विराटचोकः २०३३ सालमा स्थापना भएको कृषि विकास बैंक इन्द्रपुर शाखाको भवन त्यसको १२ वर्षपछि २०४३ सालमा बन्यो । भवन बनेको १५ वर्षपछि २०६० सालमा तत्कालीन नेकपा माओवादीले आगजनी गरी क्षति पुर्यायो । त्यसपछि सुरक्षाको कारण देखाउँदै बैंक सुनसरीको इटहरीमा सर्याे । तत्कालीन नेकपा माओवादी शान्ति प्रक्रियामा आएपछि २०६३ सालमा बैंक फेरि विराटचोकमा सर्याे र भाडाको घरमा बसेर सेवा दिन थाल्यो ।

भाडामा बसेर कार्यालय सञ्चालन भएको पनि डेढ दशक बित्न लाग्दा पनि भाडाकै घरबाट काम भइरहेको छ । आफ्नो भवनको रेखदेख, मर्मत सम्भार र सरसफाइ नहुँदा भवन झन्झन् जीर्ण बन्दै गएको छ । त्यसो त शाखाको भवन निर्माणका लागि हरेक वर्ष बजेट विनियोजन भए पनि भवन बन्न सकेको छैन । भवन निर्माणका लागि बैंकको केन्द्रीय कार्यालयलाई शाखा कार्यालय, सेवाग्राही, उद्योग वाणिज्य संघ तथा अन्य सरोकार निकायले पनि दबाब दिन सकेका छैनन् ।

लगातार २ आर्थिक वर्षअघिदेखि बजेट विनियोजन भए पनि भवन निर्माण हुन नसक्नुमा प्राविधिक जनशक्तिको अभाव हुनु नै मुख्य कारण रहेको शाखा प्रबन्धक विष्णु पाल बोहोरा बताउँछन् । सीमित जनशक्तिले अहिले भइरहेका भवनको मर्मत सम्भारमा ध्यान दिनुपर्ने हुनाले नयाँ भवन निर्माणका काम हुन नसकेको बोहोराले बताए ।

यो भवनका लागि बजेट विनियोजन गर्नमा तत्कालीन उपमहाप्रबन्धक चुडामणि तिम्सिनाले बढी जोड दिएका थिए । फलस्वरुप विगत ३ आर्थिक वर्षदेखि भवन निर्माणका लागि इन्द्रपुर शाखाको नाममा पनि बजेट विनियोजन भइरहेको छ । अहिले झाडी बढेर भवनको हाताभित्र पस्नै नसक्ने अवस्था भएको र त्यहाँ सर्प, अजिंगरलगायतका विषालु जीवको वासस्थान रहेको स्थानीय बताउँछन् ।

पूर्वपश्चिम राजमार्गले छोएको सो भवन अलपत्र अवस्थामा परेकै कारण बजार बिस्तारमा समेत समस्या भएको स्थानीय बताउँछन् । तर, स्थानीयले पनि भवन निर्माणमा खासै चासो नदेखाएको बोहोराको अनुभव छ । स्थानीयको चाहना बैंक आफ्नै भवनमा सरोस् भन्ने भए पनि औपचारिक रुपमा त्यस्तो माग नआएको उनले बताए ।

भवन मर्मत गरेर चलाउन सकिने अवस्थामा छ कि छैन भन्ने नै अहिले बैंकलाई नै थाहा छैन । भवन परिसरमा सफाइ गर्ने त परको कुरा भवनको गेटसम्म पुगेर हेर्ने र सफाइ गर्ने ‘जाँगर’ पनि नभएको हो कि जस्तो देखिने गरेको छ ।

तत्कालीन शाखा प्रबन्धक गोपाल पौडेलले २०७० सालमा जग्गाको सीमा विवाद मिलाएका थिए । त्यसपछि ५ कठ्ठा सो जग्गा सुरक्षित राख्न भवनको हातामा पर्खाल लगाएर गेट निर्माण गरिएको छ ।

अहिले कार्यालय सञ्चालन भइरहको भाडाको भवन पनि जीर्ण अवस्थामा रहेको छ । छतबाट पानी चुहिने समस्या हुनुका साथै झ्यालको सिसा फुटेको हुनाले छड्के पानी परेको समयमा शाखा प्रबन्धकको कार्यकक्षमा नै पानी पस्ने गरेको छ । घर मर्मतको जिम्मा घरबेटीको भए पनि घरबेटी नेपालबाहिर बस्ने हुनाले मर्मतसम्भारमा पनि समस्या भइरहेको शाखा प्रबन्धक बोहोरा बताउँछन् ।

बजेट छुट्याउनु तर भवन नबाउनुको रहस्य के हो भन्ने बारेमा पूर्व उपमहाप्रबन्धक तिम्सिना, पूर्व शाखा प्रबन्धक पौडेल र वर्तमान शाखा प्रबन्धक बोहोराको एउटै भनाइ छ । जनशक्तिको अभावमा नै काम नभएको हो र जनशक्ति पूर्ति हुन अझै लामै समय लाग्ने हो भने भवन निर्माण हुन अझै लामै समय लाग्ने देखिन्छ । नयाँ भवन निर्माण गर्नुपर्ने हो वा तत्काल पुरानै भवन मर्मत गरेर काम चलाउन पनि सकिन्छ भन्ने बारेमा पनि सम्बन्धित पक्षले खासै चासो लिएको देखिँदैन ।

सम्बन्धित समाचारः

‘भूत बङ्गला’ मा परिणत भएको कृषि विकास बैंकको इन्द्रपुर शाखा