विराटचोक: मोरङको सुन्दरहरैंचा स्थित सिद्धार्थ सेकेण्डरी स्कुलको रजत उत्सव सम्पन्न भएको छ । स्कुल स्थापना भएको २५ वर्ष पुरा भएको उपलक्ष्यमा सिद्धार्थ स्कुलले बुधबार र बिहिबार विभिन्न कार्यक्रम गरी रजत उत्सव मनाएको हो ।

नवनियुक्त कानुन, न्याय तथा संसदीय मामिला मन्त्री शिवमाया तुम्वाहाम्फेले बुधबार उद्घाटन गरेपछि सुरु भएको रजत उत्सव बिहिबार प्रदेश सभा सदस्य राजकुमार ओझाको प्रमुख आतिथ्यतामा विभिन्न कार्यक्रम गरी सम्पन्न भएको हो । रजत उत्सव अन्तरगत विद्यालयको स्मारिका विमोचन, रतज स्तम्भ अनावरण, भवन उद्घाटन तथा विभिन्न व्यक्तित्वहरुलाई सम्मान गरिएको छ ।

सो अवसरमा पूर्व शिक्षक, पूर्वविद्यार्थी, अभिभावक, कर्मचारी तथा समाजका विभिन्न क्षेत्रमा योगदान पु¥याउने महानुभावहरुलाई सम्मान गरिएको थियो ।

दुई दिनसम्म भएको रजत उत्सव भव्यतापूर्वक सम्पन्न भएको विद्यालयका प्रधानाध्यापक अर्जुन बस्नेतले जनाएका छन् । उत्सवमा विद्यार्थीहरुले निर्माण गरेका विभिन्न विषयसँग सम्बन्धित सामाग्रीहरुको स्टल बनाएर प्रदर्शन गरिएको थियो । मौलिक नेपाली परम्परागत सामाग्रीहरु, विभिन्न हस्तकलाका समानहरु तथा गणित, विज्ञान, नेपाली लगायत विषयसँग सम्बन्धित सामग्रीहरु तयार पारेर विद्यार्थीहरुले प्रदर्शन गरेका थिए ।

यस्तै विद्यार्थीहरुले विभिन्न आधुनिक गीतका साथै साँस्कृतिक नृत्यहरु समेत प्रस्तुत गरेका थिए । रजत उत्सवमा सुन्दरहरैंचा नगरपालिकाका नगरप्रमुख शिवप्रसाद ढकाल, उपप्रमुख धनमाया तामाङ, प्याब्सनका पादाधिकारी, अन्य विभिन्न विद्यालयका प्रतिनिधि, विद्यार्थी, अभिभावहरु लगायतको समेत उपस्थिति रहेको थियो ।