विराटचोकः मोरङको सुन्दरहरैंचामा जारी प्रदेशस्तरीय भेट्रान नकआउट फुटबल प्रतियोगिताको फाइनलमा आयोजक टिम विराट भेट्रान विराटचोक र झापा भेट्रान भिड्ने भएका छन् । सोमबार भएको सेमीफाइनलमा झापाले लखनपुर भेट्रान दमकलाई र आयोजक टिमले धरानलाई पराजित गरी फाइनलमा पुगेका हुन् ।

सोमबारको पहिलो सेमीफाइनलमा झापा भेट्रानले लखनपुर भेट्रान दमकलाई ४–० गोलको भारी अन्तरले हराउँदै फाइनलमा प्रवेश गरेको छ । आयोजक टिमले धरानलाई १–० गोलको अन्तरले पराजित गर्दै फाइनलमा प्रवेश गरेको हो ।

झापाका खेलाडी रमेश गुरुङले खेलको ८ औँ मिनेटमा पहिलो गोल गरेका थिए । श्याम तामाङले खेलको २८ औँ मिनेटमा र ३२ औँ मिनेटमा गोल गर्दै आफ्नो टिमलाई ३ गोलको अग्रता दिलाएका थिए । युगलकिशोरले खेलको ५० औँ मिनेटमा थप गोल गरेर झापाले ४–० को फराकिलो अन्तरले लखनपुर भेट्रान दमकलाई पराजित गरेको थियो ।

दोस्रो सेमीफाइनल खेलमा भने धरानसँग आयोजक टिमको प्रतिस्पर्धात्मक खेल भएको थियो । खेलको निर्धारित समय सकेर थप भएको इन्जुरी समयको पहिलो मिनेटमा आयोजक टिमका सुमन श्रेष्ठले गोल गरेर फाइनलको यात्रा सुनिश्चित गरेका हुन् । आयोजक टिम फाइनलमा पुग्नुमा आयोजक टिमका गोलरक्षक मणि मगरको महत्वपूर्ण भूमिका रह्यो । विपक्षी टिमका सबै प्रहार मगरले विफल बनाएका थिए ।

पहिलो सेमीफाइनलको म्यान अफ दि म्याच झापाका खेलाडी श्याम तामाङ घोषित भए । दोस्रो सेमीफाइनलको म्यान अफ दि म्याच आयोजक टिमका मणि मगर घोषित भए । दुवैले एक एक हजार नगद पुरस्कार प्राप्त गरे ।

प्रतियोगितामा विधागत पुरस्कारमा म्यान अफ दि सिरिजले रु.३ हजार प्राप्त गर्नेछन् भने सर्वाधिक गोलकर्ता, उत्कृष्ट गोलरक्षक, उत्कृष्ट डिफेन्स, उत्कृष्ट मिडफिल्डर लगायतले रु.१ हजार ५ सय प्राप्त गर्नेछन् । प्रतियोगिताको विजेताले उपाधिसहित ५१ हजार १ सय ११ रुपैयाँ र उपविजेताले ३० हजार ३ सय ३३ रुपैयाँ प्राप्त गर्ने छन् ।

फाइनल खेल आज हुँदैछ ।