स्थानीय तह
सुन्दरहरैंचाको वडा नम्बर १२ द्वारा ३ ओटा सीसी क्यामरा जडान
विराटचोकः आफ्नो वडामा हुने आपराधिक तथा शङ्कास्पद गतिविधि नियन्त्रण गर्न सहज होस् भनेर इलाका प्रहरी कार्यालय विराटचोकको सहजीकरणमा वडा नम्बर १२ ले ३ ओटा सीसी क्यामरा जडान गरेको छ ।
इलाका प्रहरी कार्यालयको कार्यकक्षमा रहेको माउस क्लिक गरी कार्यक्रमका प्रमुख अतिथि प्रदेश सांसद राजकुमार ओझा, विशिष्ट अतिथि सुन्दरहरैंचा नगरपालिकाकी उपप्रमुख धनमाया तामाङलगायतले सीसी क्यामरा सञ्चालनको औपचारिक उद्घाटन गरे ।
कार्यक्रमलाई सम्बोधन गर्दै प्रमुख अतिथि ओझाले ‘जनतासँग प्रहरी’ कार्यक्रमलाई सीसी क्यामरा जडानले सहयोग पुग्ने बताए । गृहमन्त्रीसँग भवन निर्माणको लागि बजेटको माग गरिरहेको उनको भनाइ थियो ।
‘नगर क्षेत्रको मात्र नभई राजमार्ग क्षेत्र र पहाडी क्षेत्रको सुरक्षाको लागि विराटचोकमा सुविधासम्पन्न प्रहरी कार्यालय भवनको आवश्यकता छ’, उनले भने, ‘भवन निर्माणको लागि आवश्यक पर्ने जग्गाको पहिचान भइसकेको छ । सो जग्गामा इलाका प्रहरी कार्यालय र डीएसपी कार्यालयको भवन बनाउन उचित हुने ठहर गरिएको छ ।’
विशिष्ट अतिथि सुन्दरहरैंचा नगरपालिकाकी उपप्रमुख धनमाया तामाङले सुरक्षाको लागि सबैभन्दा पहिले नागरिक स्वयम् सचेत हुनुपर्ने बताइन् । सुरक्षा निकायलाई सक्दो सहयोग गरेर आपराधिक घटना न्यूनीकरणमा सक्दो सहयोग गर्नुपर्ने उल्लेख गरिन् ।
सुकुना बहुमुखी क्याम्पस सञ्चालक समितिका अध्यक्ष केशव अधिकारीले सीसी क्यामरा जडानपछि मनोवैज्ञानिक असर परी आपराधिक घटना कम हुने उल्लेख गरे ।
इलाका प्रहरी कार्यालय विराटचोकका इञ्चार्ज धर्मेन्द्रकुमार झाले प्रहरी र नागरिक समन्वयको कमी देखिएको बताए । टोलवासीलाई भेला पारी सचेतना कार्यक्रम गर्नुपर्ने आवश्यकता देखिएको उनको भनाइ थियो । आफूले कार्यभार सम्हालेको १ महिनाको अवधिमा आपराधिक घटनामा कमी ल्याएको उनले बताए ।
वडा नम्बर १२ का अध्यक्ष रोशनप्रसाद ढकालले सुन्दरहरैंचा क्षेत्रमा जनघनत्व धेरै भएकाले आपराधिक घटना पनि बढिरहेको उल्लेख गरे । वडावासी र अस्थायी बसोबास गर्नेको लागत राख्ने काम गर्न सकेमा आपराधिक घटनामा कमी हुने उनको भनाइ थियो । टोल सुरक्षा समिति गठन गरी प्रहरी र वडासँग टोलवासीको समन्वय गर्ने काम आज शुक्रबारे टोल विकास संस्थाबाट शुरु गरिने पनि उनले बताए ।
२ लाख रुपैयाँको लागतमा वडा नम्बर १२ को शुक्रबारे बजारको महेन्द्र मावि आसपास र सिद्धार्थ बालस्तम्भ आसपासमा तथा सुकुना क्याम्पस गेट (क्याम्पस चोक) अगाडि क्यामरा जडान गरिएको वडा कार्यालयले जनाएको छ ।
वडा सचिव अनिल पोखरेलले सञ्चालन गरेको कार्यक्रममा वडा सदस्य, विभिन्न सङ्घ संस्थाका प्रतिनिधि तथा समाजसेवीलगायतको उपस्थिति थियो ।
Facebook Comment
मध्यपूर्वमा अमेरिका र इरानबीचको तनाव फेरि चर्किएको छ । अमेरिकी सेनाको केन्द्रीय कमान्डले इरानको हर्मुज जलमार्गमा रहेको क्युशिम टापुमा ‘आत्मरक्षाका लागि’ सैन्य कारबाही गरेको जनाएको छ ।
