इटहरीः मर्जर प्रक्रियाका कारण साढे ५ महिनादेखि दोस्रो बजारमा कारोबार रोकिएको एनएमबी बैंकको शेयर कारोबार खुलेसँगै बिहीबार सो बैंकमा लगानीकर्ताको बढी आकर्षण देखिएको छ ।

एनएमबिसँगै मर्जर गरेको ओम डेभलपमेन्ट बैंकको कारोबार भने १४ महिनादेखि रोकिएको थियो । जसका कारण साबिक ओम डेभलपमेन्ट बैंकका लगानीकर्ता पनि सो कम्पनीको शेयर किनबेचमा सक्रिय भएका थिए ।

बिहीबार ३७ करोड ४१ लाख ५० हजार ५ सय ७१ रुपैयाँको शेयर किनबेच हुँदा ११ करोड २६ लाख ४३ हजार २ सय ७३ रुपैयाँको एनएमबीको मात्रै शेयर किनबेच भएको थियो । ३ सय ५१ रुपैयाँ ३२ पैसाबाट कारोबार खुलेको एनएमबीको शेयरमूल्य घटेर ३ सय ३३ रुपैयाँसम्म झरे पनि बजार बन्द हुँदा भने ३ सय ४७ रुपैयाँ पुगेको छ ।

१ सय ६३ कम्पनीको १२ लाख ९६ हजार ८ सय ८७ कित्ता शेयर किनबेच हुँदा एनएमबीको ३ लाख २८ हजार १ सय ५१ कित्ता शेयर ९ सय ७१ पटकको कारोबारमा भएको थियो । प्रभु बैंकको ५ करोड ६५ लाख र नेपाल बैंकको २ करोड ८१ लाख रुपैयाँको शेयर किनबेच भएको थियो । त्यसैगरी नबिल बैंक र प्रभु बैंककै संस्थापक शेयरको कारोबार रकम पनि १ करोड नाघेको छ ।

साताको अन्तिम दिन बिहीबार नेप्से परिसूचक ६ दशमलव ०५ अङ्क घटेर १ हजार १ सय ३१ दशमलव ९७ अङ्कमा ओर्लिएको छ ।
अघिल्लो दिनझै बिहीबार पनि साल्ट ट्रेडिङको शेयरमूल्य १० प्रतिशतले बढेको छ । एनआईसी एशिया ग्रोथ फन्डको शेयरमूल्य ३ दशमलव ९३ प्रतिशत र सगरमाथा इन्स्योरेन्सको ३ दशमलव ८० प्रतिशतले शेयरमूल्य बढेको छ ।

रिडी हाइड्रोपावर डेभलपमेन्ट कम्पनीको शेयरमूल्य सबैभन्दा धेरै ५ दशमलव १९ प्रतिशत, ओरियन्टल होटलको ४ दशमलव ४७ र सिनर्जी पावर डेभलपमेन्टको शेयरमूल्य ४ प्रतिशत घटेको छ ।

ओम डेभलपमेन्ट बैंक एनएमबीमा मर्ज भएपछि विकास बैंक उपसमूहको परिसूचक मिलान भइरहेका कारण बिहीबार विकास बैंक समूहको उपसूचक भने नेप्सेको वेबसाइटमा देखिएको थिएन ।