विराटचोकः सामुदायिक भवन प्रदेश सरकारको बजेटमा सुन्दरहरैचा नगरपालिका वाडा नम्बर ११ स्थित शुक्रबारेमा बन्ने भएको छ ।
प्रदेश सांसद राजकुमार ओझाको हातबाट मक्करधन सामुदायिक भवनको बुधबार विधिवत् शिलान्यास भएको छ । प्रदेश सरकार भौतिक पुर्वाधार विकास मन्त्रालयको दुई करोड तीस लाख बजेटले सुन्दरहरैंचा ११ शुक्रबारेमा उक्त सुविधासम्पन्न भवन बन्न लागेको हो ।

रमेश खड्काको अध्यक्षतामा आयोजित शिलान्यास कार्यक्रममा प्रमुख अतिथी सांसद ओझा, विशेष अतिथि सुन्दरहरैंचा नगरपालिकाका नगरप्रमुख शिवप्रसाद ढकाल, उपमेयर धना तामाङ, सहरी विकास तथा भवन कार्यालय विराटनगरका प्रमुख रामसुवर्ण चौधरी अतिथिहरु वडाध्यक्षहरु विशनलाल चौधरी, रोशन ढकाल, उधोग वाणिज्य संघ सुन्दरहरैंचाका अध्यक्ष नवराज चापागाईंलगायतको उपस्थीति रहेको थियो ।

कार्यक्रमलाई सम्बोधन गर्दै प्रमुख अतिथि सांसद ओझाले निर्वाचनको समय वाहेक फरक बिचारधारा बोकेका राजनीतिक पार्टीहरु मिलेर विकासको निम्ति हातेमालोका साथ अघि बढ्नुपर्ने बताए । आफ्नो क्षेत्रभित्र संचालन हुने योजनाहरुमा यदि कसैले धाकधम्की दिएर चन्दा असुल्ने तथा गुण्डागर्दी गर्ने दुस्प्रयास गरेमा आफुलाई भन्न समेत आव्हान गरेका छन् । सामुदायिक भवनको निर्माणमा कुनैपनी कमजोरी नगर्न र मजवुत एवम् गुणस्तरिय बनाउन ठेकेदार कम्पनीको ध्यानाकर्षण समेत गराए । भवन निर्माणकोलागी ३ कठ्ठा जग्गा स्थानीय शोभितमान श्रेष्ठले निःशुल्क दिएका छन् ।

त्यस्तै कार्यक्रममा बोल्दै सुन्दरहरैंचाका नगरप्रमुख ढकालले माननीय ओझाको पहलमा प्रदेश सरकारद्वारा नगरमा निर्माण हुन लागेको वृहत् सामुदायिक भवन प्रती खुशी व्यक्त गरे । उक्त भवन निर्माणमा सहरी विकास डिभिजन कार्यालयलाई आवश्यक परे नगरपालिकाले प्राविधिक तथा अन्य सहयोग गर्ने समेत व्यक्त गरे ।

सामुदायिक भवन निर्माण हुने कुराले शुक्रबारेका जनता निकै हर्सित बनेका छन् । भवन बने पश्चात् सामाजिक कार्यक्रम गर्नका लागी ठुलो सहयोग पुग्ने र एकता समेत वृद्धि हुने स्थानीय यूवा समाजसेवी जय चौधरी वताउँछन् । स्वागत मन्तव्यमा बोल्दै शुक्रबारेका समाजसेवी मोहनलाल श्रेष्ठले यत्ति ठुलो बजेटमा समाजले मागेको सामुदायिक भवन निर्माण हुनलागेकोमा धन्यवाद समेत दिएका छन् ।
गत जेठ नौ गते लक्ष्मीमाता पि.एण्ड.जि. जेभी भद्रपुर झापासँग एक करोड पचास लाख छब्बीस हजार लागतमा ठेक्का सम्झौता भएको उक्त योजनाको एक बर्ष भित्र काम सक्ने सहमति भएको छ । निर्माण कार्यको रेखदेख एवम् अनुगमन प्रदेश सरकार सहरी विकास तथा भवन कार्यालय विराटनगरले गर्ने सांसद ओझाका  स्वकिय सचिव मिलन घिमिरेले जानकारी दिए ।