विराटचोकः वैदेशिक रोजगारीमा गएर आउने महिलाको क्षेत्रमा काम गर्ने संस्था ओरेक नेपालले गठन गरेको वैदेशिक रोजगारबाट फर्केका दिदीबहिनीहरुको सञ्जाल आरएमडब्लुकी सदस्य अम्बिका कार्की र त्यही सञ्जालको तर्फबाट ३ हजार र नगरपालिकाबाट १० हजार बराबरका तरकारी पसलको लागि आवश्यक सामग्री हस्तान्तरण गरेको छ ।

  
कार्यक्रमलाई सम्बोधन गर्दै उपप्रमुख धनमाया तामाङलाई काम गरेर खान केही न केही पेशामा सबै लाग्नुपर्ने बताइन् । वैदेशिक रोजगारीमा गएर फर्किएका तर आर्थिक अवस्था कमजोर भएका व्यक्तिको खोजी गरी व्यवसायमा लाग्न सहयोग गर्ने उपमेयरले बताइन् ।
निःशुल्क पाएको भनेर पाइएको सामानको बेवास्ता नगरी सदुपयोग गर्नुपर्ने उनले बताइन् । व्यवसायमा लाग्न बोली र व्यवहार राम्रो हुनुपर्ने उनको भनाइ थियो ।
ओरेक नेपालकी सुशीला सुवेदीले व्यवसाय गर्न सहज होस् भनेर संस्थाले ३ हजार रुपैयाँको तरकारी किनेर व्यवसायको लागि दिइएको र नगरपालिकाले १० हजार रुपैयाँबराबरको डिजिटल तराजु, क्रेटलगायतका अन्य सामग्री सहयोग गरेको बताइन् ।

सहयोग पाएकी अम्बिका कार्कीले आफू कुबेतमा २ वर्ष बसेर आए पनि कमाएको सबै सम्पत्ति सकिएपछि दुःख पाएको बेला पाएको सहयोगको सदुपयोग गर्ने बताइन् । ऐलानी जग्गामा बसिरहेकी बताएकी उनले थोरै नाफा भए पनि यही व्यवसायलाई निरन्तरता दिने बताइन् । वैदेशिक रोजगारीमा पाएको दुःखलाई व्यवसायी बनेर बिर्सिने प्रयास गरेको उनको भनाइ थियो ।
सामग्री हस्तान्तरण कार्यक्रममा ओरेक नेपालकी सुशीला सुवेदी, सुन्दरहरैंचा नगरपालिकाकी उपप्रमुख धनमाया तामाङ, प्रमुख प्रशासकीय अधिकृत गणेशप्रसाद दाहाल, वडा नम्बर १० का अध्यक्ष राजेन्द्रबहादुर थापा, सुन्दरहरैंचा नगरपालिकाका कृषि शाखाका कर्मचारीलगायतको उपस्थिति थियो ।