विराटचोकः कोरोना संक्रमणको जोखिम बढिरहेको भन्दै सरकारले विद्यालय सञ्चालनमा रोक लगाएपछि सुन्दरहरैंचाका सामुदायिक विद्यालयले अनलाइन प्रविधि जुममार्फत् पढाउन थालेका छन् ।

शिक्षा मन्त्रालयले मंसिरमा अर्धवार्षिक परीक्षा गराउन विद्यालयलाई निर्देशन दिए पनि तराई र सुगम जिल्लाकै धेरै विद्यालय कसरी कक्षा सञ्चालन गर्ने र कसरी परीक्षा लिने भन्नेमा अन्योलपूर्ण अवस्थामा छन् । यसै क्रममा केही सामुदायिक विद्यालयले जुममार्फत् कक्षा लिन थालेका छन् । तर ती कक्षा प्रभावकारी भने नभएको विद्यालयको भनाइ छ ।

सुकुना माध्यमिक विद्यालयले कक्षा ११ र १२ तथा अंग्रेजी माध्यमको कक्षा अनलाइन विधिमार्फत् सञ्चालन गरिरहेको छ । विद्यालयका सहायक प्रधानाध्यापक राजेन्द्रप्रसाद गिरीका अनुसार विद्यालयले आज कात्तिक ४ गतेसम्म अनलाइन कक्षा लिइरहेको छ । कात्तिक ५ गतेदेखि भने दशैं बिदा दिएर कोजाग्रत पूर्णिमापछि कक्षा सञ्चालनको तयारी भइरहेको छ ।

उनका अनुसार सुकुनाले साउन महिनामा पनि अनलाइन कक्षा चलाएको थियो । त्यसबेला शुरुमा विद्यार्थीको संख्या उल्लेख्य भए पनि पछि विद्यार्थी घट्दै गएका थिए । तर अहिले भने विद्यार्थी बढ्दै गएका छन् ।

‘कक्षा ११ र १२ मा झण्डै ९० प्रतिशत विद्यार्थी अनलाइन कक्षामा सहभागी भएका छन्’, गिरीले भने, ‘अंग्रेजी माध्यमबाट पढाइ हुने ८, ९, १० कक्षामा पनि राम्रै उपस्थिति छ । तर नेपाली माध्यमबाट पढाइ हुने कक्षामा भने विद्यार्थीको संख्या थोरै छ ।’ नेपाल टेलिकमले उपलब्ध गराउने सियुजी (क्लोजर युजर ग्रुप) सिममार्फत् पढाइ सहज भए पनि मोबाइल नहुने अभिभावकलाई भने समस्या परेको उनले बताए ।

जनता मावि पचामका प्रधानाध्यापक हीरालाल साहूका अनुसार असोज २६ गतेदेखि अनलाइन कक्षामार्फत् पढाइ भइरहेको छ । तर विद्यार्थीको उपस्थिति भने न्यून छ । नेट चलाउनको लागि टेलिकमसँगको सहकार्यमा विद्यार्थीलाई सिम दिइए पनि राम्रोसँग नेट नचल्ने तथा नेट चलाउन मिल्ने फोन अभिभावकसँग नहुनु मुख्य समस्या रहेको छ ।

सहायक प्रधानाध्यापक सूर्यबहादुर बस्नेतका अनुसार सियुजी सिम १ सय ५० रुपैयाँमा विद्यार्थीलाई दिने गरिएको छ । त्यसमा डेढ जीबी डाटा चलाउन मिल्ने बस्नेत बताउँछन् । सियुजी सिम लिन पनि झण्झटिलो प्रक्रिया भएको उनले बताए । दशैंपछि अभिभावकसँग अन्तरक्रिया गरेर कक्षालाई कसरी व्यवस्थित बनाउन सकिन्छ भनेर निर्णय गरिने उनले बताए ।

श्रीखण्ड मावि सुन्दरहरैंचा ३ लोचनीका प्रधानाध्यापक घनश्याम भट्टराईका अनुसार सिकाइ सहजीकरण निर्देशिका अनुसार गाउँगाउँमा गएर अफलाइन विधिमार्फत् विद्यालयले शिक्षण गरेको थियो । साथै जोर बिजोर प्रणालीमार्फत् विद्यार्थीलाई विद्यालयमा बोलाएर स्वास्थ्य मापदण्ड अपनाएर पनि पढाइएको उनले बताए । पछि विद्यालयका एक जना कर्मचारीमा संक्रमण पुष्टि भएपछि कक्षा बन्द गरिएको उनले जानकारी दिए ।

जनता मावि सुन्दरहरैंचा–३ त्रियुगाले वैकल्पिक विधिबाट शिक्षण शुरु गरे पनि १ हप्ता पढाएर कक्षा बन्द गर्याे । प्रधानाध्यापक होमबहादुर भण्डारीका अनुसार ८, ९ र १० का विद्यार्थीलाई लक्षित गरेर कक्षा सञ्चालन गरिए पनि कक्षामा विद्यार्थीको उल्लेख्य उपस्थिति नभएपछि पठनपाठन बन्द गरियो ।

जनता मावि सुन्दरहरैंचा– ९ बुधबारेमा शिक्षकलाई जुम तथा अनलाइन कक्षा सञ्चालन गर्ने बारेमा तालीम दिइएको छ । कक्षा शुरु गर्ने तयारी गर्दागर्दै कर्मचारीमा कोरोना संक्रमण पुष्टि भएपछि तत्काललाई कक्षा स्थगित गरिएको छ । प्रधानाध्यापक रोहित ढकाल अनलाइन कक्षामा विद्यार्थीको सहभागिता भने कम देखिने गरेको अन्य विद्यालयका शिक्षकले भन्ने गरेका हुनाले प्रभावकारी हुनेमा शंका गर्ने ठाउँ रहेको बताउँछन् ।