धरानः द भ्वाइस किड्स नेपालको फाइनलमा पुगेकी रुक्सना लिम्बूलाई धरानको बगरकोटस्थित लोक दोहोरी रेस्टुरेन्टमा आइतबार सम्मान गरिएको छ । ‘रुक्सना लिम्बू जिताऔँ अभियान धरान’द्वारा आयोजित स्वागत तथा सम्मान कार्यक्रममा धरानका विभिन्न संघ–संस्थाद्वारा सम्मान गरिएको हो ।
कार्यक्रममा अभियानका तर्फबाट संयोजक मीना सिंघक र सागर सरगम चेम्जोङले सम्मान पत्र हस्तान्तरण गरेका थिए । लिम्बू मञ्चका तर्फबाट संयोजक हुक्पा चोेङवाङ र प्रदीप योङहाङ, सिल्भर इन्टरटेन्मेन्टको तर्फबाट सौरभ श्रेष्ठ र गायक एपी शेर्पा तथा केन्द्र मोसन पिक्चर्सको तर्फबाट टंक लिम्बू, याक्थुङ चलचित्रकर्मी संघ प्रदेश न. १ का तर्फबाट अध्यक्ष नवीन मेन्याङ्बो र सिंघक समाजको तर्फबाट दिनेश सिंघकले सम्मान पत्र हस्तान्तरण गरेका थिए ।
अभियानले रुक्सनाको एउटा गीत रेकर्ड गरिदिने घोषणा गरेको थियो । मीना सिंघकको शब्द र सेमिहाङ सिंघकको संगीतमा गीत रेकर्ड हुने भएको हो । अभियानको समन्वयमा मोसन पिक्चर्सले दुई वटा म्युजिक भिडियो निर्माण गर्ने पनि घोषणा गरेको छ । सिल्भर इन्टरटेन्मेन्ट र एपी शेर्पाको तर्फबाट एउटा गीत तथा गायक राजेश पायल राई म्युजिक एकेडेमी तथा राजेश पायल राई फाउन्डेसनको तर्फबाट दुई वटा गीत रेकर्ड गरिने घोषणा भएको छ ।
अभियान टिमलाई गीत निर्माणका लागि बालकृष्ण सिंघकले १० हजार रुपैयाँ दिएका थिए । रुक्सनाको आगामी प्रोजेक्टको लागि व्यवसायी टंक लिम्बूले २५ हजार रुपैयाँ प्रदान गरेका थिए ।
कार्यक्रमका प्रमुख अतिथि नवीन मेन्याङ्बोले टाईटल जित्नु मात्रै ठूलो कुरा नभएर सम्पूर्ण संगीत प्रेमी नेपालीहरुको मन जितेर स्रोता दर्शकको माया पाउन सफल भएको बताए । लिम्बू समुदायको प्रतिनिधित्व गर्दै अन्तर्राष्ट्रिय स्तरको रियालिटी शोको फाइनलसम्म पुग्न सफल रुक्सनालाई गायनसँगै पढाईलाई पनि निरन्तरता दिएर अघि बढ्न उनले आग्रह गरे ।
रुक्सनाकी आमा रेखा लावती लिम्बूले रुक्सानाको लागि धरानको टिमले ठूलो सहयोग गरेको बताउंँदै अझ रुक्सनाको सांगीतिक भविष्यको लागि समेत सबैसँग समन्वय गर्ने अवसर प्रदान गरिदिएकोमा धन्यवाद दिइन् ।
अभियानका संयोजक सागर सरगम चेम्जोङ लिम्बूले रुक्सनाको सांगीतिक क्षेत्रमा भविष्य सुन्दर रहेको पुष्टि भइसकेको भन्दै सो अभियानमा प्रत्यक्ष, अप्रत्यक्ष रूपमा जोडिएर सहयोग गर्ने सबैलाई धन्यवाद दिएका थिए ।
रुक्सना लिम्बूले कार्यक्रममा आफूलाई सहयोग गर्नेहरुलाई धन्यवाद दिँदै मालिङ्गो काटी नि …., किन बढ्दैछ ढुकढुकी मुटुको…, लगायतका गीत गाएकी थिइन् ।
You must be logged in to post a comment Login