विराटचोकः सुनसरीको धरानमा घर भएका नाट्यकर्मी सुवास अधिकारी बुबाको मृत्युपछि नेपाल आएका थिए । नेपाल आएको समयमा आफन्तसँग भेटघाट गर्ने क्रममा कर्मथलो स्वीडेन फर्कन नपाउँदै नेपालमा लकडाउन शुरु भयो ।

१ महिनाभन्दा बढी समय उनी दिदीको घरमा झापामा बसे । त्यसै बेला नेपालमा रहेका आफ्ना नागरिक स्वदेश फिर्ता लैजान स्वीडेन सरकारले जहाज ल्यायो । सो जहाजमा स्वीडेन फर्किन पाउने व्यक्तिमा उनको पनि नाम भएकाले लकडाउनकै बीचमा उनी काठमाडौं गए । त्यसपछि १ महिना अगाडि अर्थात् मे महिनाका पहिलो साता उनी स्वीडेन फर्किए ।

उनी स्वीडेन पुग्दा श्रीमती सोमा थापालाई कोरोना संक्रमण भइसकेको रहेछ । सुवासलाई पनि संक्रमणका लक्षण देखिन थाल्यो । त्यसपछि उनी पनि पत्नी सोमाझैँ सेल्फ आइसोलेसनमा बसे । सेल्फ आइसोलेसनमै बसेर दुवै जनाले रोगलाई जिते ।

‘कोरोना लाग्दैमा डराउनु नपर्ने रहेछ’, सामाजिक सञ्जालमा भएको कुराकानीमा उनले भने, ‘सामान्य तवरले नै घरमै बसेर कोरोना जित्यौँ । केही दिन लक्षण देखिए पनि अरु दिन भने सामान्य अवस्थाको जस्तै नै भयो ।’

पहिले नै संक्रमित भएकी सोमा निको भएको १५ दिनपछि सुवास पनि कोरोना संक्रमणलाई परास्त गर्न सफल भए । उनका अनुसार जटिल अवस्था भएका व्यक्तिलाई मात्रै स्वीडेनले अस्पताल भर्ना गर्छ । सामान्य लक्षण देखिएकालाई घरमै आइसोलेसनमा बस्न अनुरोध गर्छ ।

स्वीडेन सरकारको नियम मान्दै उनी पनि घरमै बस्ने, सरसफाइमा ध्यान दिने गर्न थाले । कोरोनालाई जितेपछि उनले अनुभव गरे कोरोना लाग्दैमा कसैको ज्यान जाँदैन । अन्य रोग भएका व्यक्तिलाई कोरोना संक्रमण भयो भने अवस्था असामान्य बन्न सक्छ ।

दम्पत्ति नै कोरोना संक्रमित भए पनि छोराछोरीमा भने संक्रमण देखिएन । ‘केटाकेटीलाई हत्तपत्त भेट्दैन भनेर डाक्टरले भनेको थियो,’ उनले भने, ‘त्यस्तै भयो । छोराछोरीलाई चाहिँ कोरोनाले भेटेन ।’ डाक्टरले फोनमा खानेकुरा बार्नुपर्दैन भनेका हुनाले दुवै जनाले खानेकुरा बारेनन् पनि ।

खोकी, ज्वरो, जाडो हुने, जीउ काम्ने आदि लक्षण देखिए
सोमाका अनुसार उनलाई खोकी लाग्ने, जाडो हुने, काम्ने, ज्वरो आउने आदि लक्षण देखिए ।

सुवासलाई पनि टाउको दुख्ने, जीउ दुख्ने आदि समस्या देखिए । तर यस्तो समस्या ४\५ दिन मात्रै देखियो । फेरि संक्रमणको लक्षण भने देखिएको छैन । १ पटक संक्रमण देखा परेपछि संक्रमण दोहोरिएमा अर्काे पटक त्यति धेरै समस्या नहुने डाक्टरले बताएका छन् । रोग प्रतिरोधी क्षमता थप बढ्छ भनी डाक्टरले भनेका छन् ।

को हुन् अधिकारी दम्पत्ति
नेपालमा सुनसरीको धरानमा घर भएका अधिकारी दम्पत्ति नाट्यकर्मी हुन् । धरानमा हुँदा सुवासले सृष्टि नाट्य समूह सञ्चालन गरेका थिए । १२ वर्ष अघि उनी स्वीडेन गए । त्यसको २ वर्षपछि सोमा पनि स्वीडेन गइन् । स्वीडेनमा सुवास पहिले व्यावसायिक नाट्य समूहमा काम गर्थे । अहिले पेशागत नाट्य नेपाल मण्डप अर्थात् नेपाली कल्चरल एसोसिएसन अफ स्वीडेन संस्था दर्ता गरी काम गरिरहेका छन् ।