विराटचोकः व्यवस्थित र सुरक्षित मानिएको इटहरी नगरपालिकाको आइसोलेसन सेन्टर अव्यवस्थित र दुर्गन्धित रहेको संक्रमितको भनाइ छ । त्यहाँ ल्याइने खाना गुणस्तरहीन भएको भन्दै आइसोलेसनमा बसी संक्रमणमुक्त भएका १ जना सञ्चारकर्मीले फेसबुकमा स्टाटस लेखेका छन् ।

सञ्चारकर्मी अर्जुन शर्माले फोन सम्पर्कमा भने, ‘त्यो आइसोलेसन मलाई त बधाशालाजस्तै लाग्यो ।’ संक्रमितलाई माया गर्नुपर्नेमा त्यस्तो नगरी खाना पुर्याउने सेनाले हप्कीदप्की गर्ने तथा संक्रमितको मनोबल गिराउने खालको काम गरेको उनको आरोप छ । संक्रमितलाई १४ दिनभन्दा बढी आइसोलेसनमा राख्न नमिल्ने भए पनि कतिपय संक्रमित २४ दिनसम्म आइसोलेसनमा बसेका उनले बताए ।

उनले मङ्गलबार बिहान फेसबुकमा लेखेको स्टाटस जस्ताको तस्तै यहाँ राखिएको छ ।

कोभिड – १९ को संक्रमण पुष्टि भएपछि इटहरी रंगशालाको एउटा खोरमा ११ दिन काट्दाको अत्यास सुनाइनसक्नुको रह्यो । रातिराती नेपाली सेनाका जवानहरुले पालैपालो बोलाएर दिने हप्कीदप्की, राती ९ बजेपछि हलमा अकास्मात प्रवेश गरी संक्रमितसँंग गर्ने अमानवीय व्यवहारको जति निन्दा र भत्र्सना गरे पनि कम हुन्छ ।

निरंकुश राजाको शासनमा पनि यस्तो व्यवहार सेनाले जनतालाई गरेन जस्तो लाग्छ । सुत्ने ठाउँमा सेनाको प्रवेश किन ? खानपिन र बिरामीको अवस्था बुझ्न स्वास्थ्यकर्मीको निरन्तर अनुगमन र निगरानी हुनुपर्ने यस्तो ठाउँमा कहिल्यै उनीहरु आएनन् र आउँदैन रहेछन् । मात्र सेना आउँदो रहेछ । राती साह्रोगाह्रो हुँदा संक्रमितलाई एम्बुलेन्समा हालेर पठाउने बाध्यता पनि संक्रमितहरुलाई थपिँदोरहेछ ।

टिनले बारेको ५०“×४०“ को छाप्रामा ६५ जना पुरुषहरुसम्म सुतियो र भनियो दुइ मिटर दुरी कायम छ । ४ चर्पी, २ बाथरुम यो भीडले प्रयोग गर्दाको हालतको बयान खोइ के गरौ ? दुई दिन लाइन जाँदाको गर्मी र राती टिनबाट चुहिने शीतले भिज्दाका कष्टहरु सबैका मुखमा झुन्डिन्थे ।

कुहिएको आलु र पाकेको फर्सिको एकनासे गन्धले अझै उल्टी आउन खोजिरहेछ । सोडा हालेर फुलाएको भात, प्लास्टिकमा पोका पारेर पछार्दै ल्याएको पानीजस्तो मुसुरो दाल, घरिरी आउने अचार र एक पित्को सागको सहारामा बाँच्दाको सास्ती सबैका आत्मीय बनिरहे ।

रात कटाउने खोरकै सिरान पारेर तयार गरेको खाल्डाबाट आउने दालभातको कुहिगन्ध, दिनभरी चप्पलहरुले उडाउने बालुवा र धुलो, जुट अनुसन्धानले दुई दिन आडैमा चलाएको थ्रेसरको ढुटो नाकमा पसेर हैरान ।

झ्याल खोलौँ धानका कीराफट्याङ्राको आक्रमण नखोलौ उकुसमुकुस । जताततै छरिएको फोहोर । हैट, धाराबाट आउने फोहोर लेदोपानी । तर यो ‘आइशोलेसन नेपाल अधिराज्यकै सबैभन्दा राम्रो’ भन्दैथे एक स्थानीय जनप्रतिनिधि । स्वास्थ्यकर्मी उपस्थित नहुने यस्तो ठाउँको पिपिइ चै सेना र सेनिटाइज गर्न आउने नगरपालिकाका स्टाफले मात्र लाउने रहेछन् ।

धेरै भन्नु छ तर अहिले केही साक्षीहरुका साथ यत्ति । मेरो स्थानीय सरकार प्लिज संक्रमितलाई सेना नलगाऊ । संक्रमितहरुलाई एउटा सुझाव भरसक घरैमा बस्नोस्, घर छैन भने खोलाछेउको रुखको छहारीमा बस्नोस्, म चिउरा र तरकारी उपलब्ध गराउँला ।

सम्बन्धित समाचार
इटहरी आइसोलेसमा दशैंः संक्रमित ७८ वर्षीयाले लगाइदिइन् टीका र जमरा