विराटचोकः नेपाल पत्रकार महासंघको प्रदेश अध्यक्षमा पराजित भएका मोहनकाजीले प्रतिद्वन्द्वी लीलाबल्लभ घिमिरेलाई सामाजिक सञ्जालमार्फत् बधाई दिएका छन् ।

‘मित्र लिलाबल्लभ घिमिरेलाई प्रदेश नम्बर १ को नेपाल पत्रकार महासंघको गरिमामय अध्यक्ष पदमा विजयी हुनुभएकोमा हार्दिक बधाइ’, उनले लेखेका छन्, ‘अरू विजयी साथीहरूलाई पनि बधाई ।’

चुनावसम्म भिन्न समूह बनाएर हामीले उन्नत लोकतान्त्रिक अभ्यास गरे पनि अब हामी महासंघको छातामुनि बसेर हाम्रो पत्रकारितालाई राम्रो बनाउने साझा अभियानमा लाग्नुपर्ने उनले उल्लेख गरेका छन् ।

यस्तो छ उनले सामाजिक सञ्जाल फेसबुकमा लेखेको स्टाटसः
मित्र लिलाबल्लभ घिमिरेलाई प्रदेश नम्बर १ को नेपाल पत्रकार महासंघको गरिमामय अध्यक्ष पदमा बिजयी हुनुभएकोमा हार्दिक बधाइ । अरू विजयी साथीहरूलाई पनि बधाइ ।

चुनावसम्म भिन्न समूह बनाएर हामीले उन्नत लोकतान्त्रिक अभ्यास गरेका थियौं । अब हामी महासंघको छातामुनि बसेर हाम्रो पत्रकारितालाई राम्रो बनाउने साझा अभियानमा लाग्नेछौं । तपाईंहरूको कार्यकाल नेपाली पत्रकारिताको इतिहासमा सुनौलो अक्षरले लेखियोस् ।

तपाईंको ओजपूर्ण नेतृत्वमा हाम्रो प्रदेशको पत्रकारिता उदाहरणीय बन्ने विश्वास व्यक्त गर्दछौं । समावेशी लोकतन्त्र तथा प्रेस स्वतन्त्रताको रक्षा, श्रम गरेर पनि उचित पारिश्रमिक नपाउने श्रमजीवी पत्रकारको पेशागत सुरक्षा, व्यावसायिक पत्रकारिताको विकास, स्थानीय विज्ञापनमा अग्राधिकार नपाउँदा ओइलाउँदै गरेका स्वरोजगारमूलक साना मिडियाको प्रबर्द्धन, संघीयताको मर्म अनुरूप समावेशी मिडियाको उत्थान लगायतका एजेन्डामा हामी सँधै साथमा रहनेछौं ।

महासंघलाई गरिखाने पत्रकारहरूको हक हितमा समर्पित संस्थाको रूपमा रूपान्तरण गर्न नेतृत्व प्रदान गर्ने मेरो सानो सपना थियो । आम पत्रकारहरूको मन जितेको अनुभूति गरेको छु । मत जित्न सकिन । प्रतिकूल परिस्थितिमा समेत गृहजिल्ला झापा, प्रिय इलाम र मेरो प्यारो ओखलढुङ्गासहित १४ जिल्लाबाट मलाई सम्मानजनक विश्वासको मत दिनुहुने सम्पूर्ण अग्रज तथा सहकर्मी पत्रकारहरूमा हृदय ओछ्याएर नमन गर्दछु ।

चुनावी लोकतान्त्रिक अभ्यासमा सहभागी सबै पत्रकार, निर्वाचन सफल बनाउन अहोरात्र खट्नुहुने निर्वाचन समिति, सुरक्षाकर्मी, स्वयमसेवीहरू, आम सञ्चारका माध्यमहरू, महासंघको प्रदेश तथा जिल्ला समिति लगायत सम्पूर्णमा कृतज्ञता व्यक्त गर्दछु ।

मलाई अध्यक्ष पदको उम्मेदवार जस्तो गहन जिम्मेवारीयुक्त अवसर प्रदान गर्ने प्रेस चौतारी नेपाल र हाम्रो गठबन्धनका सहयात्रीहरूप्रति हार्दिक आभार व्यक्त गर्दछु ।