विराटचोकः कोरोना भाइरस (कोभिड १९) रोकथाम तथा नियन्त्रणका लागि सरकारले लकडाउन गरेसँगै स्थानीय सरकारका जनप्रतिनिधिलाई राहत जोहो गर्न र वितरण गर्न भ्याइनभ्याइ छ । दैनिक ज्यालादारीमा काम गर्दै आएका मजुदर तथा अति विपन्न परिवारलाई दैनिक छाक टार्न समस्या परेकाले उनीहरुलाई राहत उपलब्ध गराउन लागि परेका छन् ।

संघीय सरकारले पालिकामार्फत् एकद्वार प्रणालीबाट राहत वितरण गर्न निर्देशन गरेको छ । सोही बमोजीम मोरङको सुन्दरहरैंचा वडा नम्बर ५ ले पनि राहत विरण गरेको छ । वडाध्यक्ष रामप्रसाद रिजालका अनुसार वडामा हाल सर्वपक्षीय राहत वितरण समिति निर्माण गरेर पहिलो चरणको राहत वितरण कार्य सम्पन्न भएको छ ।

पहिलो चरणमा वडाका अति विपन्न ४ सय १० परिवारलाई राहत वितरण गरेको उनले बताए । वडामा सुकुम्बासी र मुसहर समुदाय बढी भएको र उनीहरु खोलामा काम गरेर गुजारा चलाउने भएकाले उनीहरुलाई प्राथमिकतामा राखेर राहत बाँडेको उनले बताए । भारतीय मूलका व्यक्ति पनि राहत लिन आउने भए पनि यस्ता परिवारलाई तत्काल राहत उपलब्ध नगराइएको र अति आवश्यक परेमा मात्र वितरण गर्ने उनले बताए ।

पछिल्लो चरणमा गठन गरिएको ‘प्रहरीको साथी म’ मा आबद्ध सदस्यहरुबाट कुनै काम नभएको उनी गुनासो गर्छन् । अबको तेस्रो चरणको राहत सामुदायिक वन छेउमा रहेको मुस्लिम समुदायलाई दिन आवश्यक ठानिएको र त्यहाँका परिवारलाई दिइने उनले बताए । लकडाउन उल्लंघन गर्ने व्यक्तिलाई प्रहरीले अझ कडाइ गर्न आवश्यक रहेको उनको भनाइ छ ।

महिला वडा सदस्य संगीता सापकोटाले वडाका अति विपन्न मात्रै नभई मध्यम वर्गले पनि राहत लिन खोजेको बताइन् । हुँदा खाने परिवारको मात्रै नभई हुनेखाने परिवारको नाम पनि लिस्टमा आएकाले राहत पाउने परिवार छान्न गाह्रो भएको उनले बताइन् ।

खोलामा मजदुरी गर्ने परिवार बढी अनुशासित भएको उनले बताइन् । खेती गर्र्ने परिवारले पनि राहतको आश गर्ने गरेको उनले बताइन् । स्वास्थ्यको ख्याल नगर्ने र भनेको नमान्ने व्यक्ति पनि धेरै सचेत हुँदै गएको उनको भनाइ छ । तेस्रो चरणमा वडाका करीब ३ सय परिवारलाई राहत बाँड्न लागिएको उनले जनाइन् ।

अभिभावक बनेका जनप्रतिनिधिमा संक्रमणको डर (शृङ्खला १)