विराटचोकः सामुदायिक विद्यालयका विद्यार्थीहरु वैकल्पिक शिक्षण सिकाइका माध्यमतर्फ आकर्षित हुन थालेका छन् । केही विद्यालयले शुरुमा जुममार्फत् अध्यापन थाले पनि सो सिकाइ प्रभावकारी नभएको भन्दै बन्द गरेका थिए । तर पछिल्लो समय कोरोना संक्रमणको दर बढिरहेको र संक्रमणको जोखिम कायमै रहेकाले शिक्षक, विद्यार्थी र अभिभावक सबैले वैकल्पिक शिक्षण विधिलाई नै तत्कालको लागि भरपर्दाे विधि मान्न थालेको पाइएको छ ।

साजीलाल माध्यमिक विद्यालयले अनलाइन शिक्षणलाई प्रभावकारी शिक्षण विधि मानेर अध्यापन गराइरहेको छ । प्रधानाध्यापक कल्याणप्रसाद सिटौलाका अनुसार अनलाइन शिक्षणमा कक्षा ६ देखि १२ सम्मका विद्यार्थीको राम्रो उपस्थिति छ । ‘७५ देखि ८० प्रतिशत विद्यार्थी उपस्थित छन्’, फोन सम्पर्कमा सिटौलाले भने, ‘नेपाली माध्यममा पढ्ने विद्यार्थीको उपस्थिति न्यून छ तर अंग्रेजी माध्यममा पढ्ने विद्यार्थीको उपस्थिति राम्रो छ ।’ पहिले केही समय प्रभावहीनजस्तो देखिए पनि पछि विद्यार्थीको उपस्थिति राम्रो हुँदै गएको उनले बताए ।

मोबाइल वा ल्यापटप किन्न नसक्ने र घरमा नेट जोड्न नसक्ने विद्यार्थीका लागि भने अनलाइन कक्षाले समेट्न नसकेको सिटौलाको भनाइ छ । प्रदेश सरकारले १० वर्षमा प्रदेशभरका विद्यालयमा डिजिटल माध्यमबाट पढाउने नीति लिएको र प्रारम्भिक चरणमा सुन्दरहरैंचाका साजीलाल, सुकुना, जनता मावि हरैँचा, श्री मावि मृगौलियालाई छनोट गरेकाले प्रदेश सरकारले नै साजीलालका शिक्षकलाई अनलाइन कक्षाको बारेमा लकडाउन अघि नै ३ महिने तालीम दिएको थियो । सो तालीमका कारण पनि पढाउन सहज भएको सिटौला बताउँछन् ।

महेन्द्र मावि शुक्रबारेले कक्षा ९ र १० का विद्यार्थीलाई अनलाइन विधिमार्फत् पढाइरहेको छ । सबैसँग मोबाइल र ल्यापटप अनि नेट नहुनु अहिलेका लागि चुनौतीपूर्ण भएको प्रधानाध्यापक सुनिलकुमार झाले बताए । नेटले राम्रोसँग काम नगर्दा पनि समस्या भएको उनले बताए ।
अनलाइन कक्षा लिइरहेका विद्यार्थीका अभिभावकले पनि राम्रो प्रतिक्रिया दिइरहेको तथा टीभी र रेडियोबाट पनि विद्यार्थीले अध्ययन गरिरहेको झा बताउँछन् । केही समय अघि ४\५ दिनजति दिनको २\३ घण्टाको दरले विद्यार्थीलाई स्कुलमा बोलाएर पढाए पनि कोरोना संक्रमणको दर बढ्न थालेपछि बन्द गरिएको उनले बताए ।

४ प्रतिशतसँग मात्रै अनलाइन सुविधा छ
ज्योति मावि सुन्दरहरैंचाले भने अनलाइन कक्षा शुरु गर्नुपूर्व सर्भे गरेको बताउँछन् प्रधानाध्यापक यामप्रसाद सिग्देल । सर्भेका क्रममा ४ प्रतिशत विद्यार्थी मात्रै अनलाइनको पहुँचमा भएको देखिएपछि अनलाइन कक्षालाई जोड नदिएको उनले बताए । साउन १५ पछि ९ र १० कक्षालाई ४ दिन विद्यालयमै बोलाएर पढाएको त्यसपछि बन्द गरिए पनि असोज ७ गतेपछि पुनः १५ दिनजति विद्यालयमै बोलाएर ९ र १० कक्षाका विद्यार्थीलाई पढाएको उनले बताए । त्यसपछि विद्यालय सेवा क्षेत्रमा कोरोना संक्रमणको दर बढेपछि पढाइ बन्द गरिएको उनले बताए ।

विद्यालयका शिक्षक हरेक महिना विद्यार्थीको घरघरमा पुग्ने गरेका छन् । अभिभावकसँग विद्यार्थीको पढाइको बारेमा जानकारी दिने र गृहकार्य दिने काम गरिएको उनले जानकारी दिए । प्रत्येक १५ दिनमा अभिभावकलाई फोन गरी विद्यार्थीको पढाइको बारेमा जानकारी लिने गरेको उनले बताए । रेडियो र टीभीको कक्षा पनि त्यत्ति प्रभावकारी नदेखिएपछि अभिभावकले ट्युसन पढाउनेलगायतका काम गरिरहेको पाइएको उनले जनाए ।

शिक्षा निकेतन माध्यमिक विद्यालयले कक्षा ८ देखि १२ सम्मका विद्यार्थीका लागि अनलाइन माध्यमबाट पढाइरहेको छ । प्रधानाध्यापक ठाकुरप्रसाद सुवेदीका अनुसार विद्यालयले कक्षा ८ देखि १२ सम्म अनलाइन कक्षा सञ्चालन गरिरहेको छ । अनलाइनबाट नै होमवर्क पनि दिने गरिएको छ । ५० प्रतिशत हाराहारी विद्यार्थी अनलाइन कक्षामा आउने गरेको उनले बताए ।

इन्टरनेटको समस्या भएका विद्यार्थीका लागि अफलाइन कक्षा सञ्चालन भइरहेको र विद्यार्थीको घरघरमा गएर भेटघाट गर्ने कार्यक्रम पनि भइरहेको उनले जानकारी दिए ।

सम्बन्धित समाचार

सुन्दरहरैंचाका सामुदायिक विद्यालयमा जुममार्फत् पढाइ हुँदै

टोलटोलमा गएर पढाउँदै बेलबारीका सामुदायिक विद्यालयहरु