विराटनगरः प्रदेश नंं १ का मुख्यमन्त्री शेरधन राईले अबदेखि माग र आवश्यकताको आधारमा तराईदेखि हिमालसम्मको समुचित विकास हुने गरी योजना बन्ने बताएका छन् ।

प्रदेश नं. १ को आर्थिक मामिला तथा योजना मन्त्रालयले बुधबार आयोजना गरेको प्रदेशस्तरीय योजना र बजेट तथा कार्यक्रम तर्जुमा दिग्दर्शनको सार्वजनिकीकरण कार्यक्रमलाई सम्बोधन गर्दै मुख्यमन्त्री राईले योजना संकलन, छनोट, कार्यान्वयन र तर्जुमाको वैज्ञानिक आधार बनेको बताए ।

यसअघि योजना संकलन, छनोट र तर्जुमा गर्ने आधार नहँुदा व्यक्तिगत सम्बन्ध र प्रभावका आधारमा योजनाहरु बन्ने गरेको हुनाले कार्यान्वयनमा समस्या आएको उनले उल्लेख गरे । सरकारले चाहेको आर्थिक समृद्धिका लागि प्रभावकारी योजना चाहिने र प्रभावकारी योजनाका लागि विभिन्न प्रकारका मापदण्डहरुको पालना गर्नुपर्ने बताउँदै मुख्यमन्त्री राईले यो दिग्दर्शनले त्यसका लागि वैज्ञानिक आधार तयार गरेको उल्लेख गरे ।

कोरोना भाइरसको संक्रमणको त्रासका कारण समग्र अर्थतन्त्रमा असर परेको र आगामी वर्षको योजना निर्माणमा यसले कस्तो असर पार्छ भन्ने यकिन नभएका कारण चुनौती थपिएको उनको भनाइ थियो । अर्थतन्त्रमा यसले पार्ने असर र त्यसको सामना गर्दै गर्नुपर्ने समुचित विकासका लागि समेत यो दिग्दर्शनले आधार तयार गरेको उनले बताए ।

अहिले विकासका कामहरु ठप्प भएकाले अत्यावश्यक योजनाहरुलाई सामाजिक दूरी कायम गरेर अगाडि बढाउने तयारी गरिरहेको उनको भनाइ थियो ।

कार्यक्रममा आर्थिक मामिला तथा योजना मन्त्री इन्द्रबहादुर आङ्बोले अहिलेको अवस्थामा विकास बजेट काटेर कोरोना कोषमा हाल्नुपर्ने अवस्था नरहेको बताए । यस वर्षको विकास बजेटलाई कोरोनाले प्रभाव नपार्ने बताउँदै त्यसका लागि अन्य विभिन्न क्षेत्रको बजेट रोक्का गरिएको उनले प्रष्ट पारे । कोरोनाले अर्थतन्त्रमा पार्न सक्ने प्रभावलाई मध्यनजर गर्दै बेरोेजगारी, खाद्यान्न संकट, उद्योग व्यवसायको संकटबाट ध्यान पु¥याउनुपर्ने अवस्था आउन सक्ने बताए ।