विराटचोकः सुन्दरहरैंंचा– ८ सलकपुरमा रहेको सलकपुर बचत तथा ऋण सहकारी संस्थाले आह्वान गरेको जग्गा बिक्रीको टेण्डर बदनियतपूर्वक रद्द गरी आफूहरुलाई मारमा पारेको टेण्डर आवेदकले आरोप लगाएका छन् ।

सञ्चालक समिति अनुकूलका व्यक्तिलाई टेण्डर नपर्ने भएपछि बदनियतपूर्वक टेण्डर रद्द गरिएको पीडित हरिमाया श्रेष्ठका आफन्तले बताए । आइतबार सलकपुरमा पत्रकार सम्मेलन गर्दै उनीहरुले सहकारीका सञ्चालक अनुकूलका व्यक्तिलाई टेण्डर नपर्ने भएपछि टेण्डर प्रक्रिया नै रद्द गरेको आरोप लगाए ।

‘सहकारीले न्यूनतम ५६ लाख रुपैयाँमा जग्गा बिक्री गर्ने टेण्डर आह्वान गरेपछि हामीले ५८ लाख ५ हजार ६ सय ७८ रुपैयाँमा जग्गा खरीद गर्ने भनी सो रकमको १० प्रतिशत ५ लाख ८० हजार ५ सय ६८ रुपैयाँ सहकारीको खाता रहेको बैंकमा जम्मा गर्याैँ’ पीडित हरिमायाका छोरा अनिल श्रेष्ठले भने, ‘अर्का निवेदकले ५६ लाख रुपैयाँमा जग्गा खरीद गर्ने भनी सो रकमको १० प्रतिशत रकमको बैंक भौचर बुझाएको तर निवेदनमा भने ५९ लाख ५९ हजारमा जग्गा खरीद गर्ने भनेर लेखिएको रहेछ ।’ जग्गा ५९ लाख ५९ हजार रुपैयाँमा किन्न चाहने निवेदक यशोदा सिंखडालाई बिक्री गर्ने भनी सञ्चालक समितिले भनेपछि आफूहरुले आपत्ति जनाएपछि सिंखडाको बोलपत्र रीत नपुगेको तथा एक जाना मात्रै आवेदक भएको जनाई टेण्डर नै रद्द गरिएको श्रेष्ठले आरोप लगाए ।

सिंखडाले ५९ लाख ५९ हजारको १० प्रतिशतको भौचर नभए पनि सो निवेदन स्वीकृत गरी दर्ता गरिएको तर आफूहरुले विरोध गरेपछि टेण्डर नै रद्द गरिएको उनको भनाइ छ । न्यूनतम कति जनाको टेण्डर पर्नुपर्ने भन्ने टेण्डर आह्वानमा नभए पनि एक जनाको आवेदन रद्द भएपछि अर्का निवेदकको आवेदन स्वीकृत गर्नुपर्नेमा त्यसो नगरी टेण्डर नै रद्द गर्नुपर्ने कारण नै नभएको उनले बताए ।

‘सहकारी सञ्चालक समितिले जहाँ गएर जे गर्नुहुन्छ गर्नुहोस् भनेको छ’, उनले भने, ‘नगरपालिकासँग यस विषयमा छानबिन गर्न माग गर्दा नगरपालिकाले हाम्रो निवेदन नै लिन मानेन । त्यसैले हामीले अख्तियारलगायतका निकायमा छानबिनको माग गर्दै निवेदन दियौँ ।’

आफूहरुले प्रदेश नम्बर १ को भूमि व्यवस्था कृषि तथा सहकारी मन्त्रालय, अख्तियार दुरुपयोग अनुसन्धान आयोग, इलाका प्रहरी कार्यालय बेलबारी, जिल्ला प्रशासन कार्यालय मोरङ र सम्पत्ति शुद्धीकरण विभागमा घटनाको बारेमा जानकारी दिँदै निवेदन दिएको उनले बताए ।

पत्रकार सम्मेलनमा बोल्दै श्रेष्ठका छिमेकी हरिनारायण श्रेष्ठ तथा ईश्वर निरौलाले हरिमाया श्रेष्ठले सो जग्गा किन्न पाउनुपर्ने तथा सहकारीले अनावश्यक जालसाँजी गर्ने काम गरिएको देखिएको बताए ।

यस विषयमा सहकारीका व्यवस्थापक डेगिन्द्रप्रसाद सुवेदीसँग बुझ्दा एउटा निवेदन रद्द भएको र एक मात्र प्रतिष्पर्धी भएकाले सञ्चालक समितिको निर्णयले पुनः टेण्डर आह्वान गरिएको जनाए ।

सहकारी संस्थाका अध्यक्ष बाबुराम ढकालले एउटा निवेदन रद्द भएपछि एक्लो प्रतिष्पर्धी भएपछि टेण्डर रद्द गर्नु उचित देखेर रद्द गरिएको जनाए । चाँडै नै पुनः टेण्डर प्रकाशन गरी जग्गा बिक्री गरिने बताए । श्रेष्ठ परिवारले आरोप लगाएजस्तो आफन्तलाई सो जग्गा कम मूल्यमा बिक्री गराउन नखोजिएको उनले बताए ।

‘आफन्तलाई नै जग्गा पार्ने चाहना थियो भने हामी हाम्रा धेरै जना आफन्तको नाममा टेण्डर हाल्ने थियौँ’, उनले भने, ‘श्रेष्ठ परिवारले कुरै नबुझी हामीमाथि आरोप लगाएको मात्रै हो ।’

सो सहकारीले आफ्नो नाममा सुन्दरहरैंचा ११ मा रहेको साबिक मृगौलिया ७ ‘ग’ को कित्ता नम्बर २५७ को ७ कठ्ठा जग्गा लिलाम बढाबढमा बिक्री गर्न कात्तिक १० गते उद्घोष दैनिकमा सूचना प्रकाशन गरेको थियो । कात्तिक १६ गते कार्यालय समयभित्र दरखास्त दिन आह्वान गरिएको सूचनामा कात्तिक २३ गते बोलपत्र खोलिने र बोलपत्र स्वीकृत भएको मितिले ५ दिनमा सम्झौता गरिसक्नुपर्ने उल्लेख थियो । सम्झौता भएको मितिले २ महिनाभित्रमा कारोबार गरिसक्नुपर्ने र सो समयमा कारोबार गर्न नसकेमा धरौटीको २५ प्रतिशत रकम कट्टा गरी बाँकी रकम फिर्ता गरिने उल्लेख थियो ।