विराटचोकः निजी तथा आवासीय विद्यालय अर्गनाइजेसन नेपाल प्याब्सनको सुन्दरहरैंचा नगर कमिटी अधिवेशन आज सम्पन्न भएको छ ।

अधिवेशनमा नगर अध्यक्ष हरिश्चन्द्र ढकालले आफ्नो कार्यकालमा भएका विभिन्न १३ कामहरुको विवरण समेटिएको प्रतिवेदन प्रस्तुत गरेका थिए । नगरपालिकालाई कोभिड व्यवस्थापनमा सहयोग गर्न ५ लाख २९ हजार रुपैयाँ सुन्दरहरैंचा प्याब्सनले प्रदान गरेको पनि उनले सो अवसरमा बताए ।

अधिवेशनको उद्घाटन सत्रलाई प्रमुख अतिथिको आसनबाट सम्बोधन गर्दै सुन्दरहरैंचा नगरपालिकाकी उपम्रमुख धनमाया तामाङले निजी विद्यालयको शैक्षिक गुणस्तर प्रशंसनीय भएको बताइन् । शैक्षिक गुणस्तर कायम राख्न कति समस्या हुन्छ र त्यसमा विद्यालय व्यवस्थापन समिति र शिक्षक कत्ति खट्नुपर्छ भन्ने बारेमा आफू जानकार भएको उनको भनाइ थियो ।

शुभकामना मन्तव्य दिँदै प्याब्सन जिल्ला अध्यक्ष अर्जुन बस्नेतले सरकारले संस्थागत विद्यालय लाई हेर्ने द्रृष्टिकोण फरक भएको पनि स्थानीय सरकार सुन्दरहरैंचा नगरपालिकाले भने निजी र सरकारी विद्यालयलाई भेदभाव नगरेको बताए । आगामी दिनमा पनि यसले निरन्तरता पाउनेछ भन्नेमा निजी विद्यालयका सञ्चालकहरु आशावादी रहेको उनको भनाइ थियो ।

प्याब्सनको प्रदेश नम्बर १ का वरिष्ठ उपाध्यक्ष टीकाराम ढकालले गुणात्मक शिक्षा अहिलेको आवश्यकता भएको र कोभिड महामारीको समयमा यो झन् अपरिहार्य भएको बताए । कोभिडका कारण शिक्षा क्षेत्र मारमा परे पनि कोभिडको समयमा गुणस्तरीय शिक्षा दिन सक्ने विद्यालयलाई अभिभावकले कहिल्यै नभुल्ने बताए । निजी विद्यालयले हरसम्भव प्रयास गरेर गुणस्तरीयता घट्न नदिएको उनको भनाइ थियो ।

प्याब्सन केन्द्रीय सदस्य हेमन्त कार्कीले निजी विद्यालयका सञ्चालकहरु प्रतिष्पर्धी नभएर सहयोगी भावनको भएको बताए । बेरोजगारी घटाउन निजी विद्यालयको उल्लेखनीय योगदान रहे पनि त्यसलाई राज्यले खासै चासो नदिएको उनले बताए ।

कार्यक्रममा सञ्चार क्षेत्रको माध्यमबाट नागरिकहरुलाई सुसूचित गर्न सफल भएको भन्दै सञ्चारकर्मी ज्ञाननाथ ढकाललाई सम्मान गरिएको थियो । त्यस्तै, सुन्दरहरैंचाको पुरानोमध्येको संस्थागत विद्यालय माउण्ट मकालु आवासीय माध्यमिक विद्यालयका सञ्चालक हेमन्त कार्की र २ दशकसम्म शिक्षकको रुपमा काम गरिरहेका जीतबहादुर राईलाई पनि कार्यक्रममा सम्मान गरिएको थियो ।

सम्मानित व्यक्तिमध्ये राईले आफ्नो धारणा राख्दै विद्यालयले जनशक्तिलाई टिकाइराख्न गाह्रो भए पनि काम गर्ने सहज वातावरण भएमा सम्भव हुने बताए ।

अधिवेशनले नयाँ नेतृत्व पनि चयन गर्ने भएको छ ।