धनकुटाको महालक्ष्मी नगरपालिका वडा नम्बर ४ का रामबहादुर कटुवाल कतारस्थित अल खोर हमाद हस्पिटलमा काम गर्दागर्दै कोरोना संक्रमित भए । लन्ड्री इन्जिनियरिङ अन्तर्गत मेन्टेन्स विभागमा काम गर्ने उनीसहित धेरै नेपाली संक्रमित भएका थिए ।

झण्डै १ महिनासम्म क्वारेन्टाइनमा बसेर उनीलगायत सबैले कोरोनालाई जिते । आइसोलेसनको अभाव भएपछि वैदेशिक रोजगारमा जाने सबैलाई एउटै क्वारेन्टाइनमा राखिएको थियो ।

क्वारेन्टाइनमा बस्दा बिहान र बेलुका खाना तथा दिउँसो खाजा कतार सरकारले दिएको थियो । उनका अनुसार संक्रमितलाई ए, बी र सी गरेर ३ ओटा श्रेणीमा विभाजन गरिएको थियो । उनी सी श्रेणीमा परेका थिए । सी श्रेणीमा पर्नेलाई उपचार गरिँदैन थियो । संक्रमित कसैलाई पनि ठूलो समस्या नदेखिए पनि शरीरमा आलस्यता आउने, चक्कर लाग्ने, शरीर कमजोर हुने र खानाको स्वाद नहुने लक्षण देखिएको उनले बताए ।

कतार सरकारले कोरोना संक्रमितलाई गरेको व्यवहार र क्वारेन्टाइनको व्यवस्थापन राम्रो हुनाले तथा संक्रमित ४ सयभन्दा बढी एकै ठाउँमा बस्दा मनोबल बढाउन सहयोग पुगेको उनको ठम्याइ छ ।

‘बिहान बेलुका खाना र दिउँसो नास्ता दिन्थ्यो । मिनरल वाटर पनि दिन्थ्यो,’ उनले सुनाए, ‘क्वारेन्टाइनको चारैतिर जाली लगाइएको थियो । बाहिर प्रहरी तैनाथ थिए । इन्टरनेटको सुविधा पनि थियो । नेट बिग्रिँदा डाटा चलाए पनि रिचार्ज कार्डको समस्या हुँदा क्वारेन्टाइनबाहिर भएका साथीले रिचार्ज गरिदिए ।

ओढ्ने, ओछ्याउने, दन्तमञ्जन, दारी काट्ने मेसिन आदिको व्यवस्था कम्पनीले नै गरिदिएको थियो । परिवारको सद्भाव, साथीभाइको हौसला र ईश्वरसँगको प्रार्थनाले आत्मबल बढाएको उनले सुनाए ।

डाक्टरले के भने
आँखा, नाक, मुखबाट भाइरस भित्र पस्ने हुनाले हात सफा राख्नुपर्ने र अनुहार छोइराख्ने बानी हटाउनुपर्ने सल्लाह डाक्टरले दिएका थिए । अन्य औषधी नखान र खानैपर्ने अवस्थामा आएमा जँचाएर मात्रै खान पनि डाक्टरले सल्लाह दिएका थिए । सिटामोल चाहिँ खाँदा हुन्छ भनेको थियो । तातो पानी र फलफूल प्रशस्त खाएको पनि उनले सुनाए ।

झण्डै १ महिना क्वारेन्टाइनमा बसेर निको भएका उनी २ साता आराम गरेपछि काममा फर्किएका छन् । आफ्नो स्वास्थ्यलाभको कामना गर्ने सबैलाई धन्यवाद पनि दिए । एक पटक संक्रमित भएकालाई पुनः दोहोरिन सक्ने सम्भावना १० प्रतिशतमात्रै हुने डाक्टरले भनेका र संक्रमण दोहोरिए पनि गाह्रो नहुने भनी डाक्टरले भनेका हुनाले ढुक्क भएर काममा जान थालेको उनी सुनाउँछन् ।

कम्पनीले आफू संक्रमितको भएको समयको पनि पारिश्रमिक दिनुका साथै फलफूल खानलाई भनेर ५ सय रियाल थपेको उनले सुनाए ।

थप समाचार पनि पढ्नुहोस्

स्वीडेनमा कोरोना जितेका अधिकारी दम्पत्ति भन्छन्ः घरै बसेर निको भयौँ (कोरोना जित्नेको अनुभवः १)

धनकुटाका रामजी र भोजपुरका उमेशलाई कतारमा कोरोना संक्रमण