विराटनगरः विराटनगरको शहीद रंगशालामा जारी छैटौं विराट गोल्डकपमा भारतको युनाइटेड फुटबल क्लब वेस्ट बंगाललाई हराउँदै विराटनगर ११ सेमीफाइनलमा प्रवेश गरेको छ ।
शनिबार भएको पहिलो क्वाटरफाइनल खेलमा भारतको वेस्ट बंगाललाई ३–० गोलले हराउँदै विराटनगर सेमीफाइनलमा प्रवेश गरेको हो । अब विराटनगरले चैत ३० गते हुने सशस्त्र प्रहरी बल, काठमाडौ र नेपाल प्रहरी काठमाडौबीचको विजेता टिमसँग प्रतिस्पर्धा गर्नेछ ।
खेलमा सुनिल खड्काले २ र प्रकाश बुढाथोकीले १ गोल गरेका थिए । खेलको २५ औं मिनेटमा सुनिल खड्काले गोल गरी टिमलाई अग्रता दिलाएका थिए । पहिलो हाफमा विराटनगरले भारतलाई दबाबमा राखेको थियो । तर थप गोल गर्न सकेन ।
पहिलो हाफमा १ गोलले पछि परेको भारतले दोस्रो हाफमा पनि राम्रो खेल प्रदर्शन गर्न नसक्दा धेरै पटक गोल गर्नबाट चुक्यो । खेलको ८६ औं मिनटेमा विराटनगरका प्रकाश बुढाथोकीले डिबक्स भित्रबाट गरेको प्रहारले चाली चुम्यो । त्यसको २ मिनेटमै सुनिल खड्काले खेलको ८८ औं मिनेटमा गोल गरे ।
खेलको म्यान अफ द म्याच विराटनगरका तर्फबाट २ गोल गर्ने सुनिल खड्का घोषित भए । उनले नगद १० हजार रुपैयाँ पाए ।
आजको दोस्रो क्वाटरफाइनल खेल मछिन्द्र क्लब काठमाडौ र भारतको पञ्जाब पुलिस बीच हुनेछ । भारतको पंजाबले शनिबार टाइब्रेकरमा गोरखा ब्वाइज क्लब रुपन्देहीलाई ४–२ गोलले हराएर अघिल्लो चरणमा प्रवेश गरेको थियो ।
थप समाचारः
विराट गोल्ड कपमा पञ्जाब पुलिस क्लब क्वाटरफाइनलमा
You must be logged in to post a comment Login