खोटाङको जन्तेढुङ्गा गाउँपालिका–६ दिप्लुङमा आयोजित विवाह भोज खाएका बेहुला–बेहुलीसहित स्थानीयहरू बिरामी परेपछि उपचारका लागि स्वास्थ्य शिविर सञ्चालन गरिएको छ। भोज खाएको करिब १२ घण्टापछि ज्वरो र झाडापखालाको समस्या देखिन थालेपछि निगालावास भञ्ज्याङस्थित रामकुमार राईको घरमा शिविर राखेर उपचार सुरु गरिएको हो।

स्थानीयवासी वीरबल किराँतीका अनुसार विवाह भोज खाएका अधिकांशमा ‘फुड पोइजन’ भएको आशंका गरिएको छ। २१ माघमा भएको भोजमा सहभागी भएकाहरू २२ माघ साँझदेखि बिरामी पर्न थालेका थिए। बिरामीहरूको उपचारका लागि गाउँपालिकाको स्वास्थ्य शाखाको आरआरटी टोली, स्वास्थ्य कार्यालय खोटाङ र जनप्रतिनिधिहरू परिचालन गरिएको छ।

बिरामीको संख्या बढ्दै गएपछि स्वास्थ्य कार्यालयबाट थप औषधि र जनशक्ति मागिएको गाउँपालिका उपप्रमुख खेमबहादुर खड्काले जानकारी दिए। गाउँपालिकाका सूचना अधिकारी विनय निरौलाका अनुसार उपचारका लागि स्थानीयहरू शिविरमा आउने क्रम जारी छ।

गाउँपालिका अध्यक्ष अरुणादेवी राईका अनुसार हालसम्म ३५ जनालाई स्लाइन र औषधि दिएर उपचार गरिएको छ भने विवाह भोजमा करिब २०० जना सहभागी भएको अनुमान गरिएको छ। भोज खाएर उदयपुर र काठमाडौं फर्किएका पाहुनासमेत बिरामी परेको खबर आएको उनले बताइन्।

स्वास्थ्य कार्यालय प्रमुख कुलबहादुर पौडेलले ‘फुड पोइजन’को कारण पत्ता लगाउने प्रयास भइरहेको बताए। भोज भएको धेरै दिन बितिसकेकाले नमुना सङ्कलन गर्न कठिन भएको उनले बताए। जटिल अवस्थाका बिरामीलाई आधारभूत अस्पतालमा भर्ना गरेर उपचारको व्यवस्था मिलाइएको गाउँपालिकाले जनाएको छ।

१०औँ संस्करणको आईसीसी टी–२० विश्वकपमा आज इंग्ल्यान्डसँग ऐतिहासिक खेल खेल्न लागेको नेपाली टोलीलाई प्रधानमन्त्री सुशीला कार्कीले जीतको शुभकामना व्यक्त गर्नुभएको छ ।

सामाजिक सञ्जाल फेसबुकमा उहाँले मुम्बईको वानखेडे स्टेडियममा देशको राष्ट्रिय धुन गुन्जिनेछ र त्यो विश्वले सुन्ने उल्लेख गर्नुभएको छ । साथै कप्तान रोहितकुमार पौडेलको टोलीले नेपालको आत्मविश्वास, एकता र सामूहिकताको बेजोड प्रस्तुति देखाउने विश्वास व्यक्त गर्नुभएको छ ।

तेस्रोपटक टी–२० विश्वकप खेल्न लागेको नेपालसँग यतिखेर संसारभर फैलिएका प्रशंसकको साथ र विगतमा गरेका चमत्कार/सफलताको आड रहेको प्रधानमन्त्री कार्कीको भनाइ छ । उहाँले लेख्नुभएको छ, ‘इंग्ल्याण्डसँगको आजको ऐतिहासिक खेलमा सिङ्गाे देशको तर्फबाट जीतको शुभकामना ।’

