विराटचोकः नेपाली सञ्चारमाध्यम महिलामैत्री नभएको महिला अधिकारकर्मीले बताएका छन् । लैंगिक हिंसाविरुद्धको १६ दिने अभियानको समापन कार्यक्रममा बोल्दै ओरेक नेपालका दीपक सेन्चुरीले सञ्चारमाध्यम महिलामैत्री नभएको आरोप लगाए । ‘समाचार आउँदा पीडितलाई झन् पीडा दिने गरी समाचार आउँछ । विशेष गरी, बलात्कारजस्तो अपराधमा पीडितलाई नै पीडा दिने गरी समाचार आउँछ’, उनले भने, ‘पीडकको मनोबल गिर्ने गरीको समाचारको शीर्षक हुनुपर्छ ।’ महिला आफ्नै घरमा हिंसापीडित भए पनि त्यसको बारेमा आवाज उठाउन नसकेको उनको भनाइ थियो ।

कार्यक्रमका प्रमुख अतिथि सुन्दरहरैंचा नगरपालिकाका प्रमुख शिवप्रसाद ढकालले विश्वभर नै अपराध न्यूनीकरण हुने निर्मूलीकरण नहुने हुँदा अभियानकर्मीले महिला हिंसासम्बन्धी कार्यक्रम दिवस विशेष पारेर मात्रै गर्न नहुने बताए । नगरपालिकाले हिंसापीडित महिलालाई लक्षित गरेर आत्मनिर्भरसम्बन्धी विभिन्न कार्यक्रम ल्याएको र वडाको २० प्रतिशत बजेट सामाजिक क्षेत्रमा खर्च गर्नैपर्ने नियम ल्याइएको बताए । आवश्यक परेमा कानुनी परामर्शको लागि नगरपालिकामा महिला कानुनी सल्लाहकार पनि राख्न सकिने उनले जनाए ।

कार्यक्रमकी सभापति तथा सुन्दरहरैंचा नगरपालिकाकी उपप्रमुख धनमाया तामाङले अहिलेको समयमा पीडित महिलाको पक्षमा आवाज उठाउन सबैको साथ पाइरहेको बताउँदै कतिपय कानुनी जटिलताका कारण न्याय सम्पादनमा ढिलाइ हुने गरेको बताइन् । सर्वसाधारण र पीडितले कानुनी प्रक्रिया नबुझ्दा पनि न्याय सम्पादन गर्ने निकायले पीडित र सर्वसाधारणको गाली खानु परेको उनको भनाइ थियो ।

इलाका प्रहरी कार्यालय बेलबारीका प्रमुख ऋषिराज ढकालले पीडितलाई आफ्नो कुरा राख्न सहज होस् भनेर प्रहरी कार्यालयमा महिला, बालबालिका तथा ज्येष्ठ नागरिक सहायता कक्ष स्थापना गरिएको बताए । महिला हिंसाका घटनासम्बन्धी उजुरी परेमा प्राप्त प्रमाणका आधारमा जति सक्दो चाँडो सो उजुरीका सम्बन्धमा छानबिन गर्ने गरिएको उनको भनाइ थियो ।

अभियानकर्मी सुशीला कार्कीले अभियानकर्ता नै हिंसामा परे के गर्ने भन्ने बारेमा सोच्न जरुरी रहेको बताइन् । अभियानकर्मीले जुटाएका प्रमाण र अभियानकर्मीको मिहिनेतलाई प्रहरीले महत्व नदिने गरेको आफूले पाएको उनले बताइन् ।

द्वन्द्वपीडित भगवती न्यौपानेले आफू कानुन नै नभएको देशमा बसेजस्तो आभास भएको बताइन् । आफू द्वन्द्वपीडित भएको र पछिल्लो समय सामाजिक हिंसामा समेत परेको बताइन् । वडा, प्रहरी र नगरपालिकाले आफ्नो समस्यामा खासै चासो नदिएको उनको आरोप थियो ।

अभियानकर्मी कल्पना घिमिरेले पीडितको लागि आवास गृहको खाँचो रहेको बताइन् । सीपमूलक तालीमका प्रदान गर्नुका साथै हिंसापीडितका लागि दीर्घकालीन सहयोग पुग्ने गरी एउटा कोषको स्थापना गरी सोही कोषमार्फत् खर्चको व्यवस्थापन गर्न उनले सुझाव दिइन् ।

कार्यक्रममा सुन्दरहरैंचा नगरपालिकाको महिला तथा बालबालिका शाखा प्रमुख सुशीला अधिकारी तथा नगरपालिका भित्रका विभिन्न संघ संस्थाका प्रतिनिधिको उपस्थिति थियो ।