विराटचोकः सुन्दरहरैंचाको वडा नम्बर ७ मा रहेको सुन्दरवाटिका एकेडेमीले अभिभावक दिवसको अवसर पारी ए ग्रेड ल्याउने सबै विद्यार्थीलाई पुरस्कृत गरेको छ । बिहीबार आयोजित कार्यक्रममा उनीहरुलाई मेडल, प्रमाणपत्र र शैक्षिक सामग्री प्रदान गरियो ।

कार्यक्रमलाई सम्बोधन गर्दै एकेडेमीका संस्थापक विनोद फुयालले चाँडै नै हप्तामा १ दिन संगीत र नृत्य विषयका कक्षा पनि सञ्चालन गरिने बताए । आगामी शैक्षिक सत्रदेखि ए प्लस ग्रेड ल्याउने सबै विद्यार्थीलाई नगद २ हजार रुपैयाँ छात्रवृत्ति दिइने पनि उनले बताए । हरेक महिना प्रतियोगितात्मक कार्यक्रम सञ्चालन गर्ने लक्ष्य लिइएको पनि बताए । सैद्धान्तिकभन्दा व्यावहारिक ज्ञानलाई बढी जोड दिइने उल्लेख गर्दै उनले जम्मा ४ वटा विषय मात्रै पढाइ हुने र अरु समय अतिरिक्त क्रियाकलापमा जोड दिइने बताए । नगरपालिकाले स्थानीय पाठ्यक्रम लागू गर्न नसकिरहेको अवस्थामा विद्यालयले भने स्थानीय पाठ्यक्रमको अवधारणामा शिक्षण गरिरहेको उनको भनाइ थियो ।

कार्यक्रमका प्रमुख अतिथि एन प्याब्सनका प्रदेश अध्यक्ष जयबहादुर श्रेष्ठले कठीन परिस्थितिका बीचमा पनि विद्यालयले राम्रो प्रगति गरेको विद्यार्थी र अभिभावकको उत्साहजनक उपस्थितिले देखाएको बताए । ‘कोभिडका कारण कतिपय विद्यालय बन्द हुने वा मर्जमा जाने अवस्थामा पुगेका छन्’, प्रमुख अतिथि श्रेष्ठले भने, ‘तर सुन्दरवाटिकाले स्थापनाको छोटो समयमा नै विद्यार्थी संख्या उल्लेख्य रुपमा बढाउनु सकारात्मक पक्ष हो । विद्यार्थीले देखाएको प्रतिभाले विद्यालयमा अतिरिक्त क्रियाकलाप धेरै हुने गरेको प्रतिभावान विद्यार्थी उत्पादन भइरहेको देखाउँछ ।’ गुणस्तरीय र युग सुहाउँदो शिक्षा प्रदान गर्दै विद्यालयले प्रगति गर्दै जाओस् भन्ने उनले शुभकामना दिए ।

अभिभावक दिवसमा आफ्नो भनाइ राख्ने अभिभावक दिनेश फुयाल तथा अन्य अतिथिहरुले विद्यालयको उत्तरोत्तर प्रगतिको कामना गरेका थिए ।

कार्यक्रममा एन प्याब्सनका मोरङ अध्यक्ष सुनिलदत्त अधिकारी, प्रदेश कमिटी सदस्य कमल खनाल, मोरङ जिल्ला सदस्य प्रकाश कार्की, सुन्दरहरैंचा अध्यक्ष महेन्द्र राई, उपाध्यक्ष सुरेशकुमार खवास, सचिव सूर्य खवास, कोषाध्यक्ष कैलाश दाहाल, सुन्दरहरैंचा नगरपालिका वडा नम्बर ७ की सदस्य मीना ओझा, पोख्रेल वंश प्रतिष्ठान सुन्दरहरैंचाका सचिव केदार पोखरेललगायतको उपस्थिति थियो ।

कार्यक्रममा प्रत्येक कक्षाका विद्यार्थीले सामुहिक नृत्य प्रस्तुत गरेका थिए । त्यस्तै, विद्यार्थीहरु केन्द्रिका फुयाल, आयुष थापा, रेबिसा पोखरेल, कृतिका कोइराला, शिवल न्यौपाने, आदर्श फुयाललगायतले कथा, गीत, चुट्किला एकल रुपमा प्रस्तुत गरेका थिए ।

कार्यक्रममा अभिभावकहरु बीच कुर्सी घुमाइ प्रतियोगिता सञ्चालन गरी पहिलो, दोस्रो र तेस्रो हुने प्रतियोगीलाई पुरस्कृत गरिएको थियो ।

विद्यालय सञ्चालन जानुका ओझाले स्वागत मन्तव्य व्यक्त गरेको कार्यक्रममा विद्यार्थीको तर्फबाट रोशन कायस्थले स्वागत मन्तव्य राखेका थिए । विद्यालयका शिक्षिकाहरुले स्वागत गान प्रस्तुत गरेको कार्यक्रमको सञ्चालन शिक्षिका रेजिना तिमल्सिनाले गरेकी थिइन् ।