विराटचोकः मोरङको सुन्दरहरैंचामा ‘प्रहरीको साथी म’ कार्यक्रमको शुभारम्भ भएको छ । आइतबार जिल्ला प्रहरी कार्यालय मोरङका प्रमुख विश्व अधिकारीले ‘प्रहरीको साथी म’ अभियानमा आउनेलाई प्रशिक्षण दिएका छन् ।

कार्यक्रमका प्रमुख अतिथि सुन्दरहरैंचा नगरपालिकाका प्रमुख शिवप्रसाद ढकालले ‘प्रहरीको साथी म’ लेखिएको टि सर्ट कार्यक्रममा सहभागी भएका व्यक्तिलाई हस्तान्तरण गर्दै शुभारम्भ गरेका थिए ।

समुदाय– प्रहरी साझेदारी कार्यक्रम अन्तर्गत सबै वडामा यो कार्यक्रम शुरु गरिएको हो । शुभारम्भ कार्यक्रममा बोल्दै प्रमुख अधिकारीले मोरङमा १ जना प्रहरीले अहिले ५ सय ३२ जनाको सुरक्षा गर्नुपर्ने बताए । प्रहरी एक्लैले यो हेर्न नसक्ने हुनाले चोरी, लागुऔषध दुव्र्यसन रोक्न तथा युवालाई जागरुक बनाई महामारी रोक्ने कार्यमा प्रहरीलाई सहयोग पुग्ने भएकाले गठन गरिएको बताए ।

उनले सबै नागरिकले पहिले आफू, आफ्नो घर, समुदाय र राष्ट्रप्रति समर्पित भएर प्रहरीसँगको सहकार्यमा विभिन्न काम गर्नुपर्ने बताए । यस्तै यो कार्यक्रम देशमै पहिलो र नौलो कार्यक्रम भएको समेत उनले जानकारी दिए ।

‘प्रहरीको साथी म’ लेखिएको कपडा लगाएपछि केही कर्तव्यसमेत पालना गर्नुपर्ने र यसको गरिमामा कतैबाट आँच आउने खालका कार्य गर्न नहुने तथा अनुशासनलाई ख्याल गरेर काम गर्नुपर्ने उनको भनाइ थियो ।

सुन्दरहरैंचामा इलाका प्रहरी कार्यालय बेलबारीको मातहतमा रहेर काम गर्नुपर्ने हुन्छ । साथै नगरप्रमुखको समेत यसमा महत्वपूर्ण भूमिका हुने उनले सहभागीलाई जानकारी गराएका थिए ।

प्रत्येक वडामा १ जना संयोजकसहित कम्तीमा १० जनाको समिति गठन गरिएको छ । गठन गरिएका व्यक्तिलाई सीमित अधिकार समेत प्रहरीले दिएको छ । गाउँटोलमा लागूऔषध प्रयोगकर्ता घटाउन र समाजसुधारको बाटोमा डोर्याउन यो कार्यक्रम ल्याइएको बताइएको छ । गाउँमा कुनै घटना भए प्रहरीले वडाका प्रतिनिधिमार्फत् जानकारी लिने छन् ।

 

‘हामीले द्वन्द्व, राजनीतिक आन्दोलन, सशस्त्र जनयुद्ध पनि हेर्यौँ,’ अधिकारीले भने, ‘तर यस्तो युद्ध जहाँ हामीले दुस्मन देख्दैनौँ त्यहाँ पनि युद्ध गर्नुपर्ने भएको छ । नदेखिने दुस्मनले हामीलाई एट्याक गरिराख्या छ ।’ यो अवस्था हाम्रो जीवनकालमा फेरि देख्नु नपरोस् भन्दै यस्तो भयावह अवस्थामा लकडाउनको पालना गर्न प्रहरीको संख्या अपुग भएकाले वडा प्रतिनिधिको भूमिका महत्वपूर्ण हुने उनले बताए ।

नगरप्रमुख ढकालले प्रहरी नाम आफैँमा काफी भएकाले आफ्नो कर्तव्य र अधिकारलाई ख्याल गरेर अघि बढ्न सुझाव दिएका थिए । सडकमा निस्किएका छाडा चौपायालाई नियन्त्रणमा लिनेदेखि गाउँघरमा भएका समस्यालाई प्रहरीसँगको समन्वयमा काम गर्नुपर्ने उनले बताए । सामाजिक एकता र सहकार्यले सुन्दरहरैंचा क्षेत्रमा कुनै काम गर्न समस्या नभएको उनको भनाइ थियो ।

लकडाउन प्रभावितलाई तेस्रो चरणको राहत वितरण शुरु गर्न लागिएको उनले बताए ।

 

मोरङका १७ स्थानिय तह मध्ये रंगेली, विराटनगर, बेलबारी , पथरीशनिश्चरे , उर्लाबारी  र लेटांङ नगरपालिकामा यो अभियान सञ्चालन भएकाे छ ।