बेलबारीः शिक्षा मन्त्रालयले हालै जारी गरेको विद्यार्थी सिकाइ सहजीकरण निर्देशिका २०७७ र त्यसमा रहेका अवसर तथा चुनौतिहरुमा आधारित भएर बेलबारी जेसीजले बुधबार विज्ञहरुसँग छलफल गरेको छ ।
पटकपटक उत्कृष्ट शाखाको रुपमा पुरस्कृत भएको बेलबारी जेसीजले सो निर्देशिकामा देखिएका चुनौतीहरुका बारेमा सरोकारवालाहरुसँग छलफल गरेको हो ।
भर्चुअल माध्यमबाट आयोजना गरिएको छलफलमा शिक्षा मन्त्रालयका प्रवक्ता दीपक शर्मा, नेपाल राष्ट्रिय शिक्षक संगठनका राष्ट्रिय अध्यक्ष लक्ष्मण शर्मा, नेपाल शिक्षक महासंघका महासचिव लक्ष्मीकिशोर सुवेदी, शिक्षक महासंघका पूर्व केन्द्रीय अध्यक्ष केशव निरौला, नेपाल प्याब्सनका केन्द्रीय सह अध्यक्ष डिके ढुङ्गाना, नेपाल शिक्षक संघका अध्यक्ष राजेन्द्रराज पौडेल लगायत सहभागी थिए ।
सहभागीहरुले राखेका जिज्ञासाको उत्तर दिँदै शिक्षा मन्त्रालयका प्रवक्ता शर्माले अहिलेको अवस्थामा वैकल्पिक विधि नै एकमात्र भरपर्दाे विधि भएको बताए । प्रवक्ता शर्माले वैकल्पिक विधिको प्रयोग गर्दै विद्यार्थीको मूल्यांकन गरिने र शैक्षिक सत्रलाई खेर जान नदिइने कुरा समेत प्रष्ट पारे । प्रवक्ता शर्माले निजी तथा आवासीय विद्यालयहरुले स्थानीय सरकार र विद्यालय व्यवस्थापन समितिको रायबमोजिम कानुन अनुसार नै शुल्क लिन पाउने बताए । अनलाइन कक्षा तथा अन्य वैकल्पिक विधिद्वारा निजी विद्यालयहरुले सञ्चालन गर्दै आएका कक्षाहरुलाई मान्यता दिने कुरा समेत उनले स्पष्ट पारे ।
बेलबारी जेसीजका अध्यक्ष राजेश खत्रीका अनुसार छलफलमा देशभरका प्याब्सन तथा एन प्याब्सन, शिक्षक महासंघलगायतका संघसंस्थाका प्रतिनिधिहरु सहभागी थिए ।
You must be logged in to post a comment Login