विराटचोकः नेपाली कांग्रेसको महाधिवेशनअन्तर्गत प्रदेश १ संसदीय दलका सचेतक सूयर्माराज राईले प्रदेश १ नेपाली कांग्रेसको १४ औं महाधिवेशनबाट सहमहामन्त्रीमा उम्मेद्वारी घोषणा गरेका छन् । हिजो राईले सामाजिक सञ्जाल फेसबुकमा आफ्नो उम्मेद्वारी घोषणा गरेका हुन् ।

मोरङ क्षेत्र नम्बर ३ (क) बाट निर्वाचित सांसद राई सोही क्षेत्रबाट सर्वाधिक दोस्रो मतका साथ केन्द्रीय महाधिवेशन प्रतिनिधिमा चयन भएका छन् । आफ्नो उम्मेदवारी कांग्रेसी योद्धाहरुको सम्मान र एमाले चरमताको बहिर्गमनको लागि भएको उनले आफ्नो फेसबुक स्टाटसमा उल्लेख गरेका छन् । बौद्धिक र तार्किक नेताको रुपमा स्थापित उनको राजनीतिक यात्रा नेपाल विद्यार्थी संघको राजनीतिबाट शुरु भएको थियो ।

आफूले पार्टीमा खेलेको भूमिका र पुर्याएको योगदान सदैव सकारात्मक र संस्थागत रहेको उनले उल्लेख गरेका छन् । यस्तो छ उनले लेखेको स्टाटसः

‘नेपाली कांग्रेसको १४ औं महाधिवेशनमा प्रदेश न. १, कार्यसमितिको सहमहामन्त्री पदको उम्मेदवारमा मैले आफूलाई उभ्याएको कुरा सहर्ष जानकारी गराउँछु ।

नेवि संघमा लामो समय काम गर्दै पार्टीको विभिन्न तहमा काम गरि हाल मोरङ क्षेत्र न.३ बाट केन्द्रीय महाधिवेशन प्रतिनिधिमा चयन भएको छु ।

यता संसदीय फाँटमा प्रदेश न.१ को सचेतकको रुपमा जिम्मेवारी सम्हालेर पार्टीलाई जीवन्त र सुदृढ बनाउन थप योगदानसमेत पुर्याउन सकेको तथ्यले म औधी खुसी छु । मैले जितेको निर्वाचन क्षेत्र मोरङ ३ (१) वामपन्थीहरुको अत्यन्तै बलियो पकड क्षेत्र हो ।

झन्डै ३ दशकमा पहिलोपटक नेपाली कांग्रेसको तर्फबाट मैले निर्वाचन जित्दै गर्दा म होइन, त्यस क्षेत्रमा संगठन गरिरहनुभएका र दशकौंदेखि वामपन्थीको कडा प्रहार खेप्न बाध्य लोकतान्त्रिक विचारसंग निकट र कांग्रेसका स्थानीय नेताहरू बढी खुसी र आनन्दित हुनुहुन्थ्यो ।

आज मैले सहमहामन्त्री पदमा उम्मेदवारी घोषणा गर्दै गर्दा म तिनै अनुहार र होनहार कांग्रेसी योद्धाहरुलाई स–सम्मान स्मरण गरिरहेको छु । एक हिसाबले मेरो उम्मेदवारी तिनै योद्धाहरुको सम्मान र वामपन्थी चरमताको बहिर्गमनको लागि पनि हो । पार्टीमा मैले खेलेको भूमिका र पुर्याएको योगदान सदैव सकारात्मक र संस्थागत छ ।

तर यतिबेला पार्टीमा सैद्धान्तिक \ वैचारिक रुपान्तरणमार्फत् लोकतन्त्रको जग बलियो बनाई समृद्ध नेपाल निर्माण गर्नुपर्ने अभिभारा हाम्रो पुस्तामा जबर्जस्त आइपरेको छ । त्यस सत्यको गहिरो अनुभूतिसहित उक्त कार्यभारलाई म सहज रुपले ग्रहण गर्ने र एउटा परिणाममुखी निष्कर्षमा पुर्याउन महत्वपूर्ण योगदान पुर्याउन सक्छु भन्ने अठोट र विश्वासका साथ प्रदेश न. १ कार्यसमितिको सहमहामन्त्री पदमा मैले आफूलाई उभ्याएको हुँ ।’

कांग्रेस महाधिवेशनः आज पहिलो पटक प्रदेश अधिवेशन शुरु हुँदै

कांग्रेस महाधिवेशनः प्रदेश अधिवेशनको कार्यतालिका परिवर्तन