विराटचोकः झापाको बिर्तामोड नगरपालिका वडा नम्बर २ मा गत असोज १६ गतेदेखि सञ्चालनमा आएको ड्रिमल्याण्ड पार्कलाई नामजस्तै सुन्दर बनाउने सञ्चालकले बताएका छन् । सो पार्कका संरचना पूर्ण रूपमा नबनिसकेका भए पनि पर्यटकको ध्यान तान्न भने सफल भइसकेको छ ।

शिक्षासेवी जयनारायण ढुङ्गानाले सञ्चालनमा ल्याएको सो पार्क ७ बिघाभन्दा बढी जमिनमा फैलिएको छ । पार्क पूर्ण रूपमा बनिसकेपछि आगन्तुकको लागि खुला गर्ने योजना भए पनि पार्क बनिनसक्दै आगन्तुक आएर घुम्न थालेको र भीड थामिनसक्नु भएपछि भीडलाई व्यवस्थित गर्न आफ्नो योजनाभन्दा अघि नै पार्क सञ्चालन गरिएको उनको भनाइ छ ।

माथि रेलमा, मुनि डुङ्गामा शयर हुने
सो पार्कको वरीपरी पर्खाल लगाएर घेराबेरा गरिएको छ भने घेराबाराभित्र पिल्लर उठाएर जमिनभन्दा लगभग ९ फुट माथि वरीपरी सडक बनाइएको छ । अहिले सिटी सफारीमा चढेर सो सडकमार्फत् वरीपरी घुमेर पार्कको अवलोकन गर्न सकिन्छ । पछि सफारीलाई विस्थापित गरी रेल सञ्चालन गर्ने योजना रहेको उनले बताए ।

सोही सडकको मुनि र जमिनको सतहभन्दा लगभग ५ फुट तल पार्कको वरीपरी पोखरी निर्माण गरिएको छ । सो पोखरीमार्फत् भने डुङ्गा सयरको व्यवस्था मिलाइने योजना रहेको उनले बताए । त्यसभन्दा भित्रपट्टी पार्क, बगैंचा तथा विभिन्न जनावरलगायतका अन्य आकृति रहेका छन् । जसले पर्यटकको ध्यान तानिरहेको पाइन्छ ।

बिर्तामोडबाट पाहुनालाई घुमाउन लिएर आएकी भगवती चौधरी पार्कमा फोटो खिच्न व्यस्त थिइन् । यसभन्दा पहिले आफू घुम्न आएको ठाउँमा यस पटक झापाको कचनकवलबाट आएका पाहुनालाई घुमाउन ल्याएको उनले सुनाइन् । उनीहरू पार्कभित्रका विभिन्न ठाउँमा सेल्फी खिच्न व्यस्त देखिन्थे ।

धरहरा र हेलिप्याड पनि बन्दै गरेको सो पार्कले हेलिकोप्टरमार्फत् पाथीभरा दर्शन गराउने योजना ल्याएको छ । पार्कभित्रै हेलिकोप्टर बसाउने गरी हेलिप्याडको निर्माण गरिएको सञ्चालक ढुङ्गाना बताउँछन् ।

पार्कभित्र लिचीका धेरै बिरुवा रहेका छन् । लिची महोत्सव गरेर पर्यटकको ध्यान तानिसकिएको र अब आउने लिची महोत्सव थप भव्य बनाउने योजना बनाएको ढुङ्गानाले बताए ।

पार्कलाई प्रदेशको मात्रै नभई देशकै नमूना पार्क बनाइने र सो पार्कलाई अन्तर्राष्ट्रिय स्तरको बनाउन आफू लागिपरेको सञ्चालक ढुङ्गाना बताउँछन् ।