विराटचोकः मोरङको सुन्दरहरैंचाको गोठगाउँमा रहेको पूर्वाञ्चल विश्वविद्यालय गम्भीर आर्थिक एवं प्रशासनिक संकटतर्फ गइरहेको भन्दै विश्वविद्यालयको बेथिति रोक्न कर्मचारीले विज्ञप्तिमार्फत् ध्यानाकर्षण गराएका छन् ।

पूर्वाञ्चल विश्वविद्यालय कर्मचारी संघ केन्द्रीय समितिले विज्ञप्ति जारी गर्दै समस्या समाधानको माग राखेर उपकुलपति डा. यादवराज कोइरालाको ध्यानाकर्षण गराएको हो । मनोमानी रूपमा अघि बढ्ने प्रवृत्ति हाबी हुँदा विश्वविद्यालयको शाख गिर्दै गएको विज्ञप्तिमा उल्लेख छ ।

संघका सभापति राजकुमार सापकोटाका अनुसार महामारीका कारण विश्वविद्यालय ठप्प हुँदा परीक्षा तथा सम्बन्धन शुल्कबाट प्राप्त हुने आम्दानी ५० प्रतिशतले घटेको छ । विश्वविद्यालयमा व्यवस्थापन, कानुन, चिकित्साशास्त्र, विज्ञान तथा प्रविधि, इन्जिनियरिङ, कला र शिक्षाशास्त्र गरेर सात वटा संकायमा ६० शैक्षिक कार्यक्रम सञ्चालित छन् । कोरोना महामारीका कारण परीक्षा, पठनपाठन लगायत सबै शैक्षिक गतिविधि ठप्प हुँदा नियमित रूपमा प्राप्त हुने परीक्षा शुल्क र क्याम्पसहरुको सम्बन्धन शुल्क घटिरहेको छ ।

चिकित्साशास्त्र संकायअन्तर्गतका चारवटा शैक्षिक कार्यक्रममा चिकित्सा शिक्षा आयोगले सम्बन्धन प्राप्त १६ वटा क्याम्पसलाई विद्यार्थी भर्नामा रोक लगाएको तथा स्वीकृत कोटासमेत ४० प्रतिशत कटौती भएको सापकोटाले बताए । विश्वविद्यालयलाई मजवुत एवं सक्षम बनाउनेतर्फ र विद्यार्थीको सिकाई र शैक्षिक कार्यक्रमलाई प्रभावकारी बनाउनतर्फ ध्यान नदिई अनावश्यक नियुक्तितिर मात्रै ध्यान दिइएको सापकोटाको आरोप छ ।

नियममावली तथा सांगठानिक संरचनामा समेत व्यवस्था नभएको पद सिर्जना गर्दै नियुक्ति गर्दा विश्वविद्यालयमा आर्थिक भार थपिँदै गएको संघले जनाएको छ । परीक्षा विनियमावली संशोधन र मोरङको गोठगाउँमा सञ्ंचालन गरिएको शिक्षण अस्पताललाई व्यवस्थित बनाउने विषय प्राथमिकतामा नपरिरहेका बेला नयाँ सम्बन्धन खुला गरिनु एवं कोटा तथा नयाँ शैक्षिक कार्यक्रम थपका लागि प्रक्रिया अघि बढाइनुमा विश्वविद्यालयको बदनियत देखिएको विज्ञप्तिमा उल्लेख छ ।

प्राज्ञिक तथा प्रशासनिक उन्नयनका लागि विभिन्न समयमा राखेका मागलाई बेवास्ता गर्दै एकलौटी रूपमा विश्वविद्यालय सञ्चालन गर्न खोजिएको र यस्ता गतिविधिले सम्बन्धित पदाधिकारीको अभिलाषा पूरा भए पनि विश्वविद्यालयको दीर्घकालीन उन्नयनमा असर पुग्ने विज्ञप्तिमा उल्लेख छ ।

जथाभावी पदाधिकारी एवं कर्मचारीको नियुक्ति, भौतिक तथा विलासी जीवनशैली अपनाएर गरिएको स्रोत साधनको दुरूपयोग र आवश्यकतालाई पर पारेर फरक ढंगले हिँडनेजस्ता कार्य विश्वविद्यालयमा तत्काल बन्द हुनुपर्ने माग राखेको संघले वार्ताका माध्यमबाट माग पूरा र समस्याको समाधान नभए खरो रूपमा उत्रन बाध्य हुने चेतावनी दिइएको छ ।