विराटचोकः नेपाली कांग्रेसको १४ औँ महाधिवेशन अन्तर्गत वडा, पालिका र निर्वाचन क्षेत्रस्तरीय अधिवेशन सम्पन्न भइसकेको छ । मोरङमा भोलि मंसिर ७ गते महाधिवेशन प्रतिनिधिका लागि निर्वाचन हुँदैछ । महाधिवेशन प्रतिनिधिका लागि उम्मेद्वारी दिएका नेपाली कांग्रेसका पुराना र सक्रिय कार्यकर्ता देवीप्रसाद डाँगीसँग गरिएको कुराकानी डाँगीकै शब्दमाः
म २०२६ सालदेखि नेपाली कांग्रेसमा आबद्ध भएको हुँ । नेपाली काङ्ग्रेसको प्रजातान्त्रिक समाजवाद सिद्धान्त मन परेर कांग्रेसमा लागेको हुँ । तत्कालीन अवस्थामा चीनमा जनताको जनजीविका कम्युनिष्ट पार्टीले पूरा गर्छ भनेर भनिएको थियो । बीपीको प्रजातान्त्रिक समाजवादमा भने कम्युनिष्टहरुले भनेको साम्यवादको पनि ग्यारेन्टी गरिएको थियो । त्यसैले मलाई साम्यवाद भन्दा प्रजातान्त्रिक समाजवाद मन पर्याे र कांग्रेसमा आबद्ध भएँ ।

२०३५÷ ३६ सालको आन्दोलनको समयमा म शिक्षक भएर पनि सक्रिय रुपमा संयोजक भएर कांग्रेसको तर्फबाट बहुदलको वकालत गर्दै आन्दोलनमा सहभागी भएँ ।

प्रतिबन्धको समयमा २०३७ सालमा भोजपुरमा भएको प्रशिक्षण कार्यक्रममा सहभागी भएर थप प्रशिक्षित हुने मौका पाएँ । २०४६ भएको जनआन्दोलनसहित प्रतिबन्धित कालमा कांग्रेसको नाममा म ७ पटक जेल बसेँ । २०५८ सालमा पनि प्रजातन्त्रको पुनस्र्थापनाको लागि ४ पटक गरेर मेरो जीवनकालमा ११ पटक जेल बसिसकेको छु ।

कांग्रेसले २०४८ सालदेखि २०७२ सालसम्ममा गाउँ सदस्यदेखि संसदसम्मको टिकट बाँड्यो, विभिन्न राजनीतिक नियुक्ति भए तर मैले कहिल्यै टिकट पनि पाइनँ र राजनीतिक नियुक्ति पनि पाइनँ । तर पनि म नेपाली कांग्रेसमा निरन्तर लाग्नुको कारण सरकारले जताको जनजीविका (गाँस, बास, कपासको उचित व्यवस्था) गर्नुपर्छ भनेर खबरदारी गर्नु नै हो ।

०४८ सालमा गिरिजाबाबुको सरकार बन्दा नेपाली जनताले न्यूनतम सुविधा पाउँछन् भन्नेमा म ढुक्क थिएँ । पछि गिरिजाबाबुले समाजवाद भनेको भोको मान्छेलाई फुको चिउरा दिने हो भन्नुभयो । मलाई अब कांग्रेसले केही कार्यक्रम ल्याउँछ भन्ने आश लाग्यो । त्यसपछि पनि नेपाली जनता आशैआशमा बसेका छन् । जीविकाको लागि अर्थात् बाँच्नको लागि मानिसहरु खाडी मुलुकलगायत अन्य मुलुकमा श्रम गर्न जान्छन् र मर्नको लागि वा मरेपछि मात्रै नेपाल आउँछन् । त्यसको अन्त्य हुनुपर्छ र त्यो कांग्रेसले नै गर्नुपर्छ भन्ने मेरो मान्यता हो ।

आगामी दिनमा नेपाली कांग्रेसको सरकार बन्दा म सरकारमा सामेल भएँ भने नेपाली जनताको गाँस, बास र कपासको लागि लड्छु र त्यसलाई स्थापित गराएरै छाड्छु भन्ने मेरो प्रण छ । यदि म सरकारमा पुगिनँ भने पनि महाधिवेशन प्रतिनिधिबाट महासमिति सदस्यमा म गएँ भने कांग्रेसको नेतृत्वलाई समाजवादी कार्यक्रम लागू गराउनको लागि बाध्य बनाउनको लागि म महाधिवेशनको प्रतिनिधिको लागि दाबेदार भएको हुँ । त्यसको लागि मलाई मतदान गरी महाधिवेशन प्रतिनिधिमा विजयी बनाउनुहुन अनुरोध गर्दछु । (कुराकानीमा आधारित)

भिडियो हेर्न तलको लिंक क्लिक गर्नुहोस् ।

https://www.facebook.com/NispakshyaKhabarDotCom/videos/4760040014081485