायाे । नेपाली महिला टोलीले अन्तर्राष्ट्रिय फुटसलमा जित निकालेको पहिलोपटक हो ।

हुवा माक रंगशालाको फुटसल एरिनामा सम्पन्न खेलमा नेपाललाई जित दिलाउन जेनिफर रानामगरले दुई तथा विमला चौधरी र मनिषा थापामगरले एक–एक गोल गरे । एक गोल नेपाललाई आत्मघाती उपहारका रूपमा प्राप्त भयो ।

पहिलो हाफमा चार गोल गरेको नेपालले दोस्रो हाफा भने एक गोलमात्र थप्न सक्यो ।  खेलको चौथो मिनेटमा जेनिफरको गोलमार्फत नेपालले अग्रता लिएको थियो । ११ औँ मिनेटमा विमलाले टोलीको अग्रता दोब्बर बनाइन् ।

त्यसको एक मिनेटपछि नै जेनिफरले व्यक्तिगत दोस्रो गोल गर्दा नेपाल ३–० ले अगाडि बढ्यो । १९ औँ मिनेटमा मनिषाले पेनाल्टीमार्फत टोलीका लागि चौथो गोल गरिन् ।  नेपालले अन्तिम मिनेटमा आत्मघाती गोल उपहार पाएको थियो ।

जितसँगै नेपाल दुई खेलमा चार अंक जोड्दै शीर्ष स्थानमा उक्लिएको छ । यसअघि नेपालले श्रीलंकासँग २–२ को बराबरी खेलेको थियो । दुवै खेल गुमाएको माल्दिभ्स अंकविहीन छ । माल्दिभ्सले यसअघि भारतसँग ११(१ को फराकिलो हार व्यहोरेको थियो । बिहीबारै सम्पन्न पहिलो खेलमा बंगलादेशले भारतविरुद्ध ३–१ को जित निकालेको थियो ।

नेपाली कांग्रेस विशेष महाधिवेशनबाट चुनिएको नेतृत्वबारे निर्वाचन आयोगमा अद्यावधिक विवरण पेस गरिएको छ । विशेष महाधिवेशनबाट सभापतिमा निर्वाचित गगन थापा आफैँ निर्वाचन आयोग पुगेका थिए ।

सभापति थापाले निर्वाचन आयोगलाई माघ ६ गतेको समयसीमालाई ख्याल गरी चाँडो निर्णय गर्न अनुरोध गरेका छन् । कार्यवाहक प्रमुख निर्वाचन आयुक्त रामप्रसाद भण्डारीसमक्ष थापाले यस्तो अनुरोध गरेका हुन् ।

माघ ६ गते निर्वाचनको लागि मनोनयन दर्ता गर्नुपर्ने बाध्यता छ । त्यसलाई ख्यालमा राखेर छिटो निर्णय गर्न अनुरोध गर्‍याैँ,’ उनले भने, ‘निर्णय गरेर बाहिर भएको दुविधा पनि हटाइदिन अनुरोध गरेका छाैँ ।’