विराटचोकः पूर्वाञ्चल विश्वविद्यालयको केन्द्रीय कार्यालय गोठगाउँमा सर्ने भएपछि त्यसको खुशीयालीमा शुक्रबार साँझ घरघरमा र चोकचोकमा दीपावली गर्न नगरपालिकाले अनुरोध गरेको छ । बिहीबार साँझ नगरपालिकाले जारी गरेको प्रेस विज्ञप्तिमा शुक्रबार साँझ घरघरमा तथा चोकचोकमा दीपावली गर्न नगरपालिकाले अनुरोध गरेको हो ।

नगर प्रमुख शिवप्रसाद ढकालको हस्ताक्षरमा जारी विज्ञप्तिमा भनिएको छ, ‘सुन्दरहरैंचा नगरपालिकाको निरन्तरको पहलकदमी, दबाब र समन्वयको फलस्वरुप यही मिति २०७६ फागुन १४ गते बसेको प्रतिनिधि सभाबाट पूर्वाञ्चल विश्वविद्यालयको ऐन संशोधन गरी केन्द्रीय कार्यालय गोठगाउँमा नै रहने भनी ऐन पास गराउन भएको निर्णयप्रति सङ्घीय सरकार तथा सम्मानित दुवै सदनप्रति सुन्दरहरैंचा नगरपालिका आभार प्रकट गर्दछ ।’

विज्ञप्तिमा सो विषयलाई सरकार र सदनसम्म पु¥याई ऐन पास गराउन महत्वपूर्ण भूमिका खेल्न सहयोग गर्ने सबैलाई बधाई दिइएको छ ।

विज्ञप्तिमा भनिएको छ, ‘यस विषयलाई सरकार र सदनसम्म पु¥याई ऐन पास गराउन महत्वपूर्ण भूमिका खेल्नुहुने स्वास्थ्य तथा जनसङ्ख्या मन्त्री माननीय भानुभक्त ढकाल, माननीय लालबाबु पण्डित, राष्ट्रिय सभा सदस्य माननीय रमेशजंग रायमाझी, प्रदेश सरकार तथा यस क्षेत्रबाट प्रतिनिधित्व गर्नुहुने माननीयज्यूहरु, विश्वविद्यालय सभाका सिनेट सदस्यहरु, सुन्दरहरैंचा नगरपालिकाका जनप्रतिनिधिहरु, सम्पूर्ण राजनीतिक दल, संघसंस्था एवम् सुन्दरहरैंचा नगरवासीलाई बधाई तथा शुभकामना व्यक्त गर्दै विश्वविद्यालयको केन्द्रीय कार्यालय गोठगाउँमै कायम भएको खुशीयालीमा मिति २०७६ फागुन १६ गते शुक्रबार साँझ आआफ्नो घर तथा चोकमा दीपावली गर्नुहुन सबै नगरवासीहरुमा हार्दिक अपिल गर्दछु ।’