भारत र श्रीलङ्काले संयुक्त रूपमा आयोजना गरेको विश्वकपमा नेपालले आज आफ्नो पहिलो खेल इंग्ल्याण्डसँग खेल्दैछ । खेल वानखेडे स्टेडियममा नेपाली समयअनुसार दिउँसो सवा ३ बजे शुरु हुनेछ । समूह ‘सी’ मा रहेको नेपालले समूह चरणका अरू खेलमा वेस्ट इन्डिज, स्कटल्यान्ड र इटालीसँग खेल्नेछ ।

प्रतियोगिता आउँदो मार्च ८ तारिख अर्थात् फागुन २४ गतेसम्म चल्नेछ । अहिलेसम्म ६ वटा टोली टी–२० विश्वकपको उपाधि जितेका छन् । भारत, इङ्ग्ल्याण्ड र वेस्ट इन्डिज २÷२ पटक तथा पाकिस्तान, श्रीलङ्का र अस्ट्रेलिया १÷१ पटक विजेता बनेका छन् ।

सामाजिक सञ्जालको प्रयोग गरी र केही अनलाइन सञ्चारमाध्यमले सर्वसाधारण तथा मतदातासँग कसलाई मत दिनुहुन्छ भनेर मतदाताको गोपनियता भङ्ग गरेकामा जिल्ला निर्वाचन कार्यालय काठमाडौँले आपत्ति जनाएको छ ।

निर्वाचन कार्यालयले निर्वाचन आचारसंहिताको पालना गर्न ध्यानाकर्षण गराउँदै मतदाताको गोपनियता भङ्ग गर्ने कार्य नगर्न/नगराउन अनुरोध गरेको हो । निर्वाचन आचारसंहिता, २०८२ को दफा ४ बमोजिम आचारसंहिता उल्लङ्घनको कार्य गरेको पाइएकाले त्यस्ता कार्यहरू नगर्न/नगराउन अनुरोध गर्दै त्यस्ता कार्य नरोकिए प्रचलित कानुनबमोजिम कारबाहीको प्रक्रिया अघि बढाइने उल्लेख गरेको छ ।

उम्मेदवारको अन्तिम नामावली प्रकाशन भएपछि मतदान हुने दिनभन्दा १७ दिन अघिदेखि मात्र निर्वाचन प्रचारप्रसार गर्न पाइने व्यवस्था छ । त्यसमा जुलुस, आमसभा वा कोणसभा गर्न, सञ्चारमाध्यममा कुनै प्रकारको प्रचारप्रसार सामग्री प्रकाशन वा प्रसारण गर्न, निर्वाचन प्रचारप्रसारका लागि घरलैलो कार्यक्रम गर्न पाइने व्यवस्था छ । आचारसंहिताको यो व्यवस्था पूर्ण पालना गर्नका लागि पटकपटक छलफल र सूचना प्रकाशन गरी जानकारी गराइसकिएको भए तापनि कतिपय राजनीतिक दल, तिनका प्रतिनिधि र उम्मेदवारले उक्त व्यवस्थाको उल्लङ्घन गरिएको निर्वाचन कार्यालयले जनाएको छ ।

निर्धारित समयअगावै कोणसभा गर्ने, प्रचारप्रसार गर्ने, प्रचारप्रसार सामग्री प्रकाशन तथा प्रसारण गर्ने र घरदैलो कार्यक्रम गरी मतदातालाई प्रभाव पार्ने काम गरिरहेको भन्ने जानकारी प्राप्त भएकाले त्यस्तो कार्य नगर्न/नगराउन निर्वाचन कार्यालयले ध्यानाकर्षण गराएको छ ।

कोही कसैबाट आचारसंहिताको उल्लङ्घन गरी कुनै पनि तरिकाले प्रचारप्रसार गरेको प्रमाण प्राप्त भएमा प्रचलित कानुनबमोजिम तत्काल कारबाही प्रक्रिया अघि बढाइने निर्वाचन कार्यालयले सूचित गरेको छ ।

आचारसंहिता अनुमगन अधिकृत मुक्तिराम रिजाल, शिवराम भट्टराई, रोमाकान्त काफ्ले, मुनकुमार केसी, सुनिता सुवेदी र रुक्मागत अर्यालले संयुक्त रूपमा निर्वाचन आचारसंहिताको सम्पूर्ण पक्षका बारेमा ध्यानाकर्षण गराएका छन्।