विराटचोकः सरकारले नै संस्था सञ्चालनको लागि बीउपूँजी उपलब्ध गराएर स्थापना भएका सहकारीको नाममा समृद्धि शब्द जोडिएको हुन्छ । त्यस्तै सहकारी संस्था हो जनता समृद्धि बहुउद्देश्यीय सहकारी संस्था । स्थापनाकालमा संस्था स्थापनाको लागि चाहिने पूँजीको १५ प्रतिशत रकम अनुदान दिएको थियो ।

२०७० साल बैशाखमा दर्ता भएको यो संस्थामा हाल ८ सय जनाभन्दा बढी शेयर सदस्य रहेका छन् । नयाँ सहकारी ऐनअनुसार सहकारी सञ्चालनको लागि आवश्यक शेयर सदस्य पुगेको छ । विज्ञको सल्लाह लिँदै तथा शेयर सदस्यको हित हुने अवस्था आएमा एकै प्रकृतिको अन्य सहकारी संस्थासँग मर्जमा जान पनि सकिने संस्था सञ्चालन समितिका अध्यक्ष हरिचरण ढकालले बताए ।

सहकारी ऐन, नियममा आधारित भएर चलिरहेको आफ्नो सहकारीले कृषि क्षेत्रमा बढी जोड दिएको ढकाल बताउँछन् । संस्थाले रेमिट्यान्सको काम पनि गर्दै आएको छ । त्यस्तै, हवाई टिकट, बस टिकट, मोबाइल रिचार्ज तथा अन्य सेवामूलक काम पनि गरिरहेको उनले बताए । सहकारी सदस्यलाई सुविधा दिने गरी सहकारी पसल खोल्ने सोच पनि बनाएको उनको भनाइ छ ।

२ वा २ भन्दा बढी स्थानीय तहमा कार्यक्षेत्र भएका सहकारीलाई डिभिजन सहकारी कार्यालयले अनुगमन गर्ने नीतिअनुसार यो सहकारीलाई पनि डिभिजन सहकारी कार्यालयले अनुगमन तथा निर्देशन दिने गर्दछ । स्थानीय तह नजिकै भएकाले तर धेरै सूचना र जानकारी भने स्थानीय तहबाटै लिने गरेको ढकालको भनाइ छ ।

उनका अनुसार सहकारीको वार्षिक कारोबार ३ करोड रुपैयाँभन्दा माथि रहेको छ । ३ करोड ४८ लाख रुपैयाँ ऋण लगानी गरेको संस्थाले पहिले लगानी गरेको लगभग २ प्रतिशत खराब कर्जाको रुपमा रहेको छ ।

अहिले भने बिजुलीको बिल वा खानेपानीको बिल लिएर आउँदा मात्रै लगानी गर्ने गरेको ढकाल बताउँछन् । बिजुली वा खानेपानीको बिल हुँदा स्थायी बासिन्दा हो भन्ने प्रष्ट आधार देखिने उनको भनाइ छ । हाल संस्थाले ५० लाख रुपैयाँ सनराइन बैँकबाट ऋण लिएर शेयर सदस्यलाई लगानी गरेको छ ।

सुविधायुक्त सहकारी पसल खोल्नको लागि संरचना बनाउने काम भइरहेको र सो संरचनाको पहिलो तलामा सो पसल खोलिने उनको भनाइ छ । सो पसलमा शेयर सदस्यहरुलाई सकेसम्म धेरै छुट दिने योजना संस्थाको रहेको छ । लगानीको रकमको सही उपयोग हुन्छ भने लगानी गर्न संस्थाले डराउन नहुने उनको बुझाइ छ ।

संस्थाका लागि बचत संकलन ‘फलामको चिउरा’ सरह रहेको हुनाले त्यसरी संकलन भएको रकमलाई जथाभावी लगानी गर्न नहुने उनको भनाइ छ ।