नेपाल स्टक बजारमा गिरावट आउने क्रम मंगलबार पनि जारी रह्यो। नेपाल स्टक एक्स्चेन्ज (नेप्से) परिसूचक सोमबार ८ अंक घटेकोमा मंगलबार थप २०.७५ अंकले घट्दै २६४२.१५ बिन्दुमा झरेको छ। अघिल्लो दिन २६६२.१० अंकमा रहेको सूचक कारोबार अवधिभर नकारात्मक देखिएको थियो।

मंगलबार कारोबार भएका अधिकांश कम्पनीको सेयर मूल्य घटेका छन्। यस दिन २१४ कम्पनीको सेयर मूल्य घट्दा ४२ कम्पनीको मूल्य बढेको छ भने ६ कम्पनीको मूल्य स्थिर रहेको छ।

गिरावटबीच केही कम्पनीको सेयर मूल्य भने उल्लेख्य बढेको छ। सालपा विकास बैंकको सेयर मूल्य १० प्रतिशतले बढेको छ भने रिलायन्स स्पिनिङ मिल्सको सेयर मूल्य करिब ९ प्रतिशतले उकालो लागेको नेप्सेले जनाएको छ।

समूहगत परिसूचकतर्फ पनि अधिकांश सूचक घटेका छन्। बैंकिङ ६.१७, विकास बैंक ६७.३५, वित्त ५२.३४, होटल ८६.७५, जलविद्युत् ५८.१४, लगानी ०.५०, जीवन बीमा ९९.४७, लघुवित्त २४.४४, निर्जीवन बीमा ८२.३४, अन्य १३.४७, उत्पादनमूलक ६७.२६ र होटल समूह ३१.६३ अंकले घटेका छन्। सामूहिक लगानी कोष र व्यापार समूह भने क्रमशः ०.१० र ८.३७ अंकले बढेका छन्।

कारोबार रकम भने ८ अर्बभन्दा माथि पुगेको छ। मंगलबार ३५४ कम्पनीका ८३ हजार ७५ कारोबारबाट २ करोड ५ लाख ५९ हजार ५५ कित्ता सेयर ८ अर्ब ३६ करोड रुपैयाँमा खरिद–बिक्री भएको छ।

अघिल्लो दिन सोमबार ३३५ कम्पनीका ८० हजार ५५९ कारोबारबाट १ करोड ९६ लाख १६ हजार ३९५ कित्ता सेयर ७ अर्ब ९४ करोड रुपैयाँमा किनबेच भएको थियो। कारोबार रकमको तुलनामा मंगलबार थोरै वृद्धि भए पनि बजार सूचक भने दोहोरो अंकले घटेको छ।

आउँदाे फागुन २१ गते हुने प्रतिनिधिसभा सदस्य चुनावका लागि आवश्यक सम्पूर्ण मतपत्र छपाइ सम्पन्न भएको छ ।

जनक शिक्षा सामग्री केन्द्र लिमिटेडका प्रबन्ध निर्देशक यदुनाथ पौडेलले निर्वाचन आयोगले दिएको मतपत्र छपाइको जिम्मेवारी हिजाे बेलुकी सम्पन्न गरिएको जानकारी दिनुभयो । आजदेखि सबै मतपत्र ‘प्याकेजिङ’ सकेर सम्बन्धित प्रदेशमा ढुवानी गरिने उहाँले बताउनुभयो ।

प्रबन्ध निर्देशक पौडेलले भन्नुभयो, ‘प्रत्यक्षतर्फ २ करोड ३ लाख मतपत्र छपाइ कार्य हिजाे बेलुकी सम्पन्न गरेका छौँ । ४२ दिनको कार्यतालिका लिएर छपाइ शुरू गरिएकामा ४० दिनमै सम्पन्न गर्न सफल भयौँ । अब १० दिनभित्र सबै जिल्लामा मतपत्र पुर्‍याउँछौँ ।’

केन्द्रले दैनिक १३ देखि १५ लाख मतपत्र छपाइ गर्दै आएको थियो । यसअघि १० लाख नमूना मतपत्र छपाइ सकेर आयोगले विभिन्न ठाउँमा पुर्‍याइसकेको छ भने २ करोड ८ लाख ३० हजार समानुपातिकतर्फको मतपत्र जिल्लामा पठाउने काम भइरहेको केन्द्रले जनाएको छ ।

प्रबन्ध निर्देशक पौडेलले कर्णाली र सुदूरपश्चिममा सबै मतपत्र पुगिसकेको र बाँकी क्षेत्रमा पनि १० दिनभित्र मतपत्र पुर्‍याउने गरी काम भइरहेको जानकारी दिनुभयो ।

बङ्गलादेशको बङगलादेश नेसनलिस्ट पार्टी (बीएनपी) का अध्यक्ष तारिक रहमानले आज नयाँ प्रधानमन्त्रीका रूपमा शपथ लिँदै हुनुहुन्छ । उहाँको शपथग्रहण समारोहमा शेख हसिनालाई आश्रय दिइरहेको छिमेकी भारतसहित १३ देशका अतिथिलाई निम्ता गरिएको छ ।

रहमानको शपथ समारोह परम्परागत रूपमा राष्ट्रपति भवनमा नभई ढाकामा रहेको राष्ट्रिय संसद् भवन परिसरको साउथ प्लाजामा आयोजना गरिएको छ । स्थानीय समय अनुसार बिहान १० बजे सांसदको शपथ र दिउँसो ४ बजे प्रधानमन्त्रीसहित मन्त्रीहरुको शपथको तयारी भैरहेको स्थानिय सञ्चारमाध्यमले जनाएका छन् ।

बङ्गलादेशले निमन्त्रणा पठाएका १३ देशमा नेपालसहित चीन, भारत, मलेसिया, साउदी अरब, टर्कीए, पाकिस्तान, युएइ, कतार, ब्रुनाइ, श्रीलंका, माल्दिभ्स र भुटान रहेका छन् । गएको बिहीबार सम्पन्न चुनावमा बीएनपीले दुई–तिहाईभन्दा धेरै सिट जितेको छ ।

बङ्गलादेशको संसद्मा कुल ३ सय ५० सिट छ । त्यसमध्ये ५० सिट महिलाका लागि आरक्षित छ । सहयोगी दलहरू समेत जोड्दा बीएनपी नेतृत्वको गठबन्धनले कुल २ सय १२ सिटमा जित हासिल गरेको हो ।