कतारी सञ्चारमाध्यम अलजजीराका अनुसार इरानले कुवेत र बहराइनतर्फ ब्यालिस्टिक क्षेप्यास्त्र तथा ड्रोन प्रहार गरेको छ । कुवेतको वायु प्रतिरक्षा प्रणालीले आकाशमै ती आक्रमण निष्क्रिय पारेको र बहराइनमा पनि अमेरिकी तथा बहराइनी सुरक्षा संयन्त्रले मिसाइलहरू अवरोध गरेको अमेरिकाको दाबी छ ।
इरानको इस्लामिक रिभोलुसनरी गार्ड कोप्र्स (आईआरजीसी) ले अमेरिकी कारबाहीको जवाफ स्वरूप ड्रोन र मिसाइल आक्रमण गरेको जनाएको छ । इरानी सञ्चारमाध्यमहरूका अनुसार अमेरिकी सेनाले होर्मुज जलमार्ग नजिकै रहेको एक इरानी तेल ट्याङ्कर तथा केश्म टापुको दक्षिणी क्षेत्रमा रहेको सञ्चार टावरमा प्रहार गरेको थियो ।
आईआरजीसीले त्यसपछि अमेरिकी तथा इजरायली हितका जहाज र क्षेत्रीय सैन्य अड्डाहरूलाई निशाना बनाएको दाबी गरेको छ । मध्यपूर्वमा बढ्दो सैन्य गतिविधि र आक्रमणका कारण क्षेत्रीय सुरक्षा अवस्था थप जटिल बन्दै गएको विश्लेषण गरिएको छ ।
प्रतिनिधिसभाको बैठकमा आजदेखि बजेटमाथिको छलफल शुरू हुँदैछ । सरकारले आर्थिक वर्ष २०८३/०८४ को लागि प्रस्तुत गरेको बजेटमाथि आजदेखि दफाबार छलफल शुरू हुने संघीय संसद् सचिवालयले जनाएको छ ।
यसैबीच प्रतिनिधिसभा नियमावली, २०८३ पारित भएको छ । प्रतिनिधिसभाको हिजोको बैठकबाट नियमावली पारित भएको हो ।
बैठकमा प्रतिनिधिसभा नियमावली मस्यौदा समितिका सभापति गणेश पराजुलीले ‘प्रतिनिधिसभा नियमावली मस्यौदा समितिको प्रतिवेदन, २०८३ लाई पारित गरियोस्’ भन्ने प्रस्ताव प्रस्तुत गर्नुभएको थियो । प्रस्तावलाई सभाको बहुमतले पारित गरेको हो ।
सभामुख डोलप्रसाद अर्यालले प्रतिनिधिसभा नियमावली मस्यौदा समितिको प्रतिवेदन, २०८३ को नियम २ देखि २६३ सम्म र अनुसूची १ देखि ७ सम्म नियमावलीको अङ्ग बनेको घोषणा गर्नुभयो । बैठकले नियमावली मस्यौदा समितिको प्रतिवेदनका सम्बन्धमा सभापति पराजुलीले जवाफ दिने क्रममा स्वीकार गर्नुभएको संशोधन स्वीकृत गरेको थियो ।
आज सुनचाँदीको भाउ घटेको छ । आज सुन तोलामा ५ हजार ५०० रुपैयाँ घटेर २ लाख ८५ हजारमा कारोबार भइरहेको नेपाल सुनचाँदी व्यवसायी महासङ्घले जनाएको छ ।
हिजो सुन तोलामा २ लाख ९० हजार ५०० मा कारोबार भएको थियो । आज चाँदीको भाउ पनि २१५ रुपैयाँ घटेको छ । आज चाँदी तोलाको ४ हजार ८६५ रुपैयाँमा कारोबार भइरहेको छ ।
हिजो तोलाको ५ हजार ८० रुपैयाँमा कारोबार भएको महासङ्घले जनाएको छ ।
-
अर्थ7 years agoसमाचारमार्फत् आफ्नो चरित्रहत्या गरिएको भन्दै कानेपोखरीका युवा व्यवसायीले गरे पत्रकार सम्मेलन
-
Banner4 years agoसाउनदेखि कुन तहका कर्मचारीको कति तलब ?
-
खेलकुद7 years agoरंगशालाको अवलोकन
-
मुख्य6 years agoशेयर बजारमा झिनो अंकको गिरावट
-
अर्थ6 years agoगोर्खा डिपाटमेन्ट स्टोर विराटचोकलाई ५० हजार जरिवाना
-
मुख्य7 years agoसुन्दरहरैंचामा चोरले बोरामा हालेर लादैं गरेको बच्चालाई आमाले खोस्न सफल
-
मुख्य6 years agoपुस १० गते खण्डग्रास सूर्यग्रहण लाग्ने भएकाले मोरङका संस्थागत विद्यालय बिदा
-
Banner6 years agoगोठगाउँमा पूर्वाञ्चल विश्वविद्यालय सर्ने, गोठगाउँमा आज साँझ दीप प्रज्वलन गरिने
You must be logged in to post a comment